اهلين شخباركم؟ان شالله طيبين
المهم أنا بقول لكم قصتنا حنا 6بنات الدلع بعيدن عنا إلى الحين ماتأكدنا إنا بنات تصدقون حتى لا جينا نشبه أنفسنا مانشبها ببنات او فنانات لا نشبها بعيال يعني تقول أنا أشبه جيف زلزلي ولا مشعل الجاسر حتى طارق العلي ماخلنه خخخخ يعني مابه أنوثه أبدن
>التعريف بالشخصيات.<
* آغـــا<راعي البقاله اللي بأم خماس<دايم لبسهابنطلون جنز ولا لبسته ماتغيره لين يخيس عليها و لو نطق قال تكفين أعتقيني
* الفزاعــه<هاذيك اللي يحطونها بالمزارع عشان تخوف الحمام عرفتوها؟
24ساعه عليها جلالها وبرقعها وتجمع الاخبار وتسوي نفسها فاهمه و هي ماعندها سالفه
*عبسي دايم إذا جت تفكر تحط إصبعها بمنخرها ويوم كنا صغار كانت تسوي مثل شعره تربط قرن وباقي الشوشه منفكه معروفه بالحاره بإسم عبسي
* بن لادن لانها يوم كنا صغار دايم معها الأطلس وفاتحه خريطه فيها افغانستان وترسم خطه عشان تروح تجاهد الاخت بتطقها كعابي كانت تحشرنا وتغسل مخنا حتى أذكر إذا جابوا شارون في الأخبار تتفل وتحط رجلها على وجهه والله لو يشوفها شرشحها و نفاها هي وخشتها
* غليص تحب مسلسل راس غليص موب الجديد لا القديم كان شرطان فديوا خمسة اجزا الفديوا ما يطفأ و هي قايمه تحفظ النص وتسمعه من كثر ماتشوفه
*الشــهـبـا
مافيه بقاله ولاخياط في الحي إلا فتحت عندها حساب والمشكله عارفين زولها حتى لو تتنكر_أذكر مره كانت بتروح لعمتي وقالت لها آغا تطلب لها من البقاله المهم دقت وطلبت لهاطبعا على حساب وطلعت وهي في الطريق إلا البنقالي راعي البقاله يناديها ماما طلب مال إنتي طلعوا عارفينها و هي صار لها أسبوعين تتنكر
وحالتها حاله و هم يشوفونها و يضحكون معطينها جوها
دجاجه تلقط الحب هاذي الله يسلمكم بزر بصف اول ابتدائي اي حاجه تسمعها تروح تقولها لاهلنا وتزود عليها
فضيحه لا جت مانتكلم ليما تطس
المهم إنادايم تصير لنا مواقف وقصص تضحك وتبكي اللي هي
المهم انا قررت اكتب الاحداث الحلوة اللي تصير لنا وانشرها على شكل حلقات يعني كأنها حلقات خلك معي<<قديييمه بقوة
أهم شي فهمتوا الفكره؟
و هاذي أول حلقه…
{{عـمـره مـقـبـولـه}}
في سنة1429في العطله الصيفيه..
الساعه1الليل مجتمعات طبعا أشك انهن بنات الأنوثه مخالفتهن قد شفتو بنت تنام على ملابس!!بصراحه ماقد شفت وإلا الثانيه تمزح مع اختها بغت تكسر رقبتها ..قلت لكم الانوثه مخالفتنا..
المهم كنا مجتمعات و نسولف و نحش طبعا لاسولفنا ماخلصنا وسالفه تجر سالفه ليماجا طاري العمره طبعا كلنا اعتمرنا بس مو مع بعض
آغا:ياليت صدق نعتمر عمره جماعيه
غليص:والله ياليته نبي سيارة اليوكن لنا يا البنات بس وناسه
الفزاعه:أقول إنثبرن إحفرن بصبه تروحن سوا
بن لادن:ليش لا عادي
عبسي:صح عادي قاعدين على بنك انتي وجهك
وعلت اصوات البنات وبدن يتخيلن انهن راحن وأعتمرن وارجعن ماخلن شي الا تخيلنه حتى لون الاحرامات<مشكلتنا الخيال
قلت :وججججع أمرحن علينا بنرقد جعلكن المرقد
..أذن الفجر وقمنا نصلي وبعد ماسلموا طلبنا من بوفية حسني المصري والأكيد على حساب فديته والله انه نشمي
المهم مليناكروشنا وتسدحنا على فرشنا عشان نخمد وخمدنابحمدالله وشايلات من بالنا انا نروح عمره جماعيه ابدا حاسباتها من المستحيلات
الساعه12بضبط الا بن لادن تصايح فوق روسنا بنروح مكه بنروح مكه بس ماصدقناها بس يوم قمنا الا هي حاشره عباياتنا مغسلتها <قومه والله من غبرتها <هنا عاد تأكدنا ان فيه روحه لان عباياتنا مايطبها الما الا اذا كان فيه مشاوير
و نقمز كلنا من فرشنا صدق صدق بنروح
بس والله شي غريب امس كنا نتكلم واليوم صار<أول مره نتمنى شي ويجي بسرعه
بصراحه ماصدقنا ليما شفنا اهلي شايلين عفشهم تقول بيشدون
والله لوتشوفون اشكالنا تموتن ضحك
اللي عدت تتروش واللي عجعجت للسوق تشتري احرامات<أحد لاعب عليها قايل مافي سوق بالطريق>بس مالقت احرامات زينه ورجعت
واللي طارت تقوم جدتي والثانيه تتصل على عماتي لانهن بيروحن معنا
المهم مسكنا سرا عند باب الحمام وانتم بكرامه عشان نتروش<أحد قال شي!
تخيلو عاد ازعاج وراعينا وش يقولون؟
(لبيك اللهم لبيك)قسم بالله مت ضحك والله انهم منتهين هاذا وحنا تونا في البيت
المهم إجتمعنا كلنا بنروح
وشلنا شناط تقولون بيجلسون سنه وفرش وبطاطين بنموت برد هناك خخخ
ركبنا بسياره انا وأغا وغليص في المرتبه الاخيره كالعاده والفزاعه ومرت عمي وبن لادن وعبسي في المرتبه الثانيه و عمي اللي يسوق وجنبه ولده وعمتي<العن ام الزحمه ياشيخ
والددسن أبوي وجدتي وأمي وأخواني الثنين
مشينا الحمدلله وكل محطه نوقف فيها و ينقعون ساعه في البقاله مايجون الا وروحنا طالعه
وحنا في الطريق انا واغا وغليص ذبحتنا الشمس رحناحطينا مفرش لا وبعد مفرش سبايدر مان من زود الطفوله ياحسره عشان ماتجينا الشمس وبعد فتره طاح التفت اغا تزينه الا السياره اللي ورانا فيها عيال حلوين والتفت وقامت توطا رجولنا عشان نشوفهم المهم أول ما رفعنا روسنا عشان نلتفت الا عيونا بعيون عمي انا على طول انخشيت خايفه يجيني شريط بجبهتي والا غليص يبست عيونها اما أغا كب العفش :والله ماالتفتنا ولا شفناهم<شاكه بنفسها ورجولها تصافق تقول ماسكها كهرب
عمي ارتفع ضغطه ولعن جدفنا عاد تعرفون الرجال لاعصب:لا تحدني انزلكن وأمغطكن بالعقال هنا عاد خجينا الدعوه فيها عقال وتمغيط
بعد هالجو المتكهرب<<
ولد عمي شغل أغاني وحنا مانبي اغاني يعني رايحين عمره و نسمع اغاني صعبه شوي
إلا بن لادن تفرس شنطتها ماندري شعندها
وبعد شوي طلعت شريط طق موضي الشمراني <فينا زيران
وعطته ولد عمي هو استغرب شريط أسود خذاه وشغله يحسبه كسرات وساعة شغله إلا :
خليلو خليلو خليلوخليلو…آلخ
وطلعه ع طول وهو فاطس ضحك<عاد إناإبتسامه عريضه من تحت البراقع
عبسي:ليه طلعته شغله تكفي
ولدعمي:أقول أنثبرن يا الطقاقات
فزاعه:أحسن من الاغاني
ولدعمي:أقول لايكثر
وكل ماشرينا من محطه نتحرى
درايش الددسن تفتح لان اخواني يحذفون علينا قواطيهم وإنا نلفلف وحالتنا حاله <طريق أبوهم وانا مدري
المهم وقفنا بمحطه عشان نصلي العشا و نتعشى واستأجرنا استراحتين وحده حريم والثانيه رياجيل طبعا الاستراحه هاذي قدامها صاله كبيره مره وزي الحاجز مظلل المهم ادخلوا اهلناالغرفه قبلنا وإنا نمشي صرنا نتزحلق و نستهبل لان مافي احد غيرنا واللي تطلع سروالها من …واللي تنغف خشمها وتمسحه ع الجدار وتقول حطولكم تواقيع يابنات وآغامسمره عند الحاجز المظلل تزين برقعها وتتحيول المهم سوينا عروض إلا اللي يوصل الطلبات طالع ميت ضحك انا عاد سوينا انفسنا محترمات قال لنا:ترا كليات الشباب شافوكون <إنا يبسنا مكانا ماستوعبنا<طلع هالحاجز المظلل قسم العزوبيه ومن اليوم جالسين يتفرجون إنا هجينا وغبرتنا تعجعج ورانا وتزاحمنا عندالباب ودخلنا الغرفه
آغا:يافشلتي فشلتاه شافوني وانا لازقه اتحيول الله يستر ما صوروني تلقينهم ماتوا من الضحك زين اني مافتشت ولا كان هجوا
قلت لها: إلا بيغصون من الراعه و يموتون
المهم تعشينا إلا الفزاعه تحب المتبل بس ماجاب خبز معه راحت البست عباتي من دون غطوة وطلعت حافيه للغرفه الثانيه اللي فيهاالرياجيل
ولد عمي حسبها شحاذه <تخيلو شكلها العبايه قصيره عليها ومن دون حذيان ومغطيه وجها بالعبايه بس مطلعه عين وحده
لا بعد مادخلت واقفه عند الباب تشحذ خبز
المهم مشينا وكان اللي يسوق بنا ولد عمي لان عمي تعب وحنا غلبنا النوم اللي نامت واللي تغفي
و ولد عمي ماعجبه الوضع السياره هدوء خاف انه ينعس راح شغل شريط الطق حقنا
إلا أغنية"راح وماصدق على الله"
البنات قامن بسم الله كنهم مقروصات اللي تهز كتوفها كنها ماسكها الكهرب واللي تلوح بيدها و ولد عمي يرقص بيدينه زين انه ماتحمس وقام يرقص السياره
والورعان في دبة السياره يناقزون وأشغلتنا الدجاجه ياما نطت ياما رجعت
والله مستحيل انسى هالموقف من شاف اشكالنا قبل لايشغل الطق قال هاذلي ميتات مافيهن حيل بس ساعة سمعن الطق ردت لهن الروح قلت لكم فينا زيران
المهم وصلنا الميقات تقريبا وحده الليل و ياله لقينا شقه نحرم منها أول ماوصلنا
كلهم رقدوا
والدجاجه والاجرب والاحمص ازعجونا لانهم شبعو نوم بالسياره
وانا والفزاعه وغليص واغا وعبسي جلسنا نكتب ع الجدران حتى الدالوب من داخل كتبنا فيه
المهم أذن الفجر وقاموا يصلون ونزلوا الرياجيل والورعان يشترون احرامات
وبعد دقايق وانا يا الحريم متحاشرات بغرفه الا دخلوا البزران بكياس كثيره وحذفوها عندنا قالوا هاذي احراماتكم هجينا يا البنات لها عشان نختار
بس طلعت الاحرامات كلها نفس الشي خضراء
كلنا يا الحريم من اكبرنا لأصغرنا نكته اشكالنا المهم أحرموا الرياجيل والورعان بس الاجرب ماعرف يربط الحزام فنادي أخوه اللي اكبرمنه عمره11سنه تقريبا
المهم هو لف عليه احرامه ومسك طرفه بيده ودفه بغرفتنا وسحب طرف الاحرام الا الاجرب يدور وبلاويه طالعه و يصيح مسكين ماقدر يوقف من الدوخه إنا متنا من الضحك عليه شكله يضحك مره هو طلع بسرعه و نسمع هواشهم برا
المهم كلنا أحرمنا ماعدا بن لادن لانها نايمه واستلمتها أنا وعبسي ازعاج ليما قومناها يوم قامت لحقتنا بتطقنا ذا الارهابيه أنا انخشيت ورى الدالوب ومعي دبة مويا فاضيه يقال لي سلاح هي عرفت اني ورا الدالوب قامت تهزه عاد هو على حبه و نص لو زادت شوي بيطيح فوقي وأقرر انزل للحلبه وإلا اشوف خشة عبسي في أباط بن لادن وانا اتردد بس مامداني الا بن لادن مسكتني وانا اصارعها بالدبه في وسط دعاوي من امهاتنا بالوجع والجلطه اللي ماتبطي فينا لانا سوينا شغب وعلى قولتهن"فضحتنا في العرب"اي عرب كلهم بنقاليين و هناديه
المهم انتهت المصارعه بالتساوي واحد_واحد<كوره مو بمصارعه
المهم الفزاعه كانت ضايقه صدرها
وانا اعرف السبب تدرون ليش؟
تسبحت يومين ورى بعض والاخت مستصيبه تخاف تتعود على السبوح
أما آغا كنها عجوز بغرفة العمليات على ذا الثوب الاخضر والقرنين رقيه اللي بطاش ماطاش_ بن لادن قايله لها إعملي شعرس قرنين عشان لاجيتي تقصرين يجي سهل عليس تهايط عليها
وغليص لابسه احرام طويل مره وتقول من تبادلني ذا طويل والا ترا بنزل واشتري غيره شوي الا بن لادن طالعه بإحرام مشنتر يعني قصير وقالت نفس كلام غليص
المهم الحمدلله تبادلن بدون ضجه فنيه<مادري وش دخلها
المهم أفطرنا و نزلنا إلا عمي عند السياره وميت من الضحك يقول كنكن بمستشفى لا وانا من زين الخشه كنت لابسه جزمات خضرا طلعت كلي خضرا فيضه منيب بنت
المهم ركبنا السياره وفي الطريق قال ولد عمي ياحرام ماعليكن براقع
قالت الفزاعه:أحسن من اللي ماعليهم سراويل
هههههههههههههههههههههههههههههه هههههههههه
هو قلب لونه
بس جد احرآج
الحمدلله وصلنا مكه ورحنا نستأجر مواقف لسياراتنا
ومشينا رجليه ويالله لقينا مكروا باص هاذك كنه حق المصاريه وقفه ابوي وانحشرنا فيه باقي بن لادن وابوي وعمي وولده قال لها ولدعمي أركبي قالت لا لا اركبوا أنتم أنا بأتعلق ورا<الإخت منتهيه< قال لها طسي بس انا اللي بتعلق جاهم ابوي قال اركبوا محد بيتعلق صدقتوا انفسكم بمصر عشان ذا المكروا اتخيلوا أشكالنا تقريبا عددنا13شخص من غير الورعان تقريبا خمسه منحشرين فيه انا في الاخير والله ماشوف القزازه اللي قدام من الزحمه فتحت الدريشه أنا عند وحده واغا عند وحده ومطلعات يدينا وروسنا هنود مناب بنات
غليص تضحك:لو نتقلب بنصير كومة لحمة هههههههههههههههه
عبسي:تهبين ياوجهس قولي لا اله الا الله ماظنتي نطلع سالمين من الزحمه
شوي ألا ريحه تصرم أحد من الورعان نسم وااااع ناقصين
شوي ألا اليمني(سواق السياره)مسكين صرمته الريحه وتلطلم ماينلام
المهم وصلنا للحرم وساعة نزلنا فتح الدرايش مسيكين قومه شين الريحه
ودخلنا والحرم واستقبلونا بزوليه حمرا طويله والكميرات وصحفيين وناس يصورونا بالجوالات بس أبوي نفضهم بزوليتهم الحمراء وطيرهم <<أقول بلا نصب
المهم وصلنا عند الكعبه وتفرقنا اللي يعتمر و يخلص يجلس ورا المقام وبينا إتصال هاذا كلام عمي
أنا وغليص رحنا سوا وبن لادن حشرت معها جدتي وعمتي وطارت بهن ماعاد شفنا الا اغبرتهن وعبسي واغا سوا والفزاعه لحالها وأمي والدجاجه ومرت عمي سوا
والاجرب والاحمص راحوامع الرياجيل
المهم أنا وغليص اللي يشوفنا يقول داخلات سباق مع الزمن وذا الفلبن أزعجنا قصار و يدخلن بينا المهم شفنا رجال طويل مر ر ر ره ماشالله أحس الجو غير عنده من طوله انا وغليص لزقنا وراه عشان يجي درع قدامنا يوم شفنا الفلبن جن انخرشنا بيدفنا مهب صاحيات قالت غليص: هاذا أبونا هاذا أبونا
هن يوم شافنه راحن من طريق ثاني خافن من طوله بيتوطاهن
بس والله ماحس فينا أحسه عايش بعالم لحاله المهم خلصنا الطواف ودخلنا السعي تعرفون زحمة السعي ولقينا حل إنا نسعى في حق العربات والله انه راحه ماسكات خط إلا اسمع أحد يقول تعالن تعالن ألتفتنا إلا الفزاعه تقول عرفتكن بثيابكن ودخلت معنا المضمار قصدي حق العربات المهم وحنا نسعى فيه جت قدامنا عربات كثيره يمشون ببطيئ حنا عاد قلنا بنطمر على الطريق الثاني و نمشي لين نتعدى ذا العربات و نرجع وفعلا سويناها بس قبل لانتعداها قابلنا ذا اليماني حاطن رجله بعربة فيها عجوز أنا والفزاعه هجينا عاد اناعباتي تسحب علي والفزاعه ذا المرجوجه تدفني وأتدربا وحالتنا حاله بس الحمدلله طمرنا ع الطريق الاول أما غليص يبست واليماني حاط رجله
طااااااااااااااااااااااااااااا اااخ
طاحت غليص على العجوز
أنا قلت العجزه ماتت
وغليص والفزاعه ماتن من الضحك
آغا وعبسي :عبسي تدعي تبي آغا تردد بس آغا فاتحه فمهاعلى المزايين
وأمابن لادن فتدعي وجدتي تردد بس عمتي دفاع اي احد يقرب تدفه وان لزم الأمر تدعي عليه
بس مسيكينات تعبن وقالن لابن لادن نبي عربات بس هي تقول لا لا أجر لكن وثواب<ماقلتلكم ارهابيه
المهم لما خلصنا سعي رحنا ندور الحريم اللي معهن مقصات وشفنا وحده جالسه وحولها نسوان تقصر لهن شعورهن قربنا منها عشان تقصر شعورنا ألا اسمع صوتها مو غريب علي طلعت بن لادن حاشره ذا النساوين تقصر شوشهن وإنا سافطتنا على جنب يوم خلصن قصرنا شوشنا واجتمعنا كلنا يا الحريم عند باب عبدالعزيز واناجالسين اسمع آغا يتحلطم طلعت بن لادن لاعبه في شوشتها مقصرتهامره ذا الارهابيه
أما الدجاجه ازعجتني تأفف حر بموت حر ماكأنهاأمس بعز القوايل جالسه بالشارع معها نبيطه بصراحه مدعي عليه اللي يمر بشارعنا
المهم جو ابوي وعمي والعيال
الحمدلله وطلعنا ندور سياره توصلنا للمواقف
ومر من عندنا اليمني حق المكروباص ساعة شافنا حط رجله مايبي يوصلنا مسيكين شكله قال قبل مايعتمرون صرمتني ريحتهم أجل وشلون بعد ماعتمروا
انا كنت بنط واقول يبه عن خوينا اليمني بس قلت اسكت حرام الرجال يسوي نفسه مايشوفنا على باله
الا غليص نطت وبلغت عنه وراح له أبوي انا كنت انتظر اليمني يقطع الشارع و يوقف قدام نقل جماعي عشان ينتحر
المهم وافق يوصلنا وحنا بالطريق شميت ريحة بياره طافحه مدري بصل خايس ويوم شفت الا اليمني مطلع عطر وش كبره كنه فليت<يعني مبيد حشري
ألعن أم الريح والله ريحة تنسيم ورعانا أبرك من ريحة ذا العطر على باله مسوي كشخه هو وجهه كنه عراقيب بنقالي
المهم وصلنا المواقف وركبنا ومسكنا خط الطايف وعلى الظهر وصلنا خذينا شقه صلينا وتغدينا وقيلنا والله من التعب نمنا أنا وغليص على السراميك من غير مفرش ولابطانيه المهم قمنا ومسكنا خط الرجعه للبيت السعيد
وبعد احصائيات أكتشفنا إن روحتنالمكه إستغرقت36ساعه 9ساعات قضيناهافي مكه و27ساعه في الطريق
بس أحلى36ساعه في حياتي
ورجعنا للبيت سالمين غانمين وللمعلوميه القش والشناط والمفارش والبطاطين رحنا ورجعنا والله ماتحركت من صندوق الددسن
والحمدلله على كل حال
تـــمـــت….
منقوووول كمان<<<ياربي هذي ماوراها غير المنقول هههههه
|
المشاركة الأصلية كتبت بواسطة ملكني هواك
 سلمت الايادي
|
الله يسلمك حبي وشكرا لمرورك نورتي
|
المشاركة الأصلية كتبت بواسطة رذاذ انثى
يسلمو ايديك روعة والك مني احلى تقييم
|
الله يسلمك حيااااتي وشكرا لمرورك نورتي ياعمري
