كنافة النابلسية جديدة

اولا نجيب الجبنه ولازم تكون مالحه انا جربت الغير مملحه و لما بتتعمل بتبقي ناشفه مبتسيحش بين الكنافه
المهم بنجيب الجبنه و نقطعها قطع صغيرة و ننقعها في ميه لمدة 6 ساعات نغير الميه حوالي مرتين تلاته لحد ما نحس ان الملح كله تقريبا نزل و بعدين نصفيها كويس قوي بالمصفاه و بعدين بمناديل او فوطه نضيفه
نجيب الكنافه و هي لسه مجمدة و نفركها كويس و نجيب السمنه و نحط علي السمنه اللون البرتقالي و نمزجهم كويس لحد ماللون يمتزج كويس فيها و نضيفهم للكنافه و ندعكهم كويس لحد مالكنافه تتشرب السمنه و يتوزع اللون كويس عليها و بعدين نضيف شويه شربات من الي عملناه و نمزجه كويس و نفرد تلتين الكنافه في صينيه كبيرة 30 سم و نضغط عليها كويس قوي و نفردها شويه علي الجوانب عشان لما الجبنه تتحط متتطلعش من الجوانب و نحط كميه الجبنه العكاوي و الموتزاريلا بعد ما تتصفي كويس من الميه علي الكنافه و زيادة في الاطمئنان نحط عليها منديل و نضغط عليها عشان لو لسه فيها ميه عشان الميه مبتخليش الجبنه تلزق في الكنافه و بعدين نحط باقي الكنافه و نضغط كويس و ندخلها فرن عالي 190 نص ساعه و نطفي الفرن و ننزلها تحت و نفتح الشوايه تحمر من فوق شويه و لما تطلع نحط الشربات البارد و بعدين نقلبها في صينيه التقديم و تتزين بالفستق الحلبي المفروم و تتقدم ساخنه و بالهنا و الشفا 🙂