قصة غشيم مغازلنجي
المهم وانا في عز النوم
والا فجأه .. رن التلفون ..
وطبعا تلفوننا شايل ابوي منه كاشف الارقام .. موب مخلي الا رقمين التسعه والثمانيه .. يعني مالك الا تدق على
الشرطه ولا الدفاع المدني وغيره مافيه … المهم اني رفعت السماعه واقول نعم
.. الا وذاك الصوت الي يرد الروح .. صوت بنت .. واخوكم اذا سمع
صوت بنت اوجعه بطنه وانواع الاسهال … وقالت آلو
.. انا ماعاد عرفت وش اقول انشلت برطمي وطلعت كني
ياسر عرفات .. ال ال ال ال لو .. قالت .. مين معاي ..؟؟
قلت .. معاك انا .. (( صراحه جواب يدل على ذكائك ..!! ))
وهي الي تضحك .. وانا
قلبي احسه موب طبيعي قالبها
سامري وتستنزل عندي الكبد والبنكرياس
وانواع الربكه .. وقالت لي : سوسو موجوده ..؟؟ قلت لها :
ما ينفع طوطو ..؟؟ قالت مين طوطو ..؟؟ .. قلت ..
هذا اسم الدلع حق الطاوس الي هو انا .
. !! وضحكت للمره الثانيه على التوالي .. وقالت .. يؤيؤ ..
شكلي غلطانه .. طيب آسفه … قلت لها .. لاعادي.. لاشكر على واجب .
. (( دايم اسمع هالكلمه .. وجالس احتري الفرصه اني اقولها ..!! )) ..
وقفلت السماعه … :
تصدقون .. مادري وش صار فيني .. حسيت بشقعريره في جسمي ..
وان افرزات الخشم عندي زادت .. وان ودي اروح انبطح في الحوش
واكتب قصيده هجائيه .. لايكون هذا هو الحب الي يقولون ..
(( نعن ابو الحب الي تعرفه يالضفدع ..!! :عاد انا
ماني متعود على
البنات .. لان ما شاء الله بيتنا فيه خمسطعشر رجال الي هم انا
واخواني وابوي وامي .. ( الله يخلف على ابيك واميمتك هذا وانت اكبر
اخوانك عليه العوض ومنه العوض: ))
المهم .. يعني انا واخواني ماشفنا بنت ابد .. وهذا الي سبب لنا عقده
تسمى العقده الفيسلوجيه ..
(( من وين جت ذي ..!! ))
المهم .. اني قررت اني اتعرف على بنات … بس فيه مشكله وحده
الي هي اني ماعندي اسلوب ابد …(( يعني وقفت على الاسلوب ..
نعن ابوك انت عندك الف مشكله مو مشكله بس .. واهمها مشكلة
وجهك الي كنه لوحة انتبه امامك نقطة تفتيش ..!! )) الوكاد اني
مالقيت قدامي الا واحد من العيال اسمه عبدوش .. معروف
ان البنات ما يعوقون معاه .. وانا الي القط مفتاح سيارتي واروح
له .. وعلمته بوضعي وان امنيتي في
الحياة اتعرف على بنت قبل ما اموت ..
(( اخس يالشايب ..!! )::
فقال لي .. السالفه بسيطه .. اذا بغيت البنت تحبك حسها انها
احسن وحده في العالم … قلت له .. يعني كيف .. فقال
.. يعني كيف ..
فقلت يعني اقولها انتي احسن من ماردونا …!! وهو
الي يرفسني برجله في بطني .. وقال لي .. انت ثور .. وش دخل
ماردونا يالغبي .. !! انا قصدي انك تحسها بانوثتها وان مافيه
بنت غيرها في العالم .. قلت له .. برضه
مافهمت .. يعني تبيني اذبح كل البنات واخليها لحالها …!! وهو
الي يموه علي برجله ويمحطني بيده على جبهتي ….. وقال لي ..
شوف انت حمار .. وماراح تفهم الا بالدروس … ويطلع جواله ويدق .
وقال لي .. شوف انا هالحين باكلم وحده..
وتعلم .. قلت له .. طيب …
وكلم .. وقال .. هلا حياتي هلا عمري هلا روحي ..
انا لؤي حبيبك ومجنونك .. (( الحمدلله على العقل .. نعن ابوك وين لؤي معه .
. والله لو اشوف وجهه في احسن الاحوال بعد ما اعطيه غير اسم جعفر ..
قال ايش قال لؤي ..!! )) .. : وقام
يقول لها .. احبك واموت فيك ..
انا بدونك مثل البيت بدون حاره .. مثل التلفون بدون حراره ..
مثل السواق بدون سياره .. انا البنزين وانتي الشراره ..
انا ال وانتي الاناره ..انا الرومانسيه وانتي الاثاره
انا مبنى التجاره العالمي وانتي الطياره … ((
قسم بالله اني بغيت اضمه وابوسه يوم سمعت كلامه ))…
حسيت بشعور غريب .. نعن ابليسه لو يكلم جدار كان ذاب ))
المهم .. انه خلص المكالمه .. والتفت لي .. وقال لي .. يالله دورك ..
باعطيك رقم بنت وكلمها .. وقول لها نفس كلامي …
قلت له بكل خجل .. طيب .. وهو الي يدق على بنت ويعطيني
الجوال عشان اكلمها … وانا الي اقول آلو.. ويوم سمعت
صوتها ضاعت علومي .. ونسيت كل الكلام .. وقلت لها ..
بابا فين ..!! وما حسيت الا بذيك الجزمه الي لازقه في مقفاي …
وقال لي .. قول نفس الكلام الي قلته يالثور … وانا الي اقول لها
… هلا حياتي هلا روحي هلا تعالي .. وقالت .. طيب وبعدين … قلت لها .
. انا بدونك مثل الكيبورد بدون فاره .. مثل التقاطع بدون اشاره ..
مثل الحمار بدون حماره … مثل السلطه بدون خياره .. انا
محترف وانتي نظام الإعاره … انا الولاعه وانتي السجاره …
انا الدسن وانتي الغماره … انا الصرصور وانتي البياره …
انا طوط طوط طوط طوط … قفلت الخط في وجهي ….
قال عبدوش .. وش فيك ؟؟ .. قلت له .. لا ابد الخط مشغول …!!
(( مايعرف يصرف ابد ..!! )) ومادريت الا وعبدوش مطلع لوح فيه
مسامير ودبجني فيه الين قلت للعنز ياخاله …:
المهم .. اني رجعت للبيت ودماني تصب وماليه وجهي من كثر الطق
الي جاني من
عبدوش
لدرجة ان الي يشوفني ما يعرفني .. طالع كني مسابقة ..
من صاحب هذه الصوره .. الي يحطونها في المجلات …
وانا الي ادخل البيت بشويش عشان مايشوفني احد ..
واطلع غرفتي واسكر الباب وانام … وفي عز النوم ..
دق جرس التلفون .. وارفع السماعه .. الا هي نفس البنت
الي كلمتني اول مره .. قلت .. نعم .. قالت .. سوسو موجوده ..؟؟
قلت لها .. شوفي .. بيتنا كله شباب .. ومافيه احد يبدا اسمه
بحرف السين .. انا واخوني كلنا اسمنا خالد .. وما فيه الا
اخوي الصغير فهد هو الي اسمه نايف ونناديه عبدالرحمن ….
((وش عنده عادل امام..!!))
والبنت كرتها ضحكه .. وقالت
ما شاء الله دمك خفيف … ((هي تحسبني استهبل مادرت اني دلخ من جد ))
وقلت لها .. شكرا .. (( مسوي مؤدب ..!! ))
وسألتني البنت .. وش تسوي هالحين ..؟؟ .. قلت لها .. والله كنت نايم
… قالت .. يؤ يؤ
تنام في اليل انت ..!! .. قلت .. اجل متى انام ..؟؟
قالت .. لا انا انام في النهار واسهر في اليل … قلت لها ..
ليش الاخت بومه ..!! قالت .. لا بس اليل وقت الرومانسيه ..
انت تعرف الرومانسيه ..؟؟ قلت لها .. لاو الله ما اعرف بنات
انا …!!
(( مسوي فيها فاهم ..!! ))
وسألتني .. انت وش اسمك ..؟؟ قلت لها مصيول قالت وش معناه ..
قلت لها .. هذا اسم كلب كان عند جدي وسماني ابوي عليه لاني اشبهه
…. وسألتها .. وانتي وش اسمك .. قالت .. دليدا .. قلت لها ..
انا ابي اعرف اسمك مو عيارتك …!! قالت .. هذا اسمي ..!!
(( هذولي البنات .. تسألها وش اسمك .. تقول رهف ولا شوق ولا افنان .. ولو
عذري بس انه من جنبها ..!! )) سويت فيها اسلوب وقلت لها اني حبيت وحده
بس انتهى هالحب .. لان الي حبيتها خانتني … قالت لي .. من حبيت ..
؟؟ قلت لها .. حبيت عنز جيرننا .. بس انها خانتني مع تيس
سوري عشان له قذله …!! المهم .. ان البنت قالتلي .. اوكي
اكلمك بكره لان امي تناديني .. قلت مو مشكله ..
وتطورت العلاقه .. وصرنا نكلم بعض كل يوم .. وانا
انقلب حالي .. ولا احظو اهلي اني تغيرت .. يعني نكون
جالسين على الغدا ولا العشاء وانا ما آكل .. سارح وانغف ..
وبعض المرات انسى اصبعي داخل خشمي
ولا حظو اهلي اني صرت مؤدب واقرا واجد .. وانا اقرا عشان
اعرف كلام جديد في الحب .. تلقاني اقرا كتب الشعر والحب
والطبخ .. (( لا تستغربون لان كتب الطبخ اتعلم منها كلام حلو بعد مثل
.. ياعسل , ياحليب , ياقشطه , ياكريم كرامل ..!! ))
وبرضه صرت ادخل كتب ممنوعه للبيت .. مثل كتاب ..
ماذا تفعل في ليلة الدخله .. وكتاب .. سنه اولى زواج …
بس المشكله انها ضاعت هالكتب مني وصرت اروح
عند بيارة جارنا الي طافحه واقعد افكر واتأمل وارمي
حصى وسط البياره ….(( مسوي رومانسي .. مثل الي يجلسون
على البحر ويرمون حصى ..!! ))
المهم .. انه في ليله من اليالي .. قالت لي البنت مصيول..
اوصفلي شكلك ..!! ياو الله البلشه .. وش اقولها هالحين ..
اقولها اني قرد .. اعترف لها بالحقيقه المره واقولها
اني جدار مالي ملامح … اعترف لها اني شبيه عبدالله سليمان((الف حمد لله وشكر ))
الوكاد اني قلت في نفسي .. ياولد خلني
اسوي مثل كل الشباب .. وانصب
عليها يعني تلقى الواحد من الشباب شين واذا شفته في ال
ماتدري هو رايح ولا جاي لان وجهه ماله معالم .. ولو تشوف وجهه
تحسبه واحد معطيك مقفاه .. يعني مفروض يحط لوحه على وجهه
ويكتب .. ترى هذا وجهي .. عشان الناس مايلخبطون بين وجهه وقفاه …..وانا مثلكم وردى بعد .. انا اذا قابلت احد يجلس ساعه
محتار وين وجهي
من قفاي وما يعرف الا اذا لقى الورقه .. لان فيني ورقه مثل
الي تجي في الفنايل والسراويل عشان تعرف ورى من قدام …
!! المهم .. اني قلت لها .. انا عيوني مثل عيون جواد ..
وطولي مثل طلال الرشيد .. وخشمي
مثل خشم خالد عبدالرحمن .. وملحي مثل ملح راشد الماجد ..
ومهضوم كثير مثل رامي عياش … (( والله ماناقص الا تحط ملحن معاهم ويكمل الاوبريت ..!! ))
الوكاد .. ان البنت شكلها خقت معي وقامت تشاهق من الفرحه
.. وسألتها وانتي اوصفيلي شكلك .. .. قالت ..
ما اقدر .. لما تشوفيني بتعرف .. لان مالي شبيه ..
(( اخس يا بريتني ..!! )) .. وانا الي افك خشتي وسعابيلي
تقوطر .. كني كلب شايف له عظمه … وقلت لها .. يعني
باشوفك ..؟؟ قالت .. اكيد .. انا بكره باروح شاليهات
اليمامه الي على طريق الرياض الخرج .. ونتقابل هناك .. قلت
لها .. بس هذيك للعوائل بس .. قالت عاد انت دبر نفسك …
قلت اوكي مو مشكله بس كيف اعرفك … قالت بيننا
الجوال .. اذا وصلت كلمني وانا اعلمك وين تلقاني .. قلت لها
خلاص الموعد هناك ….
المهم .. اني انا توهقت .. وش لون ادخل الشاليهات وهي للعوائل .
.. وقلت مالي الا عبدوش .. اتصل عليه واتفاهم معاه … ودقيت عليه .
. ورد علي وقال بعصبيه .. نعم وش تبي يالغبي ..؟؟..
وعلمته بالسالفه من سلسل الين طقاق عليكم ..
((تراني اقصد من طقطق الين السلام عليكم بس مدلخ شوى ))
وقال لي .. والله صعبه وش بتسوي .. قلت له .. وش رايك تلبس
عباة وتسوي نفسك حرمه وتروح معي على انك زوجتي …
وهو الي يتغير وجهه وقال .. انا ولد ابوي .. قلت له .. بالله ..
توني ادري .. كنت احسبك ولد ابوي انا ..!! قال ..
تستهبل يالزبال .. انا اسوي نفسي حرمه .. ياويل ويلي ويلاه ..
خيل الخيل خيالها .. قلت له .. يارجال كلك تبن لادوس في بطنك ..
جالسين في مضارب
الباديه احنا ..!! .. قال لي .. لا يا مصيول هذا شي ما اقدر عليه ..
وش اقول للجماعه ..؟؟ قلت له .. ومن قالك اننا بنحضر عرس ..
حنا بنروح الشاليهات .. وانت مارح تكشف وجهك ابد .. قال ..
طيب ليش انت ماتسوي نفسك حرمه وانا الرجال ..!! قلت له ..
ياخوي انا ما اقدر .. لاني لا رجال نافع ولا حرمه نافع ..
وبعدين حتى لو غطيت وجهي بيكشفون اني ماني حرمه من
ريحتي الي كنها ريحة شربات عزوبي … قال لي .. خلاص .
. بس لاحد يدري … قلت له .. ابشر .. بس جهز نفسك بكره
بامرك ونروح …
وأخذت سيارة واحد من العيال .. ورحت لبيت عبدوش ولقيت
عند بابهم شحاده
وهي الي تجي تبي تركب .. قلت لها .. الله يعطينا ويعطيك ياخاله ..
وهي الي تطق قزازة السياره شوي وتكسرها .. وانا الي اطلع من
جيبي ريال ونص كنت ناوي اشتري فيه توكس .. بس قلت مو خساره
فيها عشان الله يوفقني .. وتوني افتح الدريشه باعطيها ..
الا وهي تقول افتح الباب الله ياخذ هالراس ….. الصوت مو غريب علي ..
يوه عبدوش.. قال .. ايه عبدوش الله لا يبارك فيك ..
افتح بسرعه قبل ما يطلع احد من هلي … وفتحت له الباب وركب ..
وانطلقنا للشاليهت …
المهم وصلنا الشاليهات …. ونزلنا من السياره ..
وامسك يد زوجتي .. الي هي عبدوش سابقا … ودفعنا التذاكر ..
ويوم جينا بندخل .. وقفنا الحارس الي على الباب .. وقال ..
لحظه لازم زوجتك تدخل محل تفتيش النساء لاننا شاكين فيها ..
قلت له .. ليش في مطار حنا .. تراها شاليهات .. وبعدين وش فيها
زوجتي …؟؟ قال الحارس … ياخوي وش هالحرمه الي لابسه
زبيريات ….!!!!! وانا الي اناظر في رجول عبوش الا
فعلا لابس زبيريات ..!!!! يالله لاتفضحنا بس … وانا الي
اقول للحارس ممكن تتركني معا زوجتي .. ابيها في كلمة
راس .. قال لي ادخل هالغرفه الفاضيه وتفاهم معاها …
وانا الي اسحب عبدوش للغرفه .. واترفس في بطنه وانواع
الاكواع .. نعن ابوك يالغبي زبيريات مره وحده … قال ..
وش اسوي مالقيت جزمه كعب على مقاسي ….. وقلت له ..
اسمع نزل العباة على رجولك عشان ماحد ينتبه يالغبي
المهم .. اننا رجعنا للحارس .. واعتذرنا منه على سوء التفاهم ..
ودفيناه بمية ريال عشان يسكت … واول مادخلنا استاجرت
شاليه صغير وقلت لعبدوش يجلس فيه .. وانا باروح ادور خويتي
…. وطلعت .. ودقيت جوال على خويتي .. وصفت لي مكانها …
تقول انها عند الشجر الي جنب المطعم … وانا الي اروح هناك
.. واجلس
ساعتين ادورها ومالقيتها … وادق عليها جوال قلت لها ..
وينك فيه لي ساعتين ادورك … قالت .. انت وينك بالضبط ؟؟؟..
قلها .. انا واقف جنب كيس زباله .. وانتي وينك ..؟؟ ..
قالت .. انا واقفه جنب واحد شكله مجنون وعليه قل صح
… وانا الي التفت وراي .. اوب .. هذي هي …. ((
افا طلعت انا المجنون الي تقصده .. وطلعت هي كيس الزباله الي اقصده ..!! ))
وهي الي تنصدم .. وقالت .. هذا انت ..!! وين الوصف الي تقول ..
اجل طلال الرشيد هاه .. امحق طلال الي تشبه له انت …
(( صادتني ان عيوني مثل عيون خالد الملا .. وجسمي مثل نبيل شعيل .
. وخشمي مثل عبد المجيد عبدالله ..!! )) .. قلت لها ..
لا انا فعلا مثل ماقلت .. بس صار لي حادث هو
الي اثر على وجهي .. ولا انا كنت حلو …
(( ايه هين ..!! ))
قالت .. مو مشكله اهم شي اسلوبك اعجبني .. قلت لها ..
اشوى ان اعجبك شي فيني …. وطلبت منها انها توريني
وجهها .. قالت .. طيب بس لا يشوفنا احد .. وانا الي
اغطي عليها .. وقلت لها .. يالله بسرعه …. وهي الي
ترفع الغطوه .. وانا الي اضحك ..!! قالت .. وش
فيك تضحك ..؟؟ قلت لها .. يالله عاد بدون استهبال ….!!
قالت .. وش فيك ؟؟ .. قلت لها .. يالله بسرعه شيلي القناع
الي على وجهك لا تستهبلين ….!! وهي الي تقول .. هذا وجهي
الصدقي يالقرد … وانا الي انصدم واحس ان الارض تدور
فيني … وش ذا الوجه الشين .. اول مره اشوف وجه
يطلع منه ريحه مخيسه … نعن ابوها حتى الشجره الي كنا
واقفين جنبها رفعت ثوبها وانحاشت .. وكل الشجر الي كان
حولنا انحاش وراح وقف في مكان ثاني بعيد من شين وجهها ….!!!
وانا كنت حاط في بالي كلام رومانسي جلست عشرين
يوم احفظ فيه .. عشان اذا شفتها اقوله لها .. بس يوم شفت
وجهها الي كنه وجه واحد جالس في مجلس رجاجيل وفيه
اسهال … وضيعت كل الكلام الي حفظته وقمت الخبط في
الكلام …. سألتها .. ليش الغمص ساكن عيونك ..؟؟
جاوبتني ..من الأرق ..!! سألتها .. طيب وش هالبسي الي
مكبوب على ثوبك ..؟؟ جاوبتني .. هذا موب بسي ..
هذا مرق ..!! سألتها .. طيب ماعندك غير هالثوب ..؟؟
جاوبتني .. الا كان عندي بس انسرق ..!! سألتها .. طيب
مادامك شينه وشهوله تغازلين ..؟؟ جاوبتني .. انا كنت
حلوه .. بس ان وجهي انحرق ..!! وسألتني .. وش رايك فيني ..
ما اشبه باسكال ..؟؟ جاوبتها .. انتي جسمك جسم باسكال ..
بس الوجه الله خلق وفرق ..!!
المهم اني ماقدرت اتحمل وجهها وقلت لها .. انتي جدك الاكبر
كان غوريلا ..؟؟ قالت لي .. لا تطنز انت وجهك .. انا اول
كنت مصدقه ان الديناصورت انقرضت .. بس من يوم شفت
وجهك عرفت ان هالكلام اشاعات
اشاعات …!!! قلتها .. شوفي ياآنسه جراده .. انا ودي
اجاملك واقولك كلام حلو .. بس وجهك يقول مالك
امل ..!! قالت لي .. والله حتى انا بعد ودي اقولك كلام
حلو .. بس وجهك ما يساعد .. وجهك كنه دعاية لا للمخدرت ..!!
المهم .. ان كل واحد منا تفل في وجه الثاني ورحنا …
وانا من الصدمه توقف تفكيري .. كل آمالي واحلامي
راحت ادراج الدوليب …. وركبت السياره .. ورجعت للبيت
وانا متحطم .. كنت متخيلها مثل مايا
ي ولا اليسا .. وطلعت مثل فطومه … لا
خلاص ماعاد ابي اتعرف على بنات …(( تكفى آخر مره ..
حرام تحطم قلوب المعجبات يا راغب علامه .. اقول انطم بس))
الوكاد .. اني سكرت باب الغرفه .. ونمت نومة عدوكم ..
(( مسوي علوم رجال ..!!)) ومادريت اليوم الثاني الا بالي يرفس
الباب .. وانا الي انقز من فراشي … وش السالفه يالربع ..
الا وهو ابوي يصايح .. افتح يالسمرمدي .. افتح لابارك الله فيك …
وانا الي افتح الباب …. الا وابوي في وجهي وجه مايطمن .. ويطلع ذيك
العجرا من مخباه .. وانواع التلحيط .. واخواني وامي
واقفين عند الباب يتفرجون الانذال … من لقا مصارعه
على الطبيعه …. المهم .. ان ابوي شغال ضرب فيني ويقول
تتزوج من ورانا يالخسيس .. قلت له .. والله ما تزوجت … قال ..
الا .. لان الشاليهات اتصلو علينا وقالوا خلو مصيول يجي
ياخذ زوجته الي نساها
امس … وانا الي تضيع علومي .. وابي افهم ابوي السالفه ..
بس انه شغال ضرب فيني .. ماترك لي فرصه .. وبعد
جهد جهيد قدرت انفك من ابوي .. ورحت لآخر الغرفه ..
وياخذ ابوي نعال ويرميها علي … وانا الي اوخر عنها
بسرعه وامسكها بفمي …(( متأثر بالأفلام ..!! ))
واخواني يوم شافوني
سويت هالحركه وهم الي يصفقون ويصفرون لي …
وانا الي اتحمس .. وانط على ابوي وامسكه مسكه منومه
.. (( خربها الغبي مع ابوه ..!!
وينط واحد من اخواني ويمسك يد ابوي ويرفعها اول
مره وطاحت ويرفعها ثاني مره وطاحت .. ويرفعها
ثالث مره وطاح… لا لا لا لا غير معقول …
رفع ابوي يده وقام يأشر باصبعه يعني لا تراني مانمت ….!!
ويوم شفته مانام .. وانا الي اقوم وامسك ارجوله .. واسوي
له حركه مقصيه عشان
يستسلم .. بس ما استسلم .. واخواني يقنعونه انه يستسلم بس هو
عنيد يحاول يزحف عند الحبال .. بس انا ماخليته يتنفس … وفجأه .
. اوه .. لا تدخل خارجي … امي جابت المقلاة ومحطتني على
جبهتي محطه مدويه … وتدخلو اخواني ومسكوا امي وطلعوها
بر الحلبه .. ((عائله دلوخ ))
المهم اني دخت وماعاد ادري وين انا وطحت مكاني ..
ويزحف ابوي بشويش .. ويحط يده على صدري .. ويعدون اخواني
.. واحد .. اثنين .. ثلاثه …. فاز ابوي هيه ..
((الحمد لله والشكر))
المهم اني فهمت ابوى السالفه ((ما اصلح في جريات ابد اعلم واكع
على طول)) ونمر بيت ابو عبدوش ونعلمه وانواع التمحيط فيني
المهم انا وصلنا الشاليهات وقلت له معى لك مفاجأه وهو الي يضحك
قال والله اني خابرك ذيب ما تترك خويك كذا الرجال ولا بلا
وان اقول في صدرى ايه هين وهو يقول اكيد بتعرفني على وحده من
خواتها قلت ايه انا بعرفك على وحده صحيه وهو يبي يشوف
المفاجأه بيفصخ العباه قلت لها خلها عليك كذا احسن((انواع النذاله فيني))
وصلنا السياره .. الا وابو عبدوش ماسك مفك العجل في
يده يحتري ولده … وعبدوش من هول الصدمه ماعاد شالته
رجليه .. طاح مكانه وقام يصيح ويولول … واستلمه ابوه
انواع تفقيع الوجه وانواع الترفيع
والتنزيل …. وانا جالس اتفرج ومبسوط .. ومادريت الا
وابوي ماسكني وانواع الركب .. وانا الي اصيح فيه ..
هيه يابو الشباب .. حلا هي ..!! توك طاقني قبل شوي …!!
قال ابوي … ايه صحيح .. بس عيب الرجال يطق ولده وانا جالس
اتفرج .. لازم اسوي شي انا بعد …(( لا صراحه ان ابوي فاهم
في الاصول .. طالع لي ..!! ))
المهم .. عقب الطق الي كليته انا وعبدوش .. تزاعلنا
مع بعض .. وانا حرمت اتعرف على بنات .. ومثل ماقال
المثل .. ابعد عن الشر ياعمري وغني لوه .. ودن دان لدانه
دان واويلوه مشكلني حبك ياروح الروح مشكلني ..
يالبيه يالبنات الي مع راشد في الفيديو كليب .. اروح
طحينيه معاهم … ((شكله ماتاب ناوي ينطق مره ثانيه))
