ماتصنعت المشاعر

ابتسم ساعة اشوفك وانسى ايام الشجون…
واتخذ لاجلك مساحة في مواعيد الزحام…

لا تلاقينا وشفتك قاسي الغربة يهون…
والفرح يسري بدمي ويخترق صلب العظام…

وان تفارقنا دقيقة مالت اوراق الغصون…
والدقيقة في عيوني شفتها الفين عام…

الغياب ياهو غيابك صب لي كاس المنون…
اشربه ظلم وتجني وارتويبه بانصدام…

الغلا ماهو حكاية تعتبر ضمن الفنون…
الغلا عشته بقلبك ياقمر وسط الظلام…

لو درى بصادق غرامي .. الغدر حرم يخون…
ولو يعيشه كل مذنب التزم بعد الحرام…

والبلابل لو تحسه زادت انغام اللحون…
وبه تغنت واهتفت به وغارت اسراب الحمام…