الوسم: الابواب

منقول للفائدة

يا حظ لوّ ماكنت عثره .. في طريق المستجير ؟
………………………. ما والله اقنع بـ النجوم ! ولا بما دون السحاب ,

( كبير ) لكن الوقت : ماميّز بين كبير ولا صغير
………………………. وعظيم ! لكن الدهر : ماعزّ ( ذربين الجناب )

اهلّ من غبه قصيدي ( عقد لولو ) .. وفير !
………………………. وأصنع من الفاظي ( حلي ) تغيري طويلات الرقاب

أصوغ من فكري ( ذهب ) واحيك من جرحي حرير
………………………. وأشعل من إحساسي ( وهج ) واسكب من خموري شراب

غني قلم .. ندي عطا .. مروي ظما .. نافخ عبير !

سئمت من ( رتم الحياه ) وصرت لـ أحلامي أسير !
………………………. ومليت من .. ( تخاذل اقرابي ) .. وحبيت الغياب

أثر محاتاه المصير ؟ تزوّد غموض المصير !
………………………. واللي ( تأمل ) في أكتئابه ؟ لا صحى زاد اكتئاب

( طاح البعير ) ! ومكثر الطعنات لا طاح البعير
………………………. ورآح الزهاب .. ومكبر الحسرات لا راح الزهاب

ما يظهر الرجل الكبير .. الا اذا جا اليوم الكبير
………………………. ولا يبيّن في الصعاب ؟ الا من اعتاد الصعاب

لوّ معي ( مخيّله هوغو ) و ( نظره فولوتير ) ؟
………………………. يكفي معي : ( سحر البيان ) وعندي فنون الخطاب

ومدام معي سيف ( خالد ) ! بنطح الجمع الغفير
………………………. وماعاد لي بك لـزم في مغزاي ! يا شلفا ذياب ,

في نظرتي ان : اطيب الاوقات ( خلوه مع ضمير )
………………………. ييصفي بها الذهن المدي , ويشفي بها القلب المصاب

وانادم أقوامٍ في نجوى الكتب .. والذكر اليسير !
………………………. ماغابت الا اشخاصهم عني ! وطاري الهم ما غاب

من لا يجود بما يجود به الزمان ؟ ولا يجير ؟
………………………. محروم .. لوّ يملك ( كنوز الارض ) وكنوزه تراب

ما اقدر احب انسان كان بيوم ! للعالم ( حصير )
………………………. عودٍ عليه ( الما ) ماهو ينفع يكون لـ ( إحتطاب )

رغم احتياجي لـ ( الحنان الجم ) والعطف الغزير ؟
………………………. لازلت اشعر : بـ لذّه الاحساس حتى في العذاب

رغم انكساري !! من ظروف الوقت والحال المرير ؟
………………………. لازلت واثق !! وألمح ( الاحلام ) حتى في السراب

رغم إبتعادي عن ( جميع البيض ) و الوصف المثير ؟
………………………. لا زلت متذوق ! .. وأعرف الحسن من خلف النقاب !!

رغم إعتزالي ( ساحه الشعر ) و ( مساحات الاثير ) ؟
………………………. لا زال فيني : ألف معنى .. ماتضمّن في ( كتاب ) !

في خاطري ! اشياء كثيره .. واملك الشي الكثير
………………………. لكن : فاقد حاجه أكثر ! بينها وبيني ( حجاب )

ماهو لزوم إني ( جميل ) ؟ اهم شي اني بصير !
………………………. لنّ ( الجمال بلا نظر ) ! مثل ( السؤال بلا جواب )

واذا قدرت ؟ افهم الغاويين .. وش معنى الغرير ؟
………………………. بالله .. كيف أفهم المخطين ؟ وش معنى الصواب

من لا يعرف معنى ( الوفا ) مايقدر يحبّ بـ ضمير !
………………………. ومن لا رقى ( فوق الجبل ) ؟ مايقدر يشوف الهضاب

ظنّي كبير .. ومؤمن بربّي .. و ( متفائل بخير ) !
………………………. وان خاب ظني في البحر ؟ ماخاب ظني في السحاب

يا ( زهره الروض الحزينه ) لاتحاتين الهجير !
………………………. ( فراشه الحقل ) إهتدت صوبك .. وضيّعها الضباب

الجرح الاول طاب ! بس الموت ( بالجرح الاخير ) ؟
………………………. ما يندمل .. لوّ خاطري ؟ من كل مايبغيه ( طاب ) !

ماني بـ محتاج لـ ( رغد دنيا ) ولا ( مجدٍ نظير ) !
………………………. ( محتاج لي إنسان ) يفهم .. بـ هدوء .. وإنسياب

زرعت لـجل أكون بـ ( الفيّ ) وتحمّلت السعير !
………………………. الغصن غصني ! .. والثمر غيري خذاه بلا حساب

وشلون بلقى لي ( وطن ) ؟ وبداخلي ( منفى كبير ) !
………………………. وشلون ببني بيت لـ ( آمالي ) .. وبعماقي ( خرااااب ) ؟

ماهو أليم ( إحساسي بغربه ) ؟ ولا حولي ( عشير ) ؟
………………………. بس الاليم ! انّي ( مع احبابي ) وعايش ( بإغتراب ) !!!