** المقادير :
— 6 ملاعق طعام زبدة لينة
— 3/4 كوب سكر
— 2بيضة كبيرة بدرجة حرارة المطبخ
— 1/3كوب ساور كريم او كريمة حامضة ولو تفتكروا انا قلت ازاى نعملها قبل كده فى بوست التشيز كيك الاوريجينال بتاعتى بس هنقول تانى
(( تجيبى كوبايتين لبن رايب وتحطيه فى شاشة او فانيلة او طرحة اى حاجة نضيفة تصفيه فيها فى التلاجة لمدة نص ساعة تقريبا هتنزل مية كتير والكريمة اللى هتفضل فى الشاشة هى دى الساور كريم ))
— بشر ليمونة كبيرة
— فانيليا
— كوب + ملعقتين طعام دقيق
— 1/2 ملعقة صغيرة بيكنج بودر
— 1/4 ملعقة ملح
4 – 5 تفاحات مقشرة ومنزوعة البذر ومقطعة ارباع
كوب سكر + 1/3 كوب ماء لعمل الكراميل
** الطريقة :
— نجيب طبق بايركس مقاس 22 وندهنه بالزبدة على خفيف ونرص فيه التفاح وشه لتحت عشان هنقلبه فى الاخر
— نعمل الكراميل باننا نحط السكر والمية مع بعض على نار عالية ونسيبهم براحتهم خالص لحد مايلونوا دهبى بدون اى تقليب وده مهم جدا يعنى ممكن تمسكى الكسرولة او الحلة وتلفيها بايدك كده لكن ماتقلبيش بالمعلقة خالص ,, هياخد حوالى ربع ساعة على النار لحد مايدى اللون المطلوب وهتشوفى فى الصور انه فاتح وده احسن عشان لسه هيغمق فى الفرن وكمان مايمررش
— عملنا الكراميل خلاص ,, نصبه فورا على التفاح ونركنهم على جنب ..
— نيجى بقى للكرست :
نخفق الزبدة مع السكر كويس جدا بالمضرب الكهربائى على سرعة عالية لحد ماينفش ويعمل قوام كريمى ابيض ,,
وبعدين نضيف البيض واحدة ورا التانية ونقل سرعة الخفق لحد مايمتزجوا تماما ,,
وبعدين نضيف الساور كريم وبشر الليمون والفانيليا ونخفق لحد مايمتزجوا
فى طبق تانى نخل الدقيق مع البيكنج بودر والملح ,, ونضيفهم على الخليط فى المضرب ونخفق على اقل سرعة لحد مايختفى الدقيق ونوقف على طول عشان لو طولنا فى الخفق المرة دى الخليط هيبقى مكتوم
نصب الخليط وهو هيكون زى خليط الكيك التقيل على التفاح بالكراميل ونساويه بايدينا او بالسباتيولا وندخله فرن مسخن على حرارة 180 لمدة 50-60 دقيقة تقريبا او لحد مالجوانب تنفصل عن البايركس
ونسيبه يهدا شوية وبعدين نقلبه هنلاقيه يتقلب بسهولة جدا ان شاء الله وده لاننا داهنين البايركس زبدة ..
واستمتعوا بيه لاخر قطعة واكيد هتدعولى
يسلمو على الموضوع .gif)
