حوار بين الدنيا والأخرة

واسمائهم حقيقيه ( لاتنسون اقروا الملاحظه الي بأخر القصه )

نبتدي( القصه ع لسان صديقة بطلة القصه )

________

حصه/ هي بطلة هالقصه كان مقر زواجها ب 29 /1 / 2022 لكن قدر الله وماشاء فعل

حصه بنت طيبه بكل معنى الكلمه ومحبوبه حيل من كل الي حواليها

من الاهل والاصدقاء وفوق هذا جميله لكنها ماتبهى بهالجمال بالمره

وماشيه ع النيه ..

حصه تعشق شي اسمه ( نت ) وتقريبا يومها كله يروح بالقعده ورى هالكومبيوتر

وماشاءالله عليها بكل موقع تدخله تتميز وتاخذ رتبه

تقريبا كل الرتب اخذتها مشرفه مراقبة اقسام مراقبه عامه وحتى الاداره بالي بالون ( الاحمر )

وهي ماشاءالله شعلة نشاط بكل هالمواقع ( لكن ) فيه واحد من هالمنتديات تحبه بشكل

جنوني وناقعه فيه ليل مع نهار ومحبوبه من الكل فيه

ولانها متميزه بشغله بهالمنتدى محد تميز فيها الا هي …..؟؟
المهم مستمره هالبنت ومدهره بتلبية طلبات الاعضاء الي ماتنتهي وتفرح لما يثنون عليها

بهالشغله الي تسويها وع هالحال لمدة سنتين لاتكل ولا تمل

وطبعا ادارة هالمنتدى ماتقصر بمنحها الاوسمه والتشجيع المستمر

الي يخليها تناقز من الفرحه وتعطي اكثر ..

المهم هالبنت تقر زواجها بالتاريخ المذكور اعلاه ..

وبدت تحضر لزواجها وهي فرحانه لان الي بيتزوجها ولد خالتها وهو شاب كل الصفاة الحلوه

فيه وهي معجبه فيه حيل

المهم حضرت كل شي وفي كل روحه لها للتسوق تاخذ اعز صديقاتها وهم ……؟ وريم

مع امها واختها

خلصت كل تجهيزاتها للزواج وحتى فستان الزواج اصبح عندها بالبيت لانه كان تصميم خاص

لها وغالي وايد

وكل يوم لازم تطل ع هالفستان >> وصرعت صديقاتها فيه دوختهم لدرجة

وحده من صديقاتها قالت لها لعنبو ابليسج ليش تحسيني انج عانس

وماصدقتي تتزوجين وجع اركدي

ع العموم قرب زواجها وقبل الزواج بإسبوع فقط ..؟؟
اقعدت من النوم وهي تصارخ وتبكي بشكل هستيري وكانت الساعه (2) الصبح

وكان اصراخها عالي وع وصف اختها كان اصراخ مرعب وكأنها ( ملبوسه )

استمرت ب الصراخ وامها وابوها واختها وزوجة اخوها يحاولون يسكتونها ويهدونها

لكنها مستمره بشكل مخيف

وكان ابوها يقول يابنت اهدي واقصري الصوت العالم الفجر لاتفضحينا

وهي مستمره راحت اختها وكلمت اخوها الي كان مداوم وقالت له السالفه

وطبعا ترك شغله وجاء وهو مخترع من الوضع

لما وصل اخوها وشاف شكلها الغريب بسرعه طلع من البيت وراح لإمام المسجد

الي كان يقيم بغرفه بالمسجد وجابه للبيت دخل الامام وشاف منظر البيت

فقرب منها وبدأ يقرأ القرأن وكانت امها ماسكتها وترش عليها من الماي الي مقري فيه

وتغسل وجها

بعد فتره هدت البنت وبدت تبكي بحرقه وتقول خلاص معاد ابي اتزوج خلاص

هالزواج مافيه خير لي ولكم

ف استغرب الجميع من كلامها وقالت اختها زواج بعد اسبوع بس

قالت ولو ماراح اتزوج سألها الامام ليه يابنتي استهدي بالله وقولي لنا شالي خلاج

تقولين هالكلام وتخذين هالقرار المفاجىء للجميع …

قالت

شفت شي بمنامي خلاني التخذ هالقرار

شفت اني لابسه ثوب زواجي وكنت بصالة الافراح وامشي بين الحضور

وكنت فرحانه بس كنت احس الارض الي تحتي مو مستويه وبغيت اطيح اكثر من مره

بس كنت اتماسك قدام الناس علشان الفشله ..

وصلت الكوشه وجلست بإنتظار العريس ولما وصل وبدأ يسلم ع خواته وامه

وجاء وجلس جنبي وكنت منبهره فيه واتباهى بوجوده جنبي لانه امنية كثير من بنات الاقارب

المهم جاء وقت تقطيع الكيكه وقفنا نتظر الكيكه ولما جابوها العاملين عليها

كانت مغطاه بغطاء حلو ومبهر فقلت لاقرب الناس لي اختي وصديقاتي المقربات

انتوا بالذات بذوقكم منها تعالو جنبي

وهنيه اكشفوا عن الكيكه ولا هي كوره من نار حرارت لهبها يصلي الوجه ونور

اضاءتها يعمي العيون صرخوا الناس وانا استغربت وكنت راح ابتعد عنها لكن امسكتني صديقتي

ريم وقالت تعالي قصيها ياحصه ليش خايفه قلت لها بس هذي نار قالت عادي

الكيك متعدد الاشكال بس طعمه حلو ولاتنسين انج انتي الي طلبتيها بهالشكل

قلت لها متى ياريم وربي ماطلبتها تكون جذي

قالت ريم امبلا ياحصه انتي طلبتيها وانا حذرتج من هالشكل وانتي صميتي اذونج عني

استغربت من كلام ريم واخذت السكين وانا احس اني مغصوبه قطعة اول قطعه

واخذتها بإيدي وكنت راح اعطيها زوجي لكن مالقيته التفت ادوره مالقيته ف عطيتها

ريم قالت شكرا مابيها ف مديتها ل —-؟ ف امسكتها لكنها احرقتها بإيدها ورمتها

وهي تتألم ولما نظرت للي وراه لقيت طابور من الناس كلهم مادين

ايديهم ف فرحت قلت غريبه حبوها رغم انها تحرق وبديت اقطع لهم وياخذونها وهم يتألمون

من حرارتها بعدها تعبت وانا اقطع والكيكه كل مانقصت زادت مره ثانيه والطوابير

سبحان الله وبحمده … سبحان الله العظيم

تزيد والي يبون منها يزيدون وضليت ع هالحال ساعات طويله ومن التعب كنت ابكي

انهكت ع الاخر وكل ماجات عيني بعين ريم بكيت اكثر وهي كانت تمسح دموعها

صرخت وقلت ياريم تعبت متى تخلص هالكيكه قالت ريم تو الناس ياحصه باقي وايد

وبدت حرارت النار تسيل مكياجي وتوسخ الفستان وكنت اعاني من التعب الشديد

وفجأه علقت النار بإيديني وبديت اصارخ واصارخ

مثل ماشفتوني .. وانا خايفه خايفه ياشيخ

قال الشيخ استغفري ربك يابنتي وقومي توضئي وصلي ركعتين وان شاءالله خير

نسأل الله التوبة النصوح
_______

اختها حست ان فيه شي هالحلم ومن الصبح ارسلت ايميل ع احد مفسرين الاحلام

وحلفته بالله انه يفسره لها بخيره وشره للضروه

وبعد فتره ارسل لها المفسر وقال خلي اختج هي الي تروي لي ع التلفون

كلمته حصه وروت له الي شافته وسألها عن شالي تسويه وقالت له كل شي عنها

قال لها فيه شي انتي تخفينه او تسوينه بالخفاء شنو هو ياحصه

قالت فيه شي ياشيخ انا اسويه في احد المنتديات وبصراحه كانت وحده من صديقاتي

دايما تنصحني منه بس انا احب هالشغله واحس اني ماهره فيها

قال الشيخ شنو هالشغله

قالت انا مشرفه ع قسم بأحد المواقع وهالقسم يختص بتلبية طلبات الاعضاء

الخاصه بالاغاني وكنت ابدع فيه احول لهم الصيغ واسوي لهم مقاطع ومكسات وسوالف وايد

قاطعها الشيخ وقالت استغفري وتوبي هذا كان تنبيه من الله لج

الكيكه كانت عملج الغير صالح والقطع الي ارهقتج هي صدقاتج بالذنب المشترك مع من

قطعتي لهم هالمقاطع وشجعتيهم عليه واسعدتيهم في توفيره لهم وطول الطوابير وتجدد الكيكه

هو الذنب الجاري وكبره ف شوفي كم شخص اعطيتيه طلبه وكم شخص سمعه معه وكم شخص

نقله من منتداك الى منتدياتهم وكل هذا بسببك انتي

تقول حصه انهرت وقلت شسوي ياشيخ قال توبي لله توبه نصوحه وتبرئي عن كل
مافعلتيه بهذه المنتديات

خصوصا مايخص الاغاني والمنكرات وسأل الله لي ولك الثبات
وتوبي ياحصه توبي لانك ماتدرين متى الله ياخذ امانته والله يحسن خاتمتنا جميعا
ولاتنسين يبعث المرء ع مامات عليه ياحصه
يبعث المرء ع مامات عليه ياحصه

اللهم صلي وسلم على رسول الله
___________

طبعا حصه الحين تابت لكن تعاني من حاله نفسيه سيئه وتعالج
وتأجل زواجها الى اشعار اخر ( وادعوا لها الشفاء ما هي فيه ) وادعوا لها بالثبات
واطلب منكم تدعون لها ( لانها تهمني وايد )

ملاحظه :-

حصه هي ( حصيص ) صديقتي المقربه وريم صديقتنا الاقرب واحب الناس لنا
ودايما تنصحنا لكن الشيطان لاسيطر ع الواحد

وع فكره الصديقه المقصوده الي اعطتها حصه القطعه واحرقتها ورمتها هي ( انا نجود )

ومن يومها حرمت اشياء وايد ع نفسي وانتوا تعرفوا اصعب جهاد جهاد النفس

انا كتبت لكم قصة صديقتي علشان العبره ولاني حابه الخير لكم
والله يكفينا شر انفسنا والشيطان

واللهم إنا نستغفر ونستهديك ونتوب إليك !!
يا غفار الذنوب ويا ستار العيوب !!
إغفر ذنوبنا وإستر عيوبنا وأدخلنا الجنة يا رب العالمين