قمرات منتدي أزياء عم المنتديات النسائية كلها ان شاء الله دايما
و زائرات وقمرات قسم العناية بالبشرة
مرحبا بكم
النهاردة بامر الله
هقول لكم علي ماسك يجنن وطبيعي 100% ان شاء الله
ومالوش اي اضرار ومناسب لكل انواع البشرة
بيورد الخدود جدا وبيشيل الجلد الميت ويفتح البشرة
و يخليكي تحسي بلون وملمس بشرة شكل تاني خالص ان شاء الله
بس اكيد مش من اول مرة هتحسي بكل ده عشان انا عارفاكم بتحبوا تستعجلوا النتايج
اول مرة هتحسي بفرق بس نسبته مثلا 50% وبعد كده لما تواظبي عليه مرتين اسبوعيا هتشوفي الفرق بشكل متسارع ان شاء الله
انا منفذاه شخصيا بقالي حوالي اسبوع يعني مرتين تقريبا والحمد لله فيه فرق
الماسك ده اتوصف لي من خلال جارة لي عربية كانت دارسة و بتشتغل خبيرة تجميل في دولتها
والحمد لله نتيجته رائعة فوق ما كنت متصورة فعلا تستاهل التعب
وتستاهل اني اقول لكم عليه
انتم عارفين انا مابحبش اقول اي حاجة
لازم حاجة موثوق منها و كمان مجرباها في نفسي عشان الامانة بس :182:
مكونات الماسك
1- ثمرة كيوي (هناخد نصها الطولي بس)
(انا مش فاكرة سعره كام في مصر بس فاكرة انه كان بيتشري بالواحدة ومكنش غالي قوي قوي يعني اكيد مش اغلي من الكريمات و المنتجات الكيماوية اللي بنشتريها)
2- معلقة صغيرة زبادي.
3- نص معلقة صغيرة رز ابيض مطحون
(مش مكسر مطحون يكون قوامه زي قوام السكر كده)
طريقة التجهيز:
1- هتاخدي نص الكيوي اللي مقطوع بالطول وتهرسيه بالشوكة (مش ينضرب في الخلاط) الهرس يكون كويس جدا لحد ما يبقي مفيهوش اي كتل كبيرة.
2- تحطي عليه معلقة الزبادي وتقلبيهم كويس القوام هيكون سايل شوية يعني زي القشطة كده.
3- نص معلقة الرز المطحون علي الخليط ده هتظبط القوام
ولو حسيتيه خشن زودي كمان ربع او نص معلقة زبادي بس هو غالبا ان شاء الله مش هيحتاج.
ولو القوام بقي سايل منك زودي شوية رز مطحون.
4- القوام المظبوط للماسك ده انه يكون زي البشاميل كده لا تقيل والا خفيف وسهل يتفرد علي الوش والرقبة.
الاستعمال
1- علي وش نضيف ومغسول كويس وبايدك النضيفة طبعا افرديه علي وشك ورقبتك لحد ما الكمية تخلص.
2- سيبيه لحد ما ينشف خالص علي وشك ورقبتك.
3- ركزي بقي هنغسله ازاي
هتفركيه علي وشك مش هتشطفيه بالميه وخلاص
افركيه كويس و برفق للي بشرتهم حساسة
لحد ما تحسي انه وشك اتدلك كله بالماسك ورقبتك كذلك
وفي الاخر اشطفيه بميه عادي.
4- بعد الشطف اما تستعملي ميه ورد تقفلي المسام بيها او اي مكعبات تلج ميه الورد بعد ما تسيبيها بره التلاجة شوية
يعني تطلعي مكعب ميه الورد دقيقة اتنين كده قبل ما تحطيه علي وشك عشان ما ياذيش بشرتك.
او للي ما بتحبش اي حاجة خالص مش مهم
الخطوة ديه تقدري تتخلي عنها.
لا تنسوني من صالح الدعاء
والتقييم من فضلك اختياري ولكن ارجو ان الدعاء اجباري علي قدر الاستفادة.
والموضوع ان شاء الله حصري في أزياء فقط
ولا مانع من النقل ولكن مع الاحتفاظ بحقوق المنتدي الاصلي.
م/ن لتعم الفائدة
