الوسم: الزين

–

______________________

م/ن

قالت ترى منت بحلو قلت رجال
والزين ماهو من شروط الرجوله

الزين يلقى عند لباسة الشال
والرجل زين ان كان زانت فعوله

قالت علامك تلبس شماغ وعقال
انت بدوي؟ قلت بدوي ومن حموله

ما ألبس بناطيل لها الوان واشكال
وامتر ال بعرضه وطوله

قالت اجل راعي معاميل ودلال
شرب القهاوي تحسبونه بطوله

كيفي يابنت الحضر دله وفنجال
وحليب خلفه بالمراح معقوله

وحب الكرم والجود وعلوم الابطال
مغروس فينا من زمان الطفوله

قالت ترى بنت البدو حظها مال
قلت احذري حذرا تكوني جهوله

بنت البدو يابنت مضرب للامثل
فوق الجمال وطاعة الله خجوله

ماحطة اصباغ ولا حطت ظلال
ولا سيرة بالسوق سير مهبوله

هي مهرة تصعب على كل خيال
وانتي ومثلك عسفهن بالسهوله

قالت تغزل بي وشف حبة الخال
ناظر عيوني والرموش الكسوله

قلت العفو مايجتمع حب وهبال
ولكل ذوق فالمزاين جوله

قلتي وقلت وكلمة الصدق تنقال
الزين ماهو من شروط الرجوله