بس اضن البدايه انه اثنين اصدقاء يحبو بعض مره حصلت بينهم مشكله كبيره القصه تحكي عن خالد وبندر
طبعا بندر هو الي يحكيها
يقول اعز اصحابي(خالد) غلط عليا وبجد زعلني جرحني وبعد مازعلني وقال الي قاله
جاني مسج من خالد في اليوم الي بعده
وكان مقطع من اغنيه تعجبنا ودايم نرددها
يقول المسج:
*ما جيت ابسأل جروح او سبه غيابي..
المشكله"اعرفك" اكثر من أسرارك..
وأكثر من جروح قلبي ورقه اعتابي..
((قلي بعد هالفراق وش آخر اخبارك))؟؟!!
المسج اثر فيني .. لان خالد مو راعي مسجات ولا يعترف فيها
رجعت بي الذكرى لايامنا الحلوه
وقرت ارسل له مسج كرد من نفس هالاغنيه بعد بتعديل بسيط مني:
*ماهي غريبه اذوق وانطفي بنارك
ولا هي بعيده اشوف الجرح باحبابي
حاولت أنسى ولكن ضاعت اعذارك
مادام جرحك ((يالرمت))مكتوب بكتابي!!
يوم الخميس اتصل سامي(كنا اصحاب كلنا يعني شله وحده):
هلا بندر…
فرحت بمكالمته ذكرتني بالجمعات فالأستراحه…
هلا سامي وش الاخبار…
تسلم, وش دعوى يارجال وين الناس اشتقنالك…
تشتاقلك العافيه ياخوي…
فاضي اليوم نمرك انا والشباب بين عشوين؟…
الساعه المباركه حياكم الله والله ودي بشوفتكم…
اجل نشوفك اليوم انشالله…
لا تطولون صلو في مسجدنا مع السلامه
جو الشباب على موعدهم .. على انهم ما صلوا عندنا
ورحت افتح لهم
ماشاء الله كان الكل جاي
ما ادري وش الغلا الي جا لي فجأة
ولما اكتملت المجموعه وانا ارحب فيهم
قبل لا اسكر الباب دفعه واحد
فتحته بسرعه وقبل ما اشوف مين قلت..
السموحه ماشفتك يا…
كان خالد!!!
ما عرفت وش المفروض تكون ردة فعلي
لما تلاقت عيوننا بعد كل هالغيبه حسيت كني بطير من الفرحه في داخلي
وانا احاول بكل ما اقدر اني اخفيها واني ما انط عليه واحضنه
ابتسم ذيك الابتسامه الحلوه والي وحشتني حيل
وهو زي ماتقولون كنه واحد غرقان ورد النفس…
فتح يدينه عشان يلمني
لكني بكل جمود مديت يدي وصافحته بدون أي كلمه!!
قبل لا يصير في خاطركم شيء علي
تذكروا الي سواه فيني
وش ممكن تكون ردة فعل اي احد فيكم
فالأخير احنا بشر ولنا مشاعرنا وانفعالاتنا الي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا..
الشباب سبقونا للمجلس
اصلا كان واضح القصد من هالزياره اكيد خالد هو الي جابهم كلهم
توجهت للمجلس لكنه سحبني من ذراعي ناحيته بقوه
وبصوت هامس يحمل كل معاني الندم والرجا…
معقوله ما وحشتك؟!!..
مارديت عليه وكمل كلامه…
لمتى يا بندر بتظل تتجاهلني, كلمني رد علي,هزئني اوحتى اضربني انا راضي واستاهل لكن لا تسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يا بندر انت بالذات تدري اني مالي غنى عنك…
كان قلبي يقول لي…
ياخي خذه بحضنك وانسوا كل هالالم لكن الله يلعن ابليس ,العناد والكبرياء سيطروا علي والموقف الي صار فالاستراحه بين عيوني
قلت بكل برود وانا ابعد يدينه عني بهدوء…
جعل يدي تنقص قبل يجي اليوم الي تنمد فيها عليك ماضربتك وحنا صغار تبيني امدها الحين؟!!
"كانت نغزه على حركة الأستراحه"
يالله الشباب ينتظرون داخل…
نزل راسه بانكسار ودخلنا
واضح انهم كانوا يحاولون يلقطون شي من الحوار الي دار بيننا
لكن اول ما دخلت كل واحد التفت على الثاني وسوى روحه متعمق في سالفته
بديت اصب القهوه
ومسك خالد الدله الثانيه
كانت هاذي عادتنا لما يزورني احد
دايم نفزع لبعض
بس هالمره ماكنت ابي أي مساعده منه
والي زاد قهري ان خالد بالي صار خلانا فرجه لخلق الله ومحل شفقه الجميع
وهذا الي ماكنت استحمله..
قلت لماجد اول واحد بصب له بصوت واطي وانا اضغط على اسناني..
رح قله يترك الدله ومشكور ما نبي منه شي…
كملت صب وسمعت ماجد يقول لخالد الي بدى يصب من الجهه الثانيه :
هات الدله عنك…
لا استرح تسلم انا ابي اصب مع رفيقي…
وشد على اخر كلمه يبيني اسمع…
لكن بمزحه بايخه وقاسيه في نفس الوقت يرد ماجد:
هذا اول يالحبيب زين انه سمح لك تدخل لبيته معانا هات عنك بس…
وقعد يضحك..
حسيت انه جرحه وتعمد يهينه
ولولا اني حكمت عقلي ذيك الحظه وتذكرت انه في بيتي كان صفقت وجهه بالدله الي معي
صحيح ان ماجد كان معروف عنه انه انسان فظ وعربجي ومزحه زي وجهه ولا يثمن كلمته او حتى يفكر فيها قبل يقولها
لكن لو في ظروف غير هاذي الله العالم وش كنت بسوي فيه…
هذا اذا ما أدبته اول مايطلع خالد
ادري انكم تقولون طيب هذا الي انت تسويه مع خالد
بس ما ادري اذا قد جاكم هالشعور
انه ممكن اجرح او ازعل انسان غالي علي
بس لو احد ثاني حاول .. يفور دمي و اعصب!!!.
المهم سويت روحي ما سمعت وكملنا صب,جلسنا, الي يسولف والي يضحك كنه ماصار شيء
الا انا وخالد
كنت امر بعيوني عنده كل شوي
ولأني افهمه من عيونه وبدون أي كلمه
عرفت انه ينتظر الشباب يمشون
اذن العشاء وقاموا الجماعه
الا خالد
وكنت متوقع هالشي بعد
ودعتهم وشكرتهم على الزياره
عند الباب قال لي سامي بيني وبينه:
والله انكم مفضوحين .. الغلا واضح بينكم .. حتى لو حاولتوا تبينون العكس .. والله الله في خالد وانت عارف اكثر مني انه مافي مثله .. انت العاقل ولا تغلط غلطته .. انتم بدون بعض اسمح لي ما تسون شي , ولا تخلون شي تافه يهدم احلى صداقه شفتها في حياتي , اصلا والله يا بندر انه يحز في نفسي اني اوصيك عليه وانتم الي من اول نخاف نقول شيء عن واحد منكم قدام الثاني…
شكرته وقلت..
قلبي ياسامي ما يزعل وانت تعرف خاصه على خالد بس الأمور احيانا تطلع من يد الواحد والله يخليك لا تفتح معي الموضوع مره ثانيه تراه علي اصعب ما تتخيلون.
مع السلامه..
ودعته
ولما التفت لقيت خالد واقف عند الباب الداخلي ينتظرني
قربت عنده بدون أي كلمه
وكتفت يديني
بدى بالكلام على طول…
بندر سامحني ياخوك ترى كل هالي قاعد يصير ماله داعي, انا تهورت وقلت كلام ماكان لازم اقوله, وجيت اليوم اعتذر لك واحب راسك بعد,"تكفى" خل عنك العناد وريح بالي ترى ما صارت المسامح كريم يالغالي…
سكت فتره اول مره اسمع تكفى منه
كانت طالعه قويه منه
لكني حاولت اختار كلماتي قبل لا اقوله شيء..
آسف يا خالد صدقني ما اقدر انت حطمت كل الاشياء الحلوه لك في داخلي بعد ما سمعتني ذاك الكلام والا نسيت؟!! اذا انت نسيت تراي اذكر كل كلمه قلتها وتردد في بالي كل يوم, ذاك الكلام الي زي السم واتهمتني باطل بعد بدون ما تحسب لصداقتنا أي حساب,يا خالد انا للحين احس اني في حلم مو قادر اصدق الي صار, انت من بد كل هالعالم تبيعني انا في لحظه؟!! ما كان العشم والله…
وبصوت مليان الم …
يعني ايش يا بندر 16 سنه صداقه معقول ما قدرت تلقى لي لحظه وحده تشفع لي عندك وتخليك
تسامحني؟؟؟!!..
بعد كلامه انهمرت الذكريات من كل جهه
لكني حاولت اتجاهلها بكل ما اقدر
وانفجرت…
اسأل نفسك قبل لما اهنتني قدام البشريه بدون ما تعطيني حتى فرصه اني ادافع عن نفسي انت يا خالد حتى ما حاولت انك تظن فيني خير وبعتني بسهوله , نسيت كل شي يا خلود, نسيت الي اذا ضاقت بك الدنيا يصير لك الدار ويضيق خلقه لين تنفرج عليك, ونسيت الي صانك وحفظ اسرارك طول عمره، نسيت الي ما يرضى احد يغلط عليك وانت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيره لك,
حركت يديني بعصبيه…
يا خساره يا خالد انا بس ابي اعرف ذنبي, قلي ليش سويت معي كذا؟؟! عمري غلطت عليك بكلمه؟ او حتى ضيقت خاطرك بحركه؟ تجرحني بهالسهوله ليه؟ علمني يا خالد لا توقف ساكت تكلم يا اخوك؟!! المشكله هنا ان الغلطه جت من غالي وهذا الي يخليني ما اقدر امشيها…
عضيت على شفتي وانا اشوف ملامحه تتغير.
تجاهلته وكملت…
تدري وفر علي كل الكلام الي بتقوله لانه ما عاد ينفع شي الحين الي انكسر ما يتصلح ما عاد لك بقلبي مكان ليتني ما عرفتك يا خالد…
كنت اقول هالكلام عشان ارد له الي صار فالاستراحه
وداخلي يصرخ…
يا مكبر كذبتك يا بندر انت لو احد سألك وش دنيتك مايجي في بالك الا أهلك وخالد…
سكتنا شوي وخالد يهز راسه وعيونه تتلامع
والف صوت في داخلي يقول له:
تراي مثلك يالغالي عزيز وداخلي منهار, وعشان انهي هالمشهد الحزين قبل لا اضعف قدامه
قلت:
في بيت شعر سمعته مره وما اظن ان معناه وصل لي او يمكن المشاعر الي وصفها الا اليوم:
الجرح لا جا من اغراب عادي
بس الجرح موت الجرح لا جا من احباب
لا جا من احباب يا خالد وانت ياخوي ما قصرت كفيت وفيت معي فهمتني البيت بطريقه ما اظن الا متأكد ان ما احد يقدر يوصلها مثلك, ما ودي اقول اني نادم على الماضي لاني فعلا ما ندمت لكنك خيبت ظني فيك…
رفع راسه وقرب يده من اذنه من قسوة الكلام الي سمعه…
كافي يا بندر كافي انا عارف انك دايس على قلبك وانت تقول هالكلام، فإذا كنت تبي تثبت لي شي او حتى
لنفسك صدقني تراك اثبته, واذا كنت تحس انك مخدوع فيني او مصدوم فأنت الحين بأصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ما تهون عندي, وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما راح استسلم
وعارف انك مهما تقسى وتبعد طيبتك وحنية قلبك بترجعك لخو يك, وعارف بعد اني ما اهون عليك…
همست وعيوني فالأرض:
وش الي يخليك متأكد لهالدرجه؟! مثل ما هنت عليك في يوم بتهون علي اليوم !!…
طالعني بنظره يائسه وحزينه…
الله يسامحك يا بندر والله ما اظن انه يفرحك انك تجرح خويك بهالطريقه…، اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغني ولو عن
لحظه من ذكريات عمري معك لاني ما اقدر انسى حياتي كلها …
رديت بسخريه
والي سويته فالأستراحه وش تعتبره؟؟مثل مانسيت الي بيننا بسوء ظن انا نسيته بهالجرح، و ادري انك ماتستحمل فكرة ان اي احد يزعل منك لكن انا–…
قاطعني…
يا بندر انت مو اي احد وراك تكلمني كذا؟! فتح عيونك تراي خلود…
فعلا انا مو اي احد والدليل سواتك فيني…
ابتسم بألم…
لا حول ولاقوه الا بالله ما توقعت العناد يوصل فيك لهالدرجه، على كل حال الموضوع الحين صار في يدك وتقدر تحكم فيه بالطريقه الي تبي بس اتمنى انك ما تسوي شيء تندم عليه، ولا تغالط نفسك اكثر من كذا انت تعرف من انت بالنسبه لي وهالعالم الي حولي بدونك ما ابيهم وما اقدر اتخيل ان
الي كان بينا بيكون ذكرى في يوم من الأيام انت متخيل هالشيء وانت تقول هالكلام؟!!…
هزيت راسي…
محد يموت قبل يومه الدنيا كذا والحمدالله على نعمة النسيان…
اقامة الصلاه..
ودعنا بعض وطلع
]
بعد هالموقف حسيت براحه كبيره
حسيت ان احنا متعادلين الحين
او يمكن كان سبب الراحه اني تكلمت معه بعد فتره اعتبرها في نظري طويله وطلعت كل الي في خاطري
اصلا ما عاد فيني صبر على فراقه
واكيد انه حس بغلطته
وهذا الي كنت ابيه
وقرت اني انسى الي صار خلاص و ارد عليه اذا دق المره الجايه
واسامحه واطلب منه يسامحني بعد
يعني حتى انا قلت كلام ما كان لا زم يطلع مني
وقرت ان احنا نسافر بعد
عشان نعوض كل الايام الي بعدناها عن بعض
علمت ريم(طبعا ريم اختي) بالسالفه كلها
كانت مستغربه وهي تسمعني:
تصدق يا بندر هاذي والله العالم عين وصابتكم اجل معقوله خالد يسوي الي سواه لا والأغرب انك قويت نفسك ولا سامحته,لا لا اسمح لي هالكلام ما يدخل العقل..!!
..ضحكت وانا اسمعها وقلت…
من جدك ما سامحته؟؟!! اصلا من اول ما شفت اسمه في جوالي سامحته على طول وبيني وبينك قلبي ما قوى يزعل عليه من الاصل لكن الظاهر اني كنت امثل على نفسي قبل لا امثل على احد!!
ثانيا المسأله بأختصار كانت رد اعتبار, لكن تعرفين حنا مو زيكم انتم يالبنات اذا زعلت وحده الثانيه تعتذر على طول غالبا والثانيه بعد تسامح بسرعه وهذا في ظني الي يخلي صداقات البنات اجمل واطول بعد اما الشباب فالكرامه والعزه تتغلب على العواطف الثانيه دايم نحس ان احنا مو بحاجة احد والاعتذار بعد من اصعب الاشياء علينا هاذي طبيعتنا الي حطها ربي فينا, هذا وانا وخالد نعتبر طفره جينيه بالنسبه لصداقات الرجال ،الله يعين انشاءالله انا الحين بس استناه يدق خلاص ماعاد فيني صبر…
طالعتني بتعجب…
والله انك غريب يا بندر طيب ليش ما تدق انت عليه؟!!…
اوه انت غبيه والا تتغيبن وش قاعد اتفلسف عليك من الصبح, اقول لك ما اقدر صعبه علي وبعدين خلود ما يقدر يصبر بعد اكيد بيدق هو قال لي انه بينتظر علي شوي…
عطتني نظرات ما ادري وش تبي وقالت..
الحمدالله والشكر لحد يسمعك بس وبعدين لا تسوي روحك فاهم البنات لانك ماعندك سالفه وفي شيء
ابيك تفكر فيه تتوقع لو الوضع كان العكس خالد كان بيسامح والا بيسوي مثلك؟!!..
وطلعت…
وقعدت افكر في كلامها والي اجابته كانت واضحه بصراحه
وهي بعد كانت تعرف الاجابه لان مواقف قديمه تبين ان خالد حتى لو كان صعبه عليه يسامح ومن النوع الي زعله شين بس انه يسامحني انا دايم مهما صار..
لكن هالكلام مايهم الحين..
مر كم يوم وخالد للحين ما دق
لكني يوم الأربعاء شفت ميه مس كول من طلال
ورجعت ادق عليه
قلت اكيد ان خالد يبيه يتوسط بيننا لانه يعرف معزة طلال عندي
لما فقد الامل فيني
وبعدين اناخلاص وصلت عندي ابي كل هالسالفه تنتهي
ودقيت وانا فرحان…
مرحبا طلال…
ه…ه لا.. بندر..
صوته ابدا ما عجبني واختفت الأبتسامه…
طلال خير انشاءالله عسى ماشر,معليش ماكنت عند الجوال قبل شوي بغيتني في شي؟!…
الرجال بدى يتنهد وحسيت ان في شي مو زين صاير …
بندر انا لي ساعه احاول ادق عليك لكن —-….
طلال ياخوك لا تلعب باعصابي قلي وش فيكم؟!…
انا ذاك الوقت الهواجس لعبت فيني لعب قلت ابوهم توفى لانه كان رجال كبير فالسن ومريض من زمان والا اخوهم الصغير تركي الي كان عنده ربو حاد جاه شي
كل شي مر في بالي وكنت طول الوقت افكر بس في خالد
وشلون بيتقبل هالاشياء
وانا اعرف غلا ابوه واخوانه عليه
وعزمت اني انسى كل الي صار و اوقف معه في محنته
كل هذا قبل لا ينطق طلال بحرف …
خالد يا بندر—–!!
لما سمعت الاسم حسيت ان قلبي وصل حلقي
ولا عاد قدرت اتكلم او حتى اتنفس
وبصعوبه…
خ-خ–الد وش—فيه حرام عليك تكلم؟؟!!
كنت انتفض وركبي ما عاد تشيلني…
خالد يطلبك الحل يا بندر ادع له بالرح—
وخنقته العبره
اما انا فكنت ساكت
ولاعاد اشوف شي قدامي قعد يتكلم كلام ما فهمت منه شي الي قدرت استوعبه انه الظهر صار له حادث والظاهر انه كان متوجه لبيتي وتوفى فالمستشفى…
قفلت الجوال
كنت واقف وبحركه بطيئه قعدت على الارض
وبعدين انسدحت عالأرض وقعدت اناظر السقف لفتره طويله
ويدي على راسي
فقدت الاحساس بكل الي حولي
لا دموع ولا كلام ولا صدر مني أي ردة فعل..
طلعت بسيارتي امشي فالشوارع بدون هدى
ما وعيت الا انا فالمجمعه ديرة خالد الي تبعد عن الرياض حوالي الساعتين
وياما زرناها سوى
وقفت السياره قدام فلتهم الي يجونها ايام الشتاء
لما جا اليل رجعت للرياض.
دخلت البيت ورحت لغرفتي
وقعدت اتقلب في فراشي
تصوروا كل هذا بدون أي احساس
الظاهر اني ما كنت مستوعب المصيبه الي انا فيها
لما جا الصبح رحت لبيتهم على طول
وقبل اوصل دق علي طلال…
الو…
هلا بندر, اذا ودك تسلم عليه وتودعه قبل الدفن تعال للمغسله اليوم قبل صلاة العصر..
ما رجعت للبيت
رحت للمغسله وسألتهم
قالوا ما بعد وصل من المستشفى
تبون الصراحه
كان للحين عندي امل ان السالفه كذب او فيها غلط زي حال الكل وقت المصايب
ماودهم يصدقون
واني بشوف خالد بعد شوي
قعدت عند الباب الى الساعه 2,30
والا اشوف سيارة اسعاف جايه وراها سيارات اخوان خالد كلهم
وقف الأسعاف وفتحوا الباب الخلفي
شفت طلال وباقي اخوانه عند السياره
لما شفتهم يطلعون طرف شي ابيض شهقت ورحت اركض فالشارع
كنت احاول ابتعد عن المكان بقد ما اقدر
مشيت لين وصلت اخر الشارع
وجلست على رصيف واحد من البيوت
لما هدت نفسي شوي رجعت للمغسله
كان لازم اواجه الواقع لو كان قاسي..
[ 8 ]
دخلت وانا شماغي على كتفي وماسك عقالي في يدي وحالي دمار
لقيت مو بس اخوانه حتى اعمامه واخواله وزوج اخته بعد
الكل كان متواجد
لما شافوني تغيرت وجيههم وحضنوني بحراره
كلهم اعرفهم ويعرفوني زين
عرفت اني ذكرتهم فيه لما شافوني
حتى واحد من اخوانه ما رضى يتركني
كنه بتعلقه فيني يحس انه مع اخوه خالد
والغريبه انهم كانوا يعزوني بدال ما انا اعزيهم
المهم جاني طلال وعلامات التاثر باينه في وجهه..
تبي ادخل معك؟؟؟احنا تونا طالعين…
قاطعته…
لا لا بدخل لحالي…
كانت هاذي اول جمله انطقتها من اول ما دخلت للمغسله
حتى لما عزوني ما رديت عليهم..
تعوذت من ابليس وبديت اذكر الله
و دخلت في الغرفه الي دلوني عليها
كانت فيها روايح غريبه
الريحه الي قدرت اعرفها هي ريحه المسك والصابون
الظاهر ان الرجال الي كان فالغرفه هو المغسل
وقفت في مكاني عند الباب
ماكنت عارف وش اسوي؟!!
قرب جنبي و كان شخص يميل للقصر ,ابيض, لحيته طويله وصاحب ملامح سمحه
حط يده على كتفي وحس بالرعشه الي تهزني كنت اطالعه بنظرات استغاثه…
وبصوت وقور قال…
عظم الله اجرك ياولدي واحسن الله عزاك ,الله يلهمكم الصبر والسلوان, قبّل جبهته وادع له
بالثبات عند السؤال, وبالي يجي في بالك…
كنت اطالعه وانا اشهق بدون دموع وطلع من الغرفه..
شوي شوي قربت من عنده وشفت منظر في حياتي ما مر علي مثله
حسيت الدم وقف في عروقي لما شفته
انهارت كل حصون المقاومه والصبر الي بنيتها
ما ادري وشلون اشرح الوضع
كانوا حاطينه على شي زي الطاوله ومرتفعه عن الارض بمسافه قليله
مغطين جسمه بشراشف بيضاء
الا وجهه وجزء من صدره
كانت عينه وجزء من جبهته متحوله للون الازرق من فعل الصدمه
اما خده ورقبته كانت فيها جروح بسيطه
لكن واضح ان تركيز وقوه الصدمه كلها جت على صدره
كان زي الي نايم بس بدون أي اثر للحياه
والظاهر اني ما صدقت الخبر لين شفته بعيوني
فقدت اعصابي في ذيك الحظات وصرخت صرخه مريعه
حضنته بين يديني وقعدت اصيح بحرقه زي الاطفال
دخلوا علي بعض اخوانه يوم سمعوا صوتي
وحاولوا ياخذونه مني لكني كنت متمسك فيه بقوه..
يا بندر قل لا اله الا الله لا تسوي في نفسك كذا ترى ما يجوز…
وانا اصرخ من كل قلبي احس اني فقدت عقلي للحظات.
اتركوني خالد يا اخوك رد علي , كلمني يا خالد ,طلال خالد ليش بارد؟؟ليش تاركينه كذا؟؟ ليش ماغطيتوه؟؟ حرام عليكم…
نزل راسه وانسابت الدموع من عيونه…
انا الله وانا اليه راجعون…تعال معي يا بندر تعوذ من الشيطان وخلنا نطلع…
وانا احاول اكلمه..
ياخوك وين رحت وتركتني؟!!انا من لي غيرك يا خالد؟؟..
ودموعي سيول واخوانه يحاولون يفكون يدي عنه..
وبعد جهد قدروا ياخذونه من بين يديني بعد ما بين اثر ضغطي على جسمه
وانا منهار وفي حال مايعلم فيها الا الله سبحانه
كل لحظه انادي بأسمه..
جابوا لي كرسي وقعدوني عليه وانا كني معهم ومو معهم…
واحد من اخواله شيخ كبير
من الناس الي فيه خير وصلاح والله هاديهم
قعد يمسح على راسي وصدري ويقرى علي قرآن لين هدت نفسيتي شوي
ناظرت فيه…
خالد صدق راح يا خال؟!…
شد على يدي وهز راسه ورجعت دموعي ويديني على راسي وانا اهز على الكرسي..
مايصير يا خال والله ما يصير…
قعد يستغفر وانا على حالي
كنت مفجوع الله لا يفجعكم في حبيب…
رحنا نصلي عليه كان المسجد مليان والي برى اكثر من الي داخل
كان الله يرحمه رغم صغر سنه انسان محبوب من الجميع صغار وكبار
وفي المقبره
مع الزحمه وكل هالعالم الي حولي الا اني حسيت بوحده رهيبه
كنت بعيد عن الجماعه
ما ابي احد يعرفني او حتى يشوفني رغم اني عارف ان الكل يسأل عني
تلثمت بشماغي ولبست نظارتي الشمسيه
وقفت بعيد عنهم
جاني تركي
والي كان له غلا كبير عند خالد بحكم انه الصغير
وكان دايم يقول انه رغم صغر سنه الا انه كان حكيم ويفهم اكبر من عمره بكثير
كان عمره تقريبا ذاك الوقت12سنه
سلم علي وحضنته
وانا احاول اتماسك قدامه ولكم ان تتصورن مقدار صعوبه الأمر
خاصه انه يشبه خالد كثير
قال لي:
بندر خالد كان يعزك اكثر من أي واحد في هالمكان وكلهم مجتمعين حوله الا انت!! لا تتخلى عنه في هالحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من احزانك بهربك من هالموقف…
كانت كلمات عظيمه اثرت فيني
وشفت في هالطفل الي فقد اخوه في حادث مفجع الصبر بمعناه الحقيقي
لميته لصدري مره ثانيه وكنا نواسي بعض بخسارتنا الكبيره
مسكت يده وتوجهنا لهم…
استعدوا للدفن وسمعت اخوانه ينادوني…
قلت لهم اني انا الي بنزل فالقبر واحطه
ونزل معي واحد من اخوانه يساعدني…
سلمونا اياه من فوق وحطيته وانا ادعي له واذكر الله طول الوقت
كان ودي لو اجلس معه اوحتى اشوفه واسمع صوته لاخر مره
لكن عرفت ان شمسي غابت
خالد ((الرمت)) غاب من حياتي
وهالحياه للابد
بعد وفاته
رجعت ذاك الطفل الكتوم المنطوي على نفسه…
انا تركت قلبي معه لما تهاوشنا
ولما راح..
راح قلبي معه
ابتعدت عن الناس والعالم فتره طويله
كنت فاقده بشكل خيالي
والي يحز في خاطري اكثر
لما اتذكر انه توفى واحنا بعيدين عن بعض
يعني16سنه عمرنا ماتفارقنا
وقبل اقل من شهر على وفاته نتهاوش!!!
اللهم لا اعتراض راضي بقسمتك وحكمك يارب
لكن املي فيه انه كان فاهمني وعارف اني ما اقدر استحمل زعله وقلبي ما يشيل عليه
واني زي ما قال
مهما حاولت آكابر وانساه مصيري ارجع له..
بعد عدة اسابيع على وفاته
عطاني طلال دفتر وقال:
هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك
لما شفت الدفتر تذكرته على طول
كنا يوم انا واياه في المكتبه بنشتري كتب للجامعه
وشاف الدفتر وعجبه
وقلت له
هذا مايصلح للمحاضرت ياعمي
قال
عارف بس تدري وش باستخدمه فيه؟! بكتب فيه مذكرات لكن مو أي شي الاحداث المهمه في حياتي بس
اذكر اني ضحكت عليه من قلب
وقلت له
انت من جدك؟!! والله ما تصلح لك هالحركات
ونسيت الموضوع بعد كذا
فتحت الدفتر وكان مكتوب بالصفحه الاولى:
بالرغم من اني اعتقدت ان اليوم الذي ستملئ به هذه الصفحات لن يأتي ابدا, الا انه اتضح لي عكس ذلك.
وعدت يوماً اني لن اكتب به غير احداث مهمة من حياتي …احداث تستحق الكتابه وقد جاء هذا اليوم بالفعل…فاليوم أخطأت في حق صديق عمري ورفيق طفولتي.
بعد هاذي الكلمات القليله بعددها والكبيره بمعناها في قلبي
لقيت بعض ابيات الشعر:
بندر حرك ضميرك واعترف اني وفيت
سيرة النكران هاذي فضها واذكر غلاي
اعترف بسك تكابر منت واصل ما بغيت
ريح عنادك وخلنا انتفاهم بالي جاي
لا تحاول تمتحني ما خذيت؟!الا خذيت
قلبي الغالي بلاش وما تركت الا شقاي
صح في لعبة غيابك زاد شوقي وابتليت
بس لاتظلم تراني ما صبرت الابرضاي
ما دريت ان المحبه قاسيه لكن دريت
خطوه المليون جرح وافقت دربي وخطاي
كم تذكرت اليالي وانت يا خلي نسيت
ومن تناسى صدق ذاته ويش اقول الله معاي
يابني آدم تلاحق خاطري لامن طريت
خلك الطيب وحاول تكسب الوقت بوفاي
لا تخليها معاند أن قويت او ما قويت
القوي الله((ياعمي)) وانت تدري عن مداي
وبعد كذا انهى كتاباته بهالبيت:
خسرت ولا ربحت الا قليل من الصبر وجراح
ربحت بندر وان خسرت العمر عسى تحيني اوراقي
وهذا كان الي مكتوب بكل هالدفتر بس
الدفتر عنده قبل اكثر من اربع سنين وهذا الي مكتوب فيه
ولاشي اعتبره مهم في حياته الا هوشتنا
ما ادري اذا كان حاس بموته من قبل
والا البيت جا كذا
المهم لميت الدفتر لصدري وقعدت ادعي له
كنت اقعد مع طلال بعض الايام
ومره قال لي ان في آخر سفره لخالد مع اهله
والي ماراح معهم طلال فيها
قال له:
ماوصيك على بندر ياخوي لا تخليه يحس اني مو موجود خلك حوله دوم..
كمل كلامه وانا ماسك دموعي الي اتعبتني…
ادري انه مافي شيء يخليك ماتحس انه مو موجود مثل ماقال وما في شيء يعوضك او حتى يعوضنا بس ترانا كلنا حولك حتى ابوي يسأل عنك دايم…
رديت وانا اغالب الدموع
وافكر في حال اهله من بعده…
ماتقصرون…
حاولت اشكي له شوي يمكن اخف من هالألم الفظيع الي احس به..
والله انه ماعاد لي قلب ياخالد–..
يوم حسيت اني غلطت بالأسم خلاص انهرت وفضحتني دموعي..
رجعت للبيت
وبعد فتره دخلت ريم علي تحاول تواسيني وتطلعني من دوامه الحزن الي انا فيها…
بندر يا اخوي كل شوي والله اني خايفه عليك..
كانت جايبه عشاء لكني صديت عن الأكل…
طلبتك ياريم والله ما اشتهي شي…
هزت راسها..
ياخوي فضفض وطلع الي في قلبك انا اختك وحاسه فيك ما يصير تكتم كل هالالم في قلبك…
رفعت راسي…
وشلون تبيني اتكلم يا ريوم الوحيد الي قدرت اشكي له في يوم راح وخلاني خالد راح ياريوم وتركني في هالدنيا لحالي…
استغفر ربك يا بندر هالكلام ما يطلع من واحد مثلك انت انسان مؤمن وتعرف الله, وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا..
امتلت عيوني بالدموع زي كل مره اسمع فيها اسمه
وانا احاول اخفيها عنها..
مسكت يدي..
لا تحاول تخفي دموعك ياخوي طلع الي في قلبك الي فقدته مو شوي، انا ياخوي جايه اقول لك ترانا كلنا معاك وحولك في أي وقت تحتاجنا فيه…
ياريم انا شفت الدنيا على يده لكنه ماعلمني اعيشها بدونه، انا خسرت القلب الكبير، من بعده صرت اشوف كل شيء حزين، الدنيا ياريم ماعاد لها طعم بدونه، ليت الزمن يرجع و–
ضغطت ريم على يدي…
لا تعذب روحك ياخوي كلمة ياليت ماتنفع وهذا قدر الله..
ورغم مرور السنوات على وفاته
الا اني عمري ما نسيته اوحتى راح من بالي
عايش داخلي دايم
وادعي له بالرحمه والمغفره كل الأوقات
رحت للعمره
ادور الراحه النفسيه بالقرب من الله
تذكرت وانا اطوف
لما اعتمرت انا والشباب العام الماضي
قسمنا نفسنا عشان الزحمه
كان خالد ماسك يدي و يمشي فيني بين الناس
وانا اقرى من كتاب الادعيه وهو يأمن
ولما رحت اشرب من زمزم تذكرت شكله وهو يصب المويه على راسه وجسمه كنه في بيته
واحنا نقوله ترى وراك سعي ما راح تعرف تمشي واحرامك مليان مويه
و يرد
"واذا صار؟!! والله ماعندكم سالفه هاذي بركه يالله سو مثلي بلا دلع"
وفي السعي لما شفت العربات تذكرته
لما كنت اجره بالموت عشان ما يوقف وهو يأشر على العربات
"الله يخليك خلنا نقعد شوي خلاص ي ابندر رجلي ما تشيلني خلنا نرتاح شوي والا شرايك نستأجر عربه وانت تدفني؟!"
…وانا اهاوشه على كلامه واجره بالقوه…
خالد تراك اذيتني قسم بالله البزران مايسون مثلك…
ولما جينا نتحلل كلنا قصرنا شعورنا الا هو حلق شعره كله
كنت دايم في اي عمره اقصر شعري لكن هالمره حلقت..
واخيرا لما رجعت حافي للفندق زي ما كان يسوي خالد
تذكرت لما خليناه ينام على الأرض فالغرفه
وشكله وهو يهمز رجله بعد تعب العمره وهو يتأف:
ياسلام عليكم بتنوموني على الأرض هالسنه بعد؟؟ ترى ما بيني وبينكم الا شهور، حرام عليكم مو كل مره بندر وسامي ياخذون الأسره في هالغرفه المفروض يصير فيه تناوب!! فالغرفه الثانيه يتناوبون مو انتم يالظالمين…
بس محد عطاه وجه
ولما قام الصبح كان يشتكي من ظهره
وانا اضحك على طريقة مشيته…
امش زين لا تنصب والعمره الجايه انشا الله بتنام عالأرض بعد
رد علي..
هين يا بنيدر ان ما خليتك انت تنام على الأرض انا مب خالد…
سبحان الله
دنيا دواره..
هالسنه اعتمرت لحالي ونمت عالأرض وتركت الأسره فاضيه
ولما قمت الصبح وحسيت ان ظهري يوجعني
ابتسمت بحزن
استقبلت القبله وقعدت ادعي بحراره
ودموعي تنهمر…
يارب اغفر له تراي احبه فيك، ياربي ارحمه و برد علي وامسح على قلبي واجمعني فيه..
كانت هالعمره الله يتقبلها لخالد…
[ الأخير ]
اقترح علي شيخ فاضل من اهلنا
اني احفر له بير في وحده من الدول الأفريقيه الفقيره
واسميه بأسمه الله يرحمه
عشان ارتاح بعد وعلمني عن الأجر الكبير الي بيجيه ان شالله
وفعلا سويت هالشي
كنت تعبان من جد اشوفه في كل الوجيه
واسمع صوته في كل الاصوات
وذكرى اخر يوم شفته فيها ما تفارقني ابد…
في عيون الناس اشوف اشياء كثيره
بعضهم يذكروني دايم ان خسارتي مو بسيطه
وبعضهم وحشتهم شوفتنا مع بعض
وهذا يتعبني زياده..
والي يصعب الوضع علي بعد
اني وين ما التفت القى ذكرياته ماليه حياتي
اثاث غرفتي الي اخترناه سوى لما انتقلنا لبيتنا
سيارتي الي اختار لونها وساقها قبلي وعطره الي للحين في درجها!!
ياغلاة الي راح…
لكن كل ما اتذكر ان ذاك الانسان كان صديقي ورفيقي القريب في يوم من الايام
افرح
وابتسم
واعرف ان الله يحبني
الي رزقني بأخ مثله
والله يعوض عليه شبابه في الجنه انشالله
واذا كنتم تقدرون تناظرون في عيون ربعكم اليوم وتسمعون حسهم في هالدنيا
احمدوا ربكم على هالنعمه
وحطوهم على راسكم دوم
خاصة الناس الي يستاهلون صدق
واعرفوا انكم محظوظين
لان غيركم ما يملك ولا بعض الي عندكم
اما بالنسبه لي
مابعد خالد احد
والله يجمعني فيه بالجنه انشالله…
انا عرضت قصتي على الناس عشان تاخذ منها عبره
وفاته شي مقدر ومكتوب
لكني ابتعدت عنه في اخر شهر له في حياته
بسبب تافه جدا
متخيلين قمة القهر والألم؟!!
هو غلط رحمة الله عليه
وانا عاندت
لكن الي صار بيننا ما كان يستاهل الي سوينا
وهذا الي دايم يسونه الناس
يخسرون احبابهم وربعهم باسباب تافهه
يتركون الشيطان يلعب في عقولهم لين تكبر السالفه
ويفترقون
ولو سألهم احد عن السبب
يلقون ان ما عندهم اجابه واضحه
وهم ما يدرون ان الاشخاص الي يحبونهم يمكن يروحون فجأة
ياناس انا استنيت لين صار صديقي ذكرى
تبون تستنون مثلي؟؟!!…
فالنهايه
اطلب من كل واحد يقرى قصتي
يدعي لخالد بالرحمه
ويدعي لي ان الله يمسح الحزن الي عايش فيني كل هالسنين
ونصيحه من قلب ذاق مراره الفراق
"الانسان الي تحبه وتغليه رح اليوم وقله هالكلام خله يدري لا تستنى يمكن ما تلتقيه بعدين الا مثل مالاقيت خالد, وشي ثاني مهم لا تنتظر انك تفقد انسان غالي عشان تعرف قيمته وقدره عندك"
ختاما…
الى الفقيد الغالي ,
الانسان الي علمني كيف احب الناس والحياه,
الانسان الي نسى سعادته عشان يسعد غيره,
صاحب القلب الكبير المليان بحب الخير لكل الناس,
الي تعلمت منه الكثير وافادني في حياتي ولازلت استفيد,
الانسان الي كان غير الناس الي قابلتهم في حياتي
واعرف انه زي ما كان اول صديق بيكون اخرصديق
لان ما في مثله في هالدنيا احد…
"صديقي الوحيد"
خالد العبدالعزيز
الله العالم بحالتي بعدك يالغالي ياليتك هنا عندي،
ما راح انساك يا رفيقي هو في احد يقدر ينسى مثلك؟!
ليتك قبل ما رحت علمتني وين القى انسان زيك!!
متأكد انك تدري اني دايم شاري ما ابيع
وتقبل اسفي البالغ على كل الي صار مني
…الوداع…
قبل لا انهي القصه
اذا كنت تقرى قصتي وكان بينك وبين من تحبه مشكله وكنتوا بعاد عن بعض
ارسله قصتي وارفقها بأعتذار بسيط
دام عندك فرصه الحين..
**واخالداه**
واخالداه وضج الجرح في كبدي
فسرت بالجرح.. لا انوي على احد
يبكون منك_وقد ناحوا_على ولد
اما انا فبكائي حرقة ((الرمت))
******
يطوف وجهك في روحي فأسأله
"بالله!قل لي اهذي فرقة الابد؟"
واخالده! يغص الشعر من الم
كما تذوب عيون الشوق من سهد
******
ويخطر الموت فوق البيد عاصفة"
من الدموع…فنادوا الصبر ايا اهلي
غبت في الامس..عل الامس يسعفني
اذا افقت ولم ابصرك صبح غد
******
فلحت لي وجدار الموت منتصب
حتى لأوشك شوقا ان امد يدي!!
اين بسمتك الحسناء؟هل سقطت
شمس النهار على ليل من الكمد؟
******
واخالداه!وعاد الناس..وانصرفوا
وانت في القبر..لم تبرح..ولم تعد
تبارك اله ! نجري كلنا زمرا
نحو المنون ولا يبقى سوى الصمد
******
(نقلتها لعيونكم ولانها هي القصه يلي عن جد اثرت فيني )
لاتغرك الدنيا وتصير عديم احساس ولاتحس في يوم انك فوق الناس )
لاتحرموني ردودكم
بس عنجد بتبكي الحجر
مشكورة كتير القصة مؤثرة للغاية
