مقال في مجلة اجنبية للحفاظ على الصحة

شفت هالمقال في مجلة اجنبية

ومن كثر ما احبكم قررت اترجملكم اياه واحطه هني لانه فعلا لقيت فيه افكار يديدة ومب مكررة

^_^

طبعا الكلام لدكتور اسمه Dr Herald Stossier وهو من عيادة اسمها viva mayr الموجودة على ضفاف بحيرة نمساوية وتعتبر من اهم المراكز المتخصصة بالرشاقة والتنحيف فاوروبا ولها زباين من المشاهير والاغنياء

هو مؤلف كتاب اسمه 14 days to a flatter stomach and a younger you

الدكتور هذا معروف باتباعه لبرنامج الديتوكس…يعني الاهتمام بعملية الهضم والجسم من الداخل ينعكس على الشكل الخارجي…ويقول من الافضل انكم تلتزمون تماما بقواعد قليلة ..على انكم تحاولون تطبقون كل القواعد مرة وحدة وبدون ما تلتزمون عدل باي منها…اهم شي يكون الواحد صادق مع نفسه…

الحين بحط الخطوات وتقدرون تطبقونها كل يوم..انا حطيت لكل يوم خطوة على اساس تتعلمون تطبقون خطوة يديدة كل يوم لين ما تتعودن تطبقونهم كلهم:

DAY 1

التحدي: التسوق للطعام

من المهم انكم تشترون الاطعمة والمكونات الاساسية لهالنظام وتكون موجودة في البيت..: زيت الزيتون-بروتين حيواني مثل البيض والسمك والدجاج-بروتين نباتي مثل الفاصوليا والمكسرات والحمص- كل الفواكه والخضر الخاصة بهذا الموسم عشان تكون فريش وفايدتها اكثر- لوز-حبوب القرع-ومهم يكون عندكم ماي نقي او تشترون فلتر ينقي الماي

DAY 2

التحدي: المضغ بطء

هذا من اهم القواعد الي يركز عليها هالنظام..يقول الدكتور ان هالخطوة مهمة جدا للخصر.اول لان المضغ بطء يخليك تحس بالشبع بسرعة وبالتالي الواحد بياكل اقل..ثانيا المضغ بطء يساعد الجسم انه يستفيد اكثر من المعادن والفيتامينات الي في الاكل وكل ما الجسم امتص هالمغذيات اكثر كل ما قلت الشهية والشعور بالحاجة للاكل.تخيو يقول انكم لو اكلتو من ماكدونلدز بطريقة بطيئة بتفيدكم الوجبة اكثر من لو كلتو سلطة صحية بس بسرعة !!!

بس هو طريقته كيف؟ انج يوم تحطين القمة فحلج لازم تمضغينها او تعضينها 30 مرة…ولازم الوجبة كلها تاخذ 30 دقيقة….يعني مب تاكلون بسرعة وتقومون

DAY 3

التحدي: المساج اليومي للبطن

يقول انه يلاحظ ان معظم الناس الي يزورون عيادته يعانون من الكرش مب بسبب قلة الرياضة ولكن نتيجة ان الخلايا تحت السطح تكون ملتهبة او منتفخة بسبب يا اما الاكل بسرعة + الاكل بوقت متاخر + تحت الضغط النفسي + عدم المضغ كفاية….عشان جذي ينصح بالمساج لانه يسهل الهضم ويخف الانحباس الي يؤدي للانتفخ.

DAY 4

التحدي: لا تاكلون طعام نيء بعد الساعة 4 العصر

لان هالشي يسبب الانحباس وبالتالي الانتفاخ…الهضم يكون ابطا بعد هالوقت والاكل النيء يحتاج لجهد اكبر عشان ينهضم

يعني يشمل: الفواكه- الخضراوات غير المطبوخة – السلطة>> هذا كله لا تاكلونه بعد الساعة 4

ركزو عالاكل المطبوخ…مثلا تقدرون تتعشون خضرة مشوية او مقلية المهم تكون مطبوخة مب نيئة

DAY 5

التحدي: التقليل من البروتين الحيواني>>لحم دجاج سمك جبن بيض

يقول انكم لازم ما تاخذونه يوميا بس 3 مرات بالاسبوع..والباقي اعتمدو عالبروتين النباتي…

DAY 6

التحدي: تناول الطعام مبكرا

حاولو تخلصون وجباتكم الثلاث قبل الساعة 6 مساء…ولازم الكمية تقل بالتدريج..يعني العشا اقل من الغدا والغدا اقل من الفطور

DAY 7

التحدي: النشاط والرياضة

طبعا الرياضة مهمة وتحسن الهضم وتقل الرغبة في الاكل وفوايدها معروفة…بس احذرو من الافراط فيها لان الواحد اذا بالغ في الرياضة الضغط والسترس بيزيدون افراز هرمون الكورتيزول وهالشي بيشجع الجسم انه يخزن دهون حول الخصر والبطن

DAY 8

التحدي: افطرو مثل الملوك

يعني خلو وجبة الافطار تكون اكبر وجبة في اليوم…لان الجسم بيحرقها طول اليوم وما بيخزنها على عكس العشا…بس الموضوع يحتاج تعود طبعا لان معظم الناس ما يشتهون ياكلون الصبح

الدكتور ينصح بالبيض و الحليب الكامل الدسم (الكامل يحسسج بالشبع لوقت اطول) والسلطات الي تحتوي على طماطم وجبنة الماعز (ماحبها) وزيت الزيتون…ضروري بعد تاكلون شي نيء مثل الفواكه مثلا

DAY 9

التحدي: شرب الكثير من الماء

يطرد السموم ويسرع الهضم..

الدكتور ينصح انكم لازم يوميا قبل الفطور تشربون ماي دافي مخلوط بليمون …وقبل الريوق بربع ساعة لا تشربون اي شي بالمرة..ضروري الماي يكون نقي ومفلتر..

شاي الاعشاب مسموح لكن غيره لا (الممثلة جنيفر انيستون تحب تجرب انواع الشاي والاعشاب الصينية الي تنظف البطن وتقل الانتفاخ)…الغازيات ممنوعة وكذلك القهوة

DAY 10

التحدي : تجنب الاكل تحت تاثير الضغوطات

يربط الدكتور بشدة بين النساء الواتي يعانين من الضغوطات وبين الاصابة بالسمنة…يقول لا تاكلون الوجبات اذا كنتو مستعجلين وراكم شي…ولا تاكلون اذا كنتو فحالة قلق او ما شابه…

DAY 11

التحدي: تقليل حص الطعام

في حركة حلوة ينصح بها الدكتور: يقول اذا بقى في الصحن بس 10 بالمية من الاكل..قومو واشغلو نفسكم باي شي وبعد فترة ارجعوله ويوم بتشوفون الصحن ما بتحسون انكم مشتهينه نفس ما كنتو قبل شوي…

ملاحظة: نحن كمسلمين ما نفضل رمي الاكل المتبقي في صحننا.. فانتو طبقوها على الصحن الرئيسي الي تحطون فيه الوجبة مب صحنكم الي تاكلون فيه لانه حرام بينعق ولا حد بياكله من عقبكم..اما الصحن الرئيسي عادي ينحط بالثلاجة

DAY 12

التحدي: تناول المزيد من الزيوت

ينصح الدكتور بتناول زيت الزيتون ومكملات زيت السمك يوميا…زيت الزيتون ضيفوه لكل الوجبات كانه ملح يعني..وزيت السمك هو اوميغا 3 وينباع بالصيدليات …فايدته انه يساعد عالهضم ويحرق الدهون في الوسط..

حتى ان مدرب العارضة المشهورة ايل مكفيرسون يقول انها تاخذ كبسولتين كل يوم poliquin omega 3 fish oils عشان تحافظ على استواء منطقة البطن

وهذي صورة العارضة الرشيقة:

DAY 13

التحدي: السكر ممنوع

الدكتور يقول ان السكر بانواعه هو العدو الاول للرشاقة والجمال والبطن المسطح

وانا شخصيا جربت هالشي من زمان وفعلا نقصلي وزني مع اني ما غيرت شي بس كنت اتجنب كل شي ممكن يكون فيه سكر واقرا المكونات عالعلب وجذي

DAY 14

بتلاحظون ان جسمكم متغير والكرش اخف بكثير….طبعا اذا سويتو كل هالخطوات مرة وحدة بتكون النتيجة فعلا حللوة اما اذا سويتوها خطوة خطوة ممكن ياخذ وقت اكثر

اتمنى انكم قريتوه عدل واستفدتو منه لاني تعبت وانا اكتب من المجلة

بليز لا تحرموني من ردودكم

__________________