يابكريه لاتخافي من الولاده تعالي احكي لك

بس قالت الدكتوره لاتمشين اكثر من ساعه متواصله

احيان امشي10دقايق وارتاح احيان ربع ساعه يعني باللي أقدر عليه

وقالت لي بعد امشي من تدخلين السابع .. بس استشيري دكتورتك قبل

لأن هي أدرى بوضعك وحالة الجنين

وبخصوص ان المشي مايسرع الولاده مو صحيح

نكمل سوآآلف ياحبيباتي الحوامل البكريات والحوامل للمرات الثانيه والثالثه والعاشره^_^

ولدتي والحمدلله شفتي النونو بخير وعافيه

الحين الدكتوره بتسوي مساج لبطنك عشان تطلع المشيميه وال و و و .. يعني البواقي الله يعزكم ويكرمكم

وترتاحين شوي.. بعدين دور الخياطه عشان التوسعه وانتي طبعاً مخدره من قبل

وهنا في شي بيرفعون رجلك عليه تصير زي شكل ثمانيه عشان يخيطون صح

بس وقت الولاده انتي ترفعينها شكل ثمانيه
راح يعطونك قبل الخياطه تخدير مره ثانيه ويخيطون .. طبعاً بتقول لك الدكتوره لازم تتشطفين بمويه دافيه وملح الايام القادمه

الحين أحلى وأجمل اللحظآآت ..

تنزلين من على السرير وتقعدين على كرسي متحرك ويحطون طفلك عليك وينزلونك على غرفتك وترتاحين

تحسين قسمن بالله انك اكشخ وحده وانتي تمشين طالعه من قسم الولاده وطفلك بين يدك

احساس غير ورب البيت

تحسين انك شايله ألماس وذهب بين يدك

ودك تقولين لكل اللي تشوفينهم ياناس ترى هذا طفلي

يعني احساس مستحيل اووصفه

للحديث بقية

نرجع ونكمل حبيباتي..

ولدتي ونزلتي تحت .. بياخذون طفلك يروشونه ويجيبونه لك ..

بتقول لك الدكتوره بعد ماتروحين غرفتك بعد الولاده ادخلي الحمام عشان تفرغين المثانه

طبعاً لاتخافين بينزل عليك دم كثير أثناء دخولك الحمام شي طبيعي لأن هذي بقايا

طبعاً هم بيشيكون عليك هل كمية الدم زايده عن المعقول عشان يتأكدون انه مو نزيف

طبعاً الايام الأول الدم بيكون كثير شي طبيعي وعادي جداً ..

وبعد اسبوع والا اسبوعين تبدى تقل كمية الدم

وشي ثاني كمان ياحبيباتي مهم مرره مرره

جهزي شنطتك قبل توليدين بفتره كافيه

حطي فيها

ملابس لك(داخليه وخارجيه ،فوط مابعد الولاده ،حفاظات للصدر عشان اذا نزل حليب ماتنحاس ملابسك،أدوات النظافه شامبو وصابون فرشه معجون مشط ..الخ)

ومرهم اسمه (ريالوكين) ركزي على كلمة مرهم لأن فيه من جل وبخاخ خذي الكريم أنتي

وأدهني الفوطه قبل تلبسينها تخدرك عشان ألم الخياطه بعد مايروح تأثير البنج..

خذي لك 3 والا 4 علب مرهم عشان مايخلص عليك

كل ماغيرتي الفوطه حطي فيه من المرهم

عشان يخدرك ويخف الألم عليك

وكمان لاتجلسين أبد خليك منسدحه والا منسدحه ورافعه ظهرك شوي

وامشي امشي امشي .. بس مو بعد الولاده على طول بعدها بساعات

امشي بغرفتك و بشويش مرره لاتسرعين بس عشان يتحرك الدم بجسمك

وهالشي زين للخياطه

يكفي تمشين 5دقايق والا اقل باللي تقدرين عليه

طبعاً بين فتره وفتره بيقيسون حرارتك وضغطتك عشان يتطمنون عليك

وبيسألونك الطفل تبرز وإلا لا<=يتأكدون إن اعضاءه شغاله ..

وبيسألونك نفس السؤال عشان يتأكدون ان وضعك تمام

بيجي دكتور والا دكتوره بيشيكون على سلامة طفلك ..

كل شي تمام يومين تقريباً تنزلين على البيت ^_^

ولدتي بالسلامه .. صار عندك نونو زي العسل ربي يخليه لك يارب ..

في بنات ماشاء الله على طول ينزل حليب منها وبنات لا ..

طيب كيف ..؟ وليه مانزل حليب؟؟؟

أول شي لازم تحاولين ترضعين طفلك حتى لو مافي حليب

وانت ساعديه يرضع

في البدايه مابينزل حليب معاه ..

لكن مع التكرار سبحان الله ينزل

وياهلا وغلا فيكم حبايبي الحوآمل .

همسه أحب أهمس فيها بإذن كل حامل وخصوصاً البكريات ..

خلال فترات حملك راح تسمعين الكثير من القيل والقال واللي بعضها ممكن يوتر لك اعصابك ..
ومنها على سبيل المثال

@ يالله .. وش ذا؟ بطنك صغير؟؟

@ ما انصحك بإبرة الظهر ترى تجيب الشل .. <= والحقيقه انه ليس لها علاقه بالشل لأني قبل ماأولد بحثت بالموضوع كثير ومالقيت اللي يثبت ذلك غير بربرة وهذرة الحريم

@ الله يعينك لو انا مكانك أولد قيصري

@اشربي قرفه كثير

@فلانه ولدت وانتي لسى؟

@ كل شوي يسألونك أنتي في اي شهر ومتى بتولدين؟

وغيره هالأمور والبربره كثير اللي توتر الحامل وهي خلقه مو ناقصه توتر

شوفي حبيبتي .. بقول لك شي ..

حطي اذن من طين واذن من عجين ودخلي من هالاذن وطلعي من الثانيه

ترى الحريم مو سوى وفيه ناس تبالغ بالحكي خصوصاً بسالفة الولاده

يعني بالله عليكم لو هم صادقين ليه الوحده تحمل مره واثنين وثلاثه؟؟؟؟؟؟

انا ماأقول بتولدين وانتي تضحكين . بس ترى في ناس تبالغ مرره

اتكلي على ربك ..واستانسي تراك بتصرين ام

ونكمل سوآلفنآآ .. ويالله جيبوا القهوه يابنات

قصدي حليب أحسن لكم يالحوامل هههههههههه

المهم ياحواملنا عموماً والبكريات خصوصاً ..

حبيت أقول لك ان الحريم مو سوى ..

وأعراض الولاده مو شرط تجيك بنفس الترتيب اللي جا غيرك ..

ممكن الطلق (المغص) أول الاعراض ..

ممكن المويه قبل ..

عاد الناس تختلف ..

لكن بقول لك 3 أشياء اذا شفتيها اتكلي على الله و روحي المستشفى ..

1/إفرازات مهبلية مخاطية ممزوجة بخيوط دم رفيعة تخرج من عنق الرحم(المقصود السداده يعني)

طبعاً ممكن تشوفينها قبل الولاده بأيام أو ساعات و دقائق على ماقريت وبحثت

بس أنا شفتها العصر اليوم الثاني الصبح ولدت

2/يبدى الطلق(يعني المغص) المتواصل يعني يجيك ويروح والفاصل بين كل طلق وطلق متقارب

بالدقايق يعني .. بس انتي بمجرد ماتحسين المغص غير عن المعتاد يعني شاد عليك روحي

3/ مويه تنزل عليك .. وهذا اهم شي انك تنطلقين للمستشفى عشان ماتنقص المويه على الجنين ..

ومعلومه سبحان الله يابنات المويه تساعد على دفع الجنين للخارج

~ ونكمل سوالفنآآ ..

حبيبتي .. اذا صرتي بتروحين تولدين مايحتاج كل خلق الله يدرون ..

يكفي زوجك وامك اذا حبيتها تجي معك

لأن سبحان الله كثير لاحظت هالشي .. اللي تتكلم يبرد الطلق عندها

فيه وحده من قريباتي خلاص دخلت غرفة الولاده على اساس بتولد والرحم فاتح ..

بس سبحان الله قفل وماولدت إلا قيصري ..

طبعاً الخبر وصل للشرقيه وهي بالرياض ..

غير انها كانت تشرب قرفه ..

وطبعاً الاتصالات ماوقفت عليها هي وزوجها

ويمكن كل السببين مالها علاقه بهالشي ..

وبغض النظر عنها .. الاتصالات توتر الوحده وهي مو ناقصه

أنا يابنات تخيلوا طلعت من البيت وأخواتي مادروا اني محركه على المستشفى قلت بروح بيتي

ماعدا اختي الكبيره المتزوجه وامي وابوي عشان اختي الكبيره نامت عند اخواني الصغار وامي جت معي .. وزوجي طبعاً

والحمدلله ربي يسر لي ياربي لك الحمد ..

ف أنتي وصي على زوجك لاصرتي رايحه مايحتاج يعلم احد لأنكم مو ناقصين قلق وتوتر ..

لأن مكالمات العالم وكلامهم يوتر خصوصا اذا قعدوا يدقون كل شوي عليكم

هاه ولدت ..؟ تقولون لاباقي

وعلى هالموال ..

ف ريحي بالك وعمرك .. واذا ولدتي ترى النونو مابيطير ..

علميهم اذا ربي يسر لك ولدتي بالسلامه

حبيبآآآآتي الحوآمل ..

من المهم بهالفتره انك تهتمين بخياطتك عشان تطلع تمام ان شاء الله ..

اولاً / تحركي بشويش مرره لاتسوين حركات مفاجأه زي تقومين بسرعه تنسدحين سرعه

يعني على أقل من مهلك .. وكمان لا تجلسين بهالفتره ابد

خليك منسدحه او منسدحه ورافعه ظهرك شوي

او منسدحه على جنبك

وامشي كمان بس بخطوات خفيفه ومتقاربه

ثانياً/ انتبهي لا تستخدمين الرشاش عشان تتشطفين لأن دفعه قوي وممكن يضر بخياطتك

استخدمي الابريق وتكون المويه دافيه

ثالثاً / تشطفي بمويه وملح

رابعاً / احرصي انك تنشفين المنطقه زين وادهني الفوطه بالمرهم (انا استخدمت مرهم ريالوكين)

هذا اللي انا سويته والحمدلله احس اني تمام