طبعا أكيد بتسألي مين دول اللى ممكن تكوني منهم … صح ؟
– صح
– اقول لِك ….. دول بقى يا ستي 10 مليون مصاب بالالتهاب الكبدى الوبائى تسمعي عنه ؟
-آه أسمع بس بصراحة معرفش عنه كتير ايه هو بقى ؟
– بصي يا ستي
-بصيت
– التهاب الكبد ده مرض بيصيب كبد الإنسان نتيجة الإصابة بالفيروس وانتي عارفة الكبد ده مهم بالنسبة لنا قد ايه
– آه طيب أنا سمعت انهم كذا فيروس
– فعلا هم 7 فيروسات A,b,c,d,e,f,g
– بس أن مسمعتش غير عن A,b,c
– ما هى الانواع دى هى اللى منتشرة
– طيب وده خطر يعنى ؟
– طبعا ده ممكن يأدى لتليف الكبد وبالتالى الكبد مش هيقوم بوظايفه ربنا يعافيكي ويعافينا
– طيب وهى وظايف الكبد دى مهمة ؟
– طبعا مهمة جدا الكبد ده أكبر مصنع فى جسم الإنسان له حوالى 300 وظيفة ومن غير الكبد حياة الإنسان بتنتهى
شوفي انتي بقى لما جسمِك يفقد 300 وظيفة كان عضو واحد بيأديهم
-طيب انا فى ايدي ايه يعنى ؟
– سهلة كل الموضوع انٍك تعملي احتياطِك وتتوكلي على الله
– طيب اعمل ايه يعنى؟
– جينا للمهم
بكل بساطة تغسلي ايدِك كويس قبل الاكل وتشرب مية نقية وطبعا بلاش الاكل وكدة انتي فى المضمون وفيروس A عمره ما هيجي لِك
– طيب وباقى الفيروسات ؟
– بصي B و C بيتنقلوا عن طريق الدم لكن برده سهلة
فيروس B تاخدي التطعيم بتاعه وتتجنبي تلامس اى دم وكمان طبعا مينفعش تستخدمي الأدوات الشخصية لغيرٍِك وأى حاجة ممكن توصل لدمِك لازم تتأكدي من سلامتها
– زي ايه يعنى ؟
-زي المانيكير والباديكير وفرش الاسنان والحقن والدبابيس وأمواس الحلاقة للرجال..
-طيب هو مفيش تطعيم لفيروس C ؟
– للأسف مفيش فلازم تاخدي بالِك وتحافظي على نفسِك
ومفيش قدامِك اختيار لان دى سلامة جسمِك
وجسمِك أمانه هتتحاسبي عليها
نحن في انتظار استفساراتكن
المنتدى الصحى بالإسكندرية
