النهاردة بامر الله في السريع كده هقولكم علي طريقة مفيش ابسط من كده انا اعتمدتها باذن الله عشان اشيل بيها الرووس السودا السخيفة قوي اللي بتظهر عند الانف.
انا جربتها كام مرة وفي كل مرة ماشاء الله بتشيل بكفاءة شديدة جدا الحمد لله ومش محتاجة لا وقت والا مجهود
وعشان بحبكم في الله فقلت ما بدهاش يالا نزلي الموضوع في السريع كده عشان الفتوكات يطبقوه وينفذوه ويدعوا لك(مش كده والا ايه؟)
انا بشرتي مختلطة دهنية وحساسة
واكيد رووس سودا عالانف
كان بقالي فترة بتعامل مع بشرتي بشكل عشوائي مش مركزة في في نضافتها والا الصنفرة والا الماسكات كنت ماشية كل شيء كان مفيش عناية خاصة زي مانا متعودة
وكانت النتيجة الطبيعية منطقة الانف اتملت رووس سودا بشكل يفرح 
ومعنديش وقت بصراحة اعمل لا حمام بخار والا اقعد احنتف وازوق زي ما بعمل.
الخطوات بقي بالترتيب:
في يوم واقفة كده بعمل كباية نعناع حلوة عشان اشربها (مفيد جدا جدا للجهاز الهضمي و لتهدئة الاعصاب)
قلت بخار النعناع جميل للبشرة يالا استفيدي بالوقت وعرضي وشك للبخار
1- حطيت مناخيري فوق البراد اللي بغلي فيه النعناع(فوقيه مش جواه 
)لحد ما حسيت انها احمرت.
وقلت اشوف اعمل ايه عشان الرووس تروح
افتكرت البيض لاني سمعت عنه كتير في ازالة الرووس السودا
قلت ما تجيبي بياض بيضة كده وتحطيه علي مناخيرك ومش هتخسري حاجة
لحد الان كويس بس كنت بفكر التكنيك ازاي افردها علي مناخيري
فجاة نورت طاقية الافكار 
اللي انتم عارفينها و دايما تجيب لي البلاوي
وخرجت جبت فورا مناديل تنضيف البشرة وازالة المكياج
اللي هي تقدروا تقولوا زي ديه
بتتشري من اي صيدلية او محل ادوات تجميل وميك اب تقريبا سعرها من 3.5 الي 5 جنيه حسب النوع وفيه مناديل جونسون بس اغلي بكتير تقريبا بحاجة وعشرين جنيه
ولو مش عندك المناديل ديه وعندك مناديل الاطفال شغالة برضه
اي نوع مناديل ماعدا المناديل الورقية العادية لانها هتتفرفت مع البيض وتتقطع وتحتاج وقت و مجهود عشان تتشال ومش هيبقي المنظر عاطفي خالص.
نكمل الخطوات
2- وقصيت من المنديل حتة صغنونة قوي علي قد مناخيري النونو 
(شفتوا الطعامة مناخيري نونو خالص)
3- حطيت الجزء المقصوص من المنديل في بياض البيضة (باقي البيضة اكيد شلته عشان يتعمل بيه حاجة مفيدة)
4- فردت المنديل اللي اتشرب تقريبا ببياض البيض علي منطقة الانف والاجزاء اللي جنبها اللي بيطلع فيها الرووس السودا
و لازم تراعي انها تكبيسيها جامد ما يبقاش فيه هوا يعني تبقي لازقة مباشر علي المنطقة فاهمين قصدي.
5- ربع ساعة تقريبا كان البيض نشف تقريبا علي وشي وريحته بقت فلة 
شديت المنديل فورا ودعكت بيه المنطقة كويس جدا جدا.
6- وشوية سكر ناعم (مش سكر التموين لان حبته خشنة ) في ايدي حلوين كده وفركت بيهم بحنيه منطقة الانف واللي جنبها.
والنتيجة ماشاء الله بجد عمري ما وصلت لها الا بحمام البخار و الابرة و اللزقات يعني في الخطوتين دول وفرت مجهود ساعة علي الاقل غير روقان البال بقي
.
وعشان كده اعتمدت الطريقة ديه وبقيت بنفذها كل مرتين تلاتة كل اسبوع.
بس كده ياقمرات
انا نصحتكم واديتكم طريقتي الجديدة المبتكرة ديه
عشان بحبكم في الله
ومنتظرة منكم الدعاء الصالح
والتقييم بقي اختياري بامر الله
