يامسندي قلبي على الدوم يطريك
ما غبت عني وطيفك سمايه
هذي ثلاث سنين والعين تبجيك
ماشفت زولك زاير ياظنايه
تذكر حياتي يوم اشيلك واداريك؟
والاعبك دايم تمشي ورايه
ترقد على صوتي وحظني يدفيك
ماغيرك احدن ساكن(ن) في حشايه
وليا مرضت اسهر بقربك واداريك
ما اذوق طعم النوم صبحي ومسايه
ياماعطيتك من حناني وابي اعطيك
تكبر وتكبر بالامل يامنايه
لكن خساره بعتني اليوم وش فيك
واخلصت للزوجه وانا لي شقايه
انا ادري انها قاسيه ماتخليك
قالت عجوزك ما ابيها معايه
وخليتني وسط المصحه وانا ارجيك
هذا جزا المعروف وهذا جزايه؟
ياليتني خدامة(ن) بين اياديك
مشان اشوفك كل يوم برضايه
مشكور يوليدي وتشكر مساعيك
وادعي لك الله دايمن بالهدايه
حمدان ياحمدان امك توصيك
اخاف من تلحق تشوف الوصايه
اوصيت دكتور المصحه بيعطيك
رسالتي وحروفها من بتايه
وان مت لاتبخل عليه بدعاويك
واطلب لي الغفران وهذا رجايه
وانطر تراب القبر بدموع عينيك
ماعاد ينفعك الندم والنعايه
نورتي
