زي ما احنا عارفين مقادير عجينة العشر دقائق مجموعتين هما :
المجموعة الأولى :
2 كوب ماء دافئ
2 كوب دقيق فاخر
2 معلقة خميرة فورية
1/4 معلقة صغيرة ملح
2 ملعقة لبن بودرة
1/4 كوب سكر
المجموعة التانية :
3 كوب دقيق فاخر
1/2 كوب زيت نباتي
الطريقة :
نحطي مقادير المجموعة الأول مع بعض ونسبهم يتخمرو 10-15 دقيقة . وده شكلو بعد ما تخمر بصو مليان فقاقيع وخمران ازاي
نحط عليه مقدار الدقيق وأنا بحط اضافة بسيطة من عندي بتعمل فرق وهي (1معلقة صغيرة باكنج باودر) ونبدأ نعجنهم مع بعض
نصب مقدار الزيت على العجين ونستمر في العجن كويس .
هنا شكل العجين لو طرية حتحتاج لعجن كمان وهنا رشية دقيق بسيط وحطيت العجينة علشان أعجنها (بعشق العجين علشان كده ما بتستخدمش العجانه كتير)
بصو مسكت في بعضها ازاي
وهنا اتعجنت حلو وبقت جميلة والسطح أملس وقوامها طري ومتماسك.
هنا بقى بدأت أقسمها علشان حعمل كذا حاجة علشان ماشاء الله العجينة كبيرة (ضروري الترتيب في الشغل يعني نعرف كل حته عجين حنعمل بيها ايه علشان بيفرق أوي في الشكل والقوام النهائي وحتلاحظوا كدا في الاخر . يعني نحاول ما نعدش نقلب في العجينه ونفرد ونلم تاني ده سر بسيط من الاسرار)
الموديل نمره 1 (البيتزا الكبيرة)
دهنت صينية كبيرة بشوية زيت وفردت حته عجينة ودهنتها كاتشب. وحطيت حجات البيتزا (فلفل رومي – طماطم -زيتون أخضر)ورشيتها بجنه شيدر صفراء.
وخبزتها في الفرن لحد ما استوت والجبنه ساحت وده شكلها .
الموديل نمره 2 (كروسون الجبنه أو الباتيه)
فردت العجينة على شكل دائرة وقطعتها مثلثات زي الصوره
وبعد كده حشيتها جبنه كيري وجبنه بيضاء ولفتها ورصيتها في صنينة مفروشة بورق الزبدة ودهنتها بصفار بيض ولبن ورشية عليها سمسم.
وخبزتها في الفرن لحد ما نفخت واتحمرت وده شكلها النهائي. اتفظلي مدي ايدك
الموديل نمرة 3 (الأقماع)
فردت العجينة وعملتها على شكل مستطيل . وقطعتها شرايط زي الصورة
وبعد كده لفتيها على الأقماع ولزقتها بشوية بياض بيض علشان ما تفتحش في الفرن .
ودهنتها برضو بصفار بيض ولبن علشان تحمر وخبزتها وده كان شكلها لما خرجت من الفرن .
الموديل نمرة 4(mini pizza)
فردت العجينة وقطعتها على شكل دوائر سميكة شوية بسيطة ودهنتا بالكاتشب وبرضو حطيت عليها حاجات البيتزا(فلفل رومي – طماطم -زيتون أخضر) بس دي بقى حطيت عليها جبنه موزاريلا فرش .
وخبزتها في الفرن لحد ما استوت والجبنه ساحت بصو على الجمال
وهنا صوره قريبة جدا جدا جميلة جدا ولذيذة بشكل .
نمرة خمسة بقى خاص وسري للغاية ليا ^_^ فطيرة الشوكلاتة
بعد ما فردت العجينة للبتيزا الصغيرة فاضت حتت عجينة صغيرة قلت لا بقى دي ليا حدلع نفسي بيها وححشيها بحبي قلبي (الشوكولاتة) . هنا بعد ما حطيت الشوكولاتة وقبل ما أقفلها كلها
هنا بقت سمبوسك بس XLL شوية ^_^
وهنا حبيبة قلبي بعد ما اتخبزت بصو الجمال يا ناس
وده شكلها من تحت مش مترتبه علشان عملتها بسرعة
لا بقى هنا اول ما قطعتها قلت أخد صوره لزوم الغيز قصدي التجويع بصو هشة زي القطن ازاي
وهنا اكلتها ولسه كنت حاكل أخر حته قلت لازم تشوفو شكل الشوكلاتة السايحة الفضيعه . بصراحة الفطاير كانت هشة ولما بناكلها بتتبلع لوحدها كده من غير عصير ههههه
الحمد الله خلصنا وده شكل الطبق بعد ما ظبطت الدنيا للتقديم .
ودي صورة مقربة للطبق لزوم التجويع
منقول
فين التقييم؟
تقبلي مروري
