. مليون سلام للشاعرة إيمان بكري

مليون سلام


(( سلاموا عليكوا

عليكوا السلام ))

وأحلى الكلام

يبدأ تمللى بكلمة سلام

لو ع السلام مليون سلام

لو الحمام أسراب حمام

بس السلام يبقى باصول

مش ضحك يابا على الدقون

ولا فض مجلس والسلام !

ده السلام يعنى العمار

يعنى عش

ويعنى دار

يعنى صوت عصفور يزقزق

جوه عشه النونو شقق

نور يصبًح ع النهار

يعنى قمحة فوقها قمحة

يعنى بنت بنوت بطرحه

يعنى ضى ويعنى نور

مش مناجل شر قازحه

سارحه بتحشى الجذور

ده السلام يعنى المصالحه

يعنى فرع من الأمانى

خضرا جوه قلوب مسامحه

هو ده معنى السلام

يلى موًتوا المعانى

جوه فى عروق الكلام

لو ع السلام مليون سلام

لو ع الحمام أسراب حمام

مين فينا ما يحبش ينام

فوق مخده بريش نعام

يطرح الموال غناوى

فوق خدود ورد وريحان

ده السلام يعنى البشاره

يعنى صفارة أمان

يعنى إيد على إيد تسلم

تنفتح كل البيبان

آه يا سلام لو فيه سلام

كنت أقوم م الفجر افرق

ألف شمعه ع الحبايب والجيران

كنت أعلق ورده بيضه

فوق شعور كل البنات

كنت اجيب فرقة موسيكا

يعزفوا السيكا بصاجات

واجرى أذوق كل شبر وكل حاره

بالكهارب والزينات

ده السلام يعنى ابتسامه

مش ندامه وسكه مفروشه بآهات

هو ده معنى السلام

يلى خليتوا المعانى

ضايعه فى حروف الكلام

لو ع السلام مليون سلام

لو ع الحمام أسراب حمام

والسلام عهد وامانه

حتلاقوه موجود حدانا

لحن بيكمل غنانا

وف تسابحنا وكلامنا

وف تحيتنا وسلامنا

فوق ملامح طفل سارح

وف عنيه ضى ابتسامه

بين شفايفه سنه فضه وسنه لولى

وف ضفاير بنت سمرا

جوه فى عيونها الزتونى

حلم راجع بالسلامه

جوه حجر أمى اللى قاعده

ف ريحى تستنى الأماره

فى الشوارع ع الحجاره

فى المداين ف المعابد

فى الكنايس ف المساجد

وف آدان الفجر لمًا

تضوى فى قلوبنا البشاره

ده السلام يعنى المحبه

سنبله بميت ألف حبه

والسلام عهد وأساس

السلام مش بالرصاص

مش سلام على ناس وناس

مش مدافع مش بارود

مش مدافع مش بارود

مش قنابل مش حشود

مش ده طه وده داوود

ده السلام موال غلابه

لاقيه روحها فى وسط غابه

بينهشوا فيها الديابه

واللى واقف ع الحدود

نفسه يوم يقدر يعود

يشرب الموال حكاوى

صبح نادى وريح تقاوى

السلام مش بالإفاده

مش جنازه وقهوه ساده

السلام يعنى السيادة

قوة تسندها الإرادة

يبقى عرضك هو عرضى

نبض أرضك يروى أرضى

ونبقى فيها الكل واحد

مش لازمنا ومش معانا

هو ده معنى السلام

يلى خبيتوا القنابل

جوه ف براج الحمام

يلى عمًرتوا المدافع

لجل ما يموت الكلام

وعشان يكون مسك الختام

راح أقولكم أحلى الكلام

ملعون سلامكم والسلام

ملعون أبو خاش اللى سلم

يوم عليكوا واللى حيسلم عليكوا

واللى سلم من زمان





بس السلام يبقى باصول

مش ضحك يابا على الدقون

ولا فض مجلس والسلام !

ده السلام يعنى العمار

يعنى عش

ويعنى دار

يعنى صوت عصفور يزقزق

جوه عشه النونو شقق




خليجية



مشكوورة يا الغاليــة



مشكوره حبيبتي روعه



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Scroll to Top