هلا صبايا كيفكم ؟؟
موضوع اليوم والله ……… ما ادري انتي قولي رايك فيه بس نصيحه اقري للآخر ملاحظه ثانيه هذي ردود بعض الناس الي وصلتهم الرساله من الاميره مباشره على ما اظن ..
معليش طولت عليكم بس حبيت اذكركم اقرو للآخر
رسالة الأميرة ريما آل سعود حول سيول الرياض والردود عليها
الى كل من يتهزا بالمملكة يأسفني بأنكم أشخاص تنتمون "لوطن" و التهزي بلدكم الي شبعتوا من خيرها يدل على قل الوفاء و الولاء. بالاضافة ان معظم دول العالم تأخذ من مواطنينها ضرائب على كل الخدمات الي توفرها الحكومة لهم و مع ذلك انتم عايشين فوطن ما تدفعونلها ولا ريال على الأشياء الي قعد توفرها لكم من خدمات عامة!!!! و لسه مو عاجبكم؟! و الانسان إذا ما فيه خير لوطنه ما فيه خير لا لأهله ولا لنفسه!! حتى دراستكم بلاش و الجامعة تعطيكم مكافآت! الدول الثانية.. الطالب يشتغل أربعة اشغال عشان يوفر تكاليف الدراسة ومع ذلك لانتوا نافعين لا أنفسكم ولا وطنكم و الدليل على تصرفاتكم الجاهلة و تضيع وقتكم بكتابة مسجات ما قعد تهينون إلا أنفسكم فيها. و كل مصيبة تحطونها على عاتق الملك و الحكومة!!! و الواحد لو يبي ينقد، ينقد نقد هادف ما يتسخر! افزعوا.. أخدموا.. صارعوا بدل ما أنتوا جالسين فبيوتكم تتشكون و تتذمرون من بناء بلدكم الي أصلا ما ساهمتوا بتعميرها لا ماليا ولا يدويا!! و انتوا قعد تتذمرون على التبرعات.. ما تدرون ان هذا الشي طالع بأسم الشعب السعودي؟؟ ((( إذا كان بيتك من قزاز لا ترمي الناس بحجر)))…. و الي على راسه بطحة يحس عليها!
——————————————————————————–
الردودالسلام عليكم ياطويله العمر أتمنى توصل رسالتي لك بأسرع وقت . طبعا ماراح أتكلم عن الموضوع الى تطرق له سموك الكريم . لكن عتبي الشديد على مدرسه الإملاء الى درستك حسبي الله عليها درستك بدون ذمه . حبيت أصح لك بعض الكلمات لأن بعض الشعب طال عمرك مايعرفون الكلام الكشخه
مواطنينها « مواطنيها
فوطن « في وطن
تدفعونلها « تدفعون لها
قعد « قاعده
لانتوا « لا انتم برايفت .. لانتوا طال عمرك ساندوتش جديد بمطعم كودو مالها أي اختصاص بموضوعك .بس شكل سموك جوعان
قعد تهينون «لا يمكن عرض الصفحه
يتسخر! « !وش ذي طال عمرك ؟ على العموم لو كانت سبه مسموحه
بلدكم الي أصلا ما ساهمتوا بتعميرها لا ماليا ولا يدويا!! « وهي صادزه
افزعوا.. أخدموا.. صارعوا بدل ما أنتوا جالسين فبيوتكم « الله يهديك طال عمرك وش تبينا نسوي نروح نفك الازفلت ونشره طال عمرك ؟ شكل سموك ماقد افطر لوزين وليز وبيبسي حار
تقبلى مروري طال عمرك :
م-ب-ج « مواطن على بند الأجور
——————————————————————————–
رد آخر
لما تعيشين في بيت شعبي وبيتك وسيارتك (إذا فيه سياره)غرقانين تعرفين ليش الناس تتشكى
مدام يؤسفك اننا نتمي لهذا الوطن
فاعيشي فيه بلحالك .. وبنخليك تغرقين فيه بلحالك ولا راح أحد ينقذك لأن كل الدفاع المدني مواطنين
وأول من بيسافر ويخلي ديرته أنتي وأشكالك .. قويم بالله
أما بالنسبه للضرائب .. هو يعني إنتي طال عمرك ما شفتي الا الدول إلي تاخذ ضرائب وما ذكرتي الدول إلي تقدم الخدمات للمواطن مجانا مثل الكهرباء والماء والهاتف الثابت .. لكن راضين أنو ندفع رسوم وأنتي ماتدفعين عشان إذا جاء الصيف تقدمين على الديوان ويعطونك مبلغ تسافرين فيه إنتي وأهلك جعلكم ماترجعون وحنا بنقعد بالبلد نشجع السياحة الداخلية ونساعد على التقليل من هجرة الأموال خارج البلد لأن البلا منا وحنا عيال *** مانستحق نعيش في هذا البلد حنا إلي دمرنا البنيه التحتيه من كثر ما نقعد فيه وأنتو مالكم دخل لأنكم طول الوقت مسافرين برا
أنا أقول الله يأخذنا أخذت عزيز مقتدر
عشان مانجرحك بنقدنا إلي مو بناء حسب رأيك طال عمرك
وتعقيبا على البلد إلي ما ساهمنا في بنائه لاماليا ولا يدويا ..
من إلي يطلع لك البترول من بطن الأرض مو مواطنين من أرامكو ..
ومن الي تبينه يبني الوطن يدويا هههههههه اختنا في الله متأثره بالتركيبه حقت البزارين
أقول بس حدث الجاهل بما لا يعقل
وعلى قولت إلي رد قبلي شكلك تفتقرين للتعليم الجيد ويتجلى ذلك بأسلوبك في التعبير عن رأيك
وعلى شحم بس
——————————————————————————–
"ردآ على الأميرة :"هل تصدقين قصة "عزوز و الأربعين حرامي
اتحفتينا بمقالتك الي كاتبتها وأنتي توك صاحيه من النوم لأنه طبعا حضرتك لا دوام ولا شغله ولا مشغله ولا يمكن دراسه زي الناس وهالشي باين من الاغلاط الإملائية الي تفقع المخ بمقالتك الي مثل خشتك،
طبعا ما عليك شرهه تقولين هالحكي وتمدحين مدح أعمى ما أنزل الله به من سلطان لأن حضرتك من يوم ما أنولدتي على هالدنيا تم فتح حساب باسمك ينزل فيه مرتب شهري بس لأنك أميره وياحيف لو كان كل الأميرات مثلك لا يتعدى تفكيرهم طرف خشومهم المعوجه بسبب كثرة عمليات التجميل في بيروت وباريس وعلى حساب الديوان الملكي طبعا
أما بالنسبه لكلامك انكم بنيتوا البلد أقولك كيف الحال؟
عسى ما تعبتي وأنتي شايله الاسمنت على ظهرك وتبنين؟
ولا يكون بانيتها لحالك؟ وبعدين من زين البنيان انتي وخشتك يوم انك تتميلحن وتكشخين فيه ؟
أي بنيان بالظبط ؟ بنيان جامعة نوره الي طاح سقفها ولا بنيان الانفاق الي طاحت فوق خلق الله ؟ ولا بنيان جامعه سعود الي مستاجرينه من عمكم طلال الي زرف الماليه وخلاها صفر ؟
وبعدين لا يكون تحسبين نجد والجزيره كلها حقتكم ؟ وش نظام البزران الي انتي عايشه فيه هذا حقتنا حقتنا ؟ لا يكون الملك عبدالعزيز وحدها لحاله وحنا ما ندري؟ ولا مصدقه سالفة عزوز والأربعين حرامي الي بكتاب التاريخ؟
ومتميلحه بالتعليم واننا ما ندفع فلوس من زين الجامعات حقتك الي ما تفوقت إلا على الصومال يوم انك تذلين العالم فيها ؟ وبعدين الله من زين الجامعات الي ما يجيب فيها معدل خمسه من خمسه إلا عزوز ولد فهد و نواف بنت فيصل،
وبعدين المليار حق البحرين باسمنا ؟
طيب مو مشكله هالمليار الي راح بالبحرين خليه يروح باسمنا بس المليارات الثانيه الي بحساباتكم بدون وجه حق مع انه فيه عالم ميته من الجوع ومو لاقيه تسكن ولا تتعالج رايحه لكم بعد باسمنا بعد؟
ما أقول إلا ياشين السرج على البقر يالهطفه
وأقول أصرف لك كلمي الديوان يحطون لك مليون بحسابك عشان تروحين باريس لأن الرد هذا لعب بنفسيتك وتبين تريحين أعصابك على حساب الدوله أما المواطنين الي يموتون كل يوم لأنه ما لقوا أكل ولا علاج ولا تعليم ولا سكن ما عليك منهم فيه رب فوقهم وفوقكم رافعين أيدينهم له ويدعون على أشكالك من ال سعود إلا من رحم ربي منهم ولأسف انهم قليل جدا أما البقيه كلهم مثلك ومثل تفكيرك حق البزران. يالله أنقلعي طال عمرك
[/IMG]
