العقد النفسية في اطفال السعودية

منذ طفولة الطفل السعودي .. وهو يتعرض للإضطهادات .. والترجيم والتقبيص .. وحتى لو كان الطفل جميلاً … فلابد أن يأخذ نصيبه من تقبيص الخدود … وطبعات أرواج الحريم على الخد من أسوء ما يتعرض له البزر السعودي … خاصه أن كان هذا الروج من أسواق السويلم أو أي محل من محلات أبو يمن طاح بالمرق قعد له ساعه واحترق

عقدة الأسم

في بداية الولاده … أول مايتعرض له البزر السعنن .. هو الاضطهاد باختيار الاسم ..
عزيزي المواطن … إذا كان اسم أبوك أو جدك خليّوي وإلا نبهان .. وش ذنب طفل توه طالع على الحياة يتسمى هالاسم ؟.
قمة الاضطهاد وضيقة الصدر لما الواحد صغير واسمه أسم شايب .. وش هالعيشه ياعالم ؟

أو مثلا يطلع على الدنيا واسمه متعب والا حزنان .. سلامات ؟
لو يجيه ضيقه والا شي قال بس هذا من اسمي …

أصلاً من السنه أنه الواحد يختار الأسم المناسب والي له معنى حلو لولده ..

وبالمناسبه بقولكم سالفه ..

مره وحده في البنك أسمها وفقه المهم إنها غيرت أسمها .. وتسولف مع خالتي .. قالت لها خالتي تحبين نناديك بأسمك الجديد والا وفقه ؟
قالت لاااااااااااااا تكفين لاتذكريني
هذا أمي وأبوي تهاوشو مره .. وامي حامل … قام قالها تروح لبيت أهلها
راحت لبيت أهلها وولدت .. وسمت بنتها زعله المهم أنه رجعها .. يوم رجعها حملت بعد .. احتفال وجابتني وسمتني وفقه .. يعني انهم رجعو يتوافقون وكذا ..

المهم ان ذي وفقه غيرت أسمها بس للحين زعله ذي ماغيرته عادي مخليته على ماهو ..

الحين … وش ذنب الطفل تسميه بالظروف الي تمر عليك ..
انولد بالعيد سمّوه عيد .. انولد وشكله مقبول ووش ملحه .. سموه مقبول أنولد بالشرقيه سموه بحر

سلامات يآعالم .. خلاص فكو بزارينكم من ذا الاسماء ..

عاد فيه ناس ع بالهم راقين ويختارون أسماء جديده .. والاسماء نكته ..

أو معناها بايخ .. مثلا مي .. تدرون أن مي قرد ؟ ..

أنا أمي الله يطول بعمرها كانت مسميتني لامه

تقول وطولتي وأسمك لامه لامه .. لين جاء خالي وقال حرام عليك أسم البنت شين معناه .. بكرا تروح لحديقة الحيوان مع أخوانها ويعايرونها

رحمتنييييييييييي

بعدها تقول اميمتي غيرنا أسمك ..

ووحده من أخواتي كان أسمها دانيه ..
طبعاً لو فكرتو شوي بعنى دانيه… تحسنها نازله واطيه شي زي كذا

بس أشوى غيرو أسمها وسموها نوره على جدتي

عقدة منت ولدنا

اللهم آجرني يارب .. ياخواني سووو فيني سواة .. قسم بالله انه حتني وسوسه صدق
عاد نعرف وحده من أقاربنا جايبه ولدين من البوسنه والهرسك ..
قلت صدق لو اني مثلهم أهلي جايبيني مناك وش دراني .. ماقالوه اخواني عبث
بالاخير يوم أني كبرت شوي عرفت أنهم مجرمين ..
وصرت أنا أسويها في اخوي الصغير بس على أنجس
كنت آخذ بالحديقه الخلفيه ظلاااام .. واقول محمد أنا جنيه ماني أختك بس متلبسه .. واختك عندنا هناك ذبحناها بس ياقي نذبحك انت
بس والله ياجاني ضررررررب من أمي بعدها .. لان الولد فعلا خاف
لا تلوموني الي اسويه هذا كله من اخواني الي اكبر مني ..
مدري ليه كنا دايم نخوف بعض .. والله إني اذكر وجه أختي في الظلام يوم توخر البطانيه وتطل بوجهي تروعني ينعن صدق

طبعا أتوقع مافيه أحد ما أنقال له منت ولدنا ..

عاد أنا على بالي حساسه .. أخذ ملابسي وأطلع للحوش .. يعني أني بطلع من البيت كني مطلقه ياربي لك الحمد بس عاهه منذ الصغر

عقدة أخوك الصغير

سبحان الله الأهل السعوديين ماعندهم روح الحريه والاشياء ذي .. وان كل واحد حر بأشيائه

يعني دايم الكبير يضطهدونه عشان الصغير وإذا قال شي
قالو له انت الكبير وهذا الصغير
ماينلامون اذا قامو يفغصون أخوانهم الصغار ..
أبو الحاله الي كذا …
تخيل أنت مدلع وتنام بين أمك وابوك ..
وتستلعن أحيان .. وتقول ماما بوسي بابا حرام نايم وتصورهم بلوتوث<< ماصار بزر ذا شيطان صغير

المهم وتمر عليك الايام وتتشوت من الغرفه وتنام في الظلام الحالك لحالك
ليه ؟
عشان اخوك الصغير وانت كبرت خلاص .. أبو القهر الي كذا

عشان كذا أنا أقترح الاب والام لما يجيبون طفل ثاني يذبحون الاول
الجد عاد لما يجيبون طفل ثاني يساوونهم بالمعامله … ولا يحسسون الاول انه ذا الصغير الفطفوط جاء مكانه وأخذ الدلع كله …

عقدة أخوك الكبير

ياشين الاهل الي يحسسون الاخ الكبير أنه أبو سري ( على وزن عريف سري )
مثلا أبي اطلع للبقاله …
لا ماتطلع لازم معاك أخوك الكبير ..
لو استبدلوها مثلا لا تطلع لحالك نخاف عليك أحسن
أو مثلا أخوك الكبير لا تتكلم عليه … لا تقول له شي خله يمسح فيك البلاط .. كبير هو ..
وجع

أجل ياعالم والله اني ما انساها
مره وانا صغيره واحد من إخواني .. يقول يالله خنتسابق من ياكل مناديل أكثر
والله اني كليت مناديل كثييير مره واتغصب عليها عشان أفوز ..
وبالاخير صار هو يرميها وانا أبلعها صدق ..
ولا انقاله شي

عقدة المدرسه

آآآآآه

أكره ياعالم أساتذتنا .. والله أكرهم .. جواهر وساره اكرهم كره ماهو طبيعي …
كوابيس ماهم أساتذه ..

أول مادخلت أولى كانت أستاذتنا جواهر تدرسنا كل شي بالحياة طبعا .. بتاع كلو
المهم أننا وقتها نخاف مره … وكنا نحسب للمدرسه حساااب . نحس انها مب انسان .. نحس أنها ملاك شي مو طبيعي ..
نقدرها مررررررره ..
المهم ان جواهر ذي من زود الفسقه مدخله بروسنا انها تشوفنا بكل وقت ..

والله ياني تعقدت .. معاد أبي ادخل الحمام أخاف تشوفني بعد
ولا عاد ابي امي تروشني أستحي اخاف تشوفني وامي تروشني ..
يعني مره صارت حالتي صعبه
مادريت أن جواهر مثلها مثل اي انسانه ..
تقوم من النوم بعينها الي مليانه غمص .. وتجينا وتحط كعكع وكحل سايل
وترجع تطبخ دجاج ورز وتاكل هي وزوجها وعيالها ..
ولاجابت خبرنا
أجل فاضيه هي تراقبني وانا أتروش الله من زين الشكل .. ليتني كبيره بعد لا بزر تتروش وش تشوف صدق .

بس أكتشفت أنها نصابه ماتراقبنا يوم وصلت ثاني ابتدائي ..

أما الثانيه ساره ..

آآه ياقلبي للحين أتذكرها هي وعلكها ..
والله ياني أنضرب ضرب منها ..
واذا جيت البيت لين اخوي بعد مضروب يدينا حمررر .. الله يعظم أجر اميمتي

المهم ان ساره ذي كانت تضربني عشان جدول الضرب ..

والله ياعالم للحين .. ماحفظت جدول الضرب .. ودخلت أدبي لاني كرهت شي اسمه رياضيات ..

الدراسه في السعوديه مب تعليم الا تعقيد خصوصا ع ايامنا

عقدة شوفي فلانه

أشين شي بالحياة أنك تقارن شخص بشخص … وخصوصا الصغار
حنا نبيهم يغارون ويتعدلون ..
لكن والله غلط هالحركه مايجي منها الا الحقد ترى

أعرف وحده الله يهديها .. كل ماسوت بنتها شي قالت شوفي هدوء ..
لين حسيت البنت كرهتني جد والله احسها مو علاقتنا عاديه أحس فيها شي
ومتأكده أنه رد فعل من كلام امها الله يهديها بس

عاد البنت عشان تقنع أمها إنها احسن مني بأمور تقوم تقول الاشياء الشينه فيني

يع لين صرت بذا الموقف أحس اني أصغر لين أصير بزر لأني انا بالجامعه والبنت توها بالمتوسط .. مافيه مقارنه أصلا بس بثاره

أنا كنت أقول لاخوي شف فلان ووو بس الحين تأدبت لكل واحد مساوئه ومحاسنه ماله داعي المقارنات ..

المشكله ..في آباء يسوون ذا الحركه .. بس لما ينجح ولدهم ويتفوق على فلان الي يقارنونه فيه ما يكافؤنه ولا شي ولا يحسسونه انه فعلا أفضل دام الدعوه جدول مقارنه …

عقدة الرجل

يوم كنا صغار … كانو اهلنا يحسسونا أن الرجال كائن حي ممنوع الاقتراب
صرنا نستاحش مره نحس انهم شي غريب عننا ..
والحين لما كبرنا … لو ينفخ علي رجال مقدر اقول له شي
لو يتحرش مقدر اقول شي اخاف
والله إن هالتربيه غلط … رجال وش صارت حضرته ما آخذ حقي منه ..

دايم اذا غلط الرجال خلاص نسكت احنا حقك يضيع لا اسكتي عيب تتكلمين

ما انكر ان بعض البنات لا ابد ولا يهمهم … تمسح بالرجال الارض

طبعا الوسط زين .. مو حلو الخوف الزايد لدرجة انك ما تاخذين حقك
ومو حلوه طولة اللسان ونقص الانوثه

عقدة عيب

أما عيب هذي الكلمه أستغفر الله بس .. ياكثر ماسمعتها .. ويقولونها بدف يعني

أحيان نفز واحنا صغار .. بزر طلع اندرويرها وش المشكله طيب ؟

ماتدري الا امك والا جدتك تجرك عيب غطي ..

عيب لاتجلسين كذا عيب لاتقولين كذا كل شي عيب عيب عيب ..
لين تجيك ردة فعل وكل شي عيب تسوينه

يعني وش فيها لو مثلا شفتي بنتك الصغيره جالسه جلسه ماهي زينه وطالعه البلاوي المتلتله
قولي لها اجلسي كذا حبيبتي هذي الجلسه مو حلوه

مو لازم تروعينها وعيب وتمسكينها وتغطينها شوي وتجرحينها من الحماس

عقدة ترى ربي يحط بالنار

اعرف كثير ناس للحين نفسيتهم مو شي .. والسبب هالاسلوب الوعضي الغريب ..
معليه ليه لما يكذب الطفل نقول له … بيحطك ربي بالنار
ليه مثلا مانقول له … ترى ماتروح الجنه . ؟

فيه امهات الله يهديهم …
كذا اسلوبهم لو شافت الصغير يكذب أو يرقص على اغاني
قالت له ترا ربي يحطك بالنار ويصب في اذنك رصاص
ياكثر ماسمعناها … رغم انه حديث انه يصب في اذن سامع الاغاني رصاص ضعيف

والا يجيك أحد كبير يقول لك تخيل تموت وانت كذا …
ليه محسسين الاطفال ان الموت ماوراه الا العذاب

طيب أنا مسلم واصلي … وربي رحيم … ليه كذا نظرتنا عن الموت حتى يوم كبرنا

ليه محد قال لنا واحنا صغار انه لما نموت نروح لربي … هالشي يحسسنا بالامان .. ليه محد قالنا لما نموت نروح لحياة ثانيه والمسلم مايشوف قدامه الا كل خير

ليه العنف بالتربيه … نفسية طفل هذي … ماتجي بالتخوف والترهيب ابد ..

الكراتين الحزينه

صراحه ماقول الا حسبي الله عليهم
أجل سالي وهايدي .. كيف كنا نطالعها .. وربي اني ابكي عليهم ..
أبو النفسيه الي كذا ياعالم .. ليه يفرجونا على كراتين تحزن ؟

واتذكر بعد ذيك الانشوده
(( وصلو علي صلاة لا ركوع لها ولا سجود لها لعل الله يرحمني ))

والله ذا الانشوده ما انساها مستحيل لاني جلست سنتين يمكن وأنا اصحى الليل أبكي
أهلي تعبو معاي مره .. الي يقول جتها عين .. كل شوي موديني لشيخ يقرا علي
ومن ذا تفله ومن ذا مويه ومن ذا حبة سوداء
ومادرو ان علتي من هالانشوده .. كنت أسمعها …
وتخيلو أني ابكي اقول لاعاد تشغلونها .. ومن البثاره اخواني يشغلونها و يضحكون على ان بكيت

واجلس ابلع عبرتي … لين تجيني تكه ولا انام اليل
وربي ايام مستحيل أنساها .. احس انها يام خنقه

الحروب

أتذكر مره شريت أفلام كرتون بالفديو الصغير وكانت حرب وماتو اهل البنت
بصراحه استغرب ليه للحين دموعي ماخلصت ؟
وجد كان شي كأنه حقيقه تروح تتذكر اهلها .. وموسيقى تجيب الهم

ماكأنه لاطفال أبد … أتوقع لو أشوفها الحين أكيد ببكي .. كيف لمن كنت صغيره
لا واتذكر اني كنت أتحمس مرررررررره ..

غير الحرب والدم أفلام الرعب …
مره تخرب نفسية الطفل … تخليه يهلوس ..

أعرف وحده .. صغيره هي .. وكل ماجلست معها تقول لي قصة فلم رعب .. طبعا تقولها لي وهي منبهره وجهها كذا

واحس قلبها يرقع ..

عناد

عناد الاطفال يونس .. لكن داخله يولد شي يشبه النذاله كذا
يعني أتذكر دايم أخواني يعاندوني وانا صغيره … تحترق اعصاابي .. وحده من خواتي تسوي حركات بوجهها .. وكنت أطالعها وانقهررررررررر

لين صرت مثلها أطلع العقد الي تسويها فيني بغيري

أحلى حل ..

إذا كبرتو

من كثر ماكانت تنقال لنا صرنا نتمنى اننا نكبر بسرعه ..
والحين يوم كبرنا … كل العالم أشوفهم رازين بتواقيعهم وعناوين الموضوعات ( كبرنا وليتنا ماكبرنا )
والي جالس يشعر … ويقول ( ياليت ان الزمن يرجع ورى والليالي تدور )
والي تقول ( ليتني طفله كبر همومي لعبتي )

جتنا صدمه .. توقعنا ااننا اذا كبرنا بنصير وناسه … وتتحقق كل احلامنا
من كثر مايقولون اذا كبرتو ..

المشكله أننا نشوف وجيه الكبار دايم معبسه ونفسيتهم خايسه .. بس مافكرنا زين

الضرب

أعتقد انه الضرب مره مؤثر ع الطفل خصوصا اذا كان قوي
ترا أن ضد ان الشخص يكون سلبي ويخلي عياله على راحتهم .. مافيه مانع .. يضربهم لكن مو الضرب القوي الي يعلم ع الجسم

ولا الضرب الي قدام الناس …
فيه اهل الله يهديهم يهينون الطفل قدام الناس على بالهم مايحس ..
أكره الي تضرب ولدها قدامي .. احسها نذله حتى انا اخاف منها

بصراحه مرة اختي سوت معاي حركة الا الان منحرجه منها

مرة تضاربت معاها وكفختها صح هي اكبر مني وسوت نفسها دايخه وقلبها يعورها وانا ابكي واصرخ واقولها اشفيك وهي تضحك علي وتتريق علي وكل ماذكرتني فيه يطيييييييييييييييييييييييييييح وجهي