عجينة الحواوشى :
نصف كيلو دقيق يعنى تقريبا 3 كوبايات ونصف
1/2 كوب صغير زيت
1 كوب زبادى كبير
رشة ملح
1م ص سكر
1 م ك خميرة
1 م ك بيكينج بودر
ربع كوب ماء دافىء
2 ملعقة كبيرة لبن بودرة ولو مفيش يبقى ربع كوب لبن
الطريقة :
تذاب الخميرة فى ربع كوب الماؤ الدافىء مع معلقة السكر الصغيرة وتغطى فى مكان دافىء لمدة 10 دقايق او لحد ماتعلى خالص وتفور
نعجن باقى المقادير مع بعض ولما الخميرة تتخمر نضيفها ونعجن كويس اوى لمدة لاتقل عن 10 دقايق هتلاقى العجينة بقت ملساء خالص ولينة ومابتلزقش فى ايدك ولا فى الوعاء
نغطيها ونتركها فى مكان دافىء تخمر لمدة ساعة
بعد الساعة نطلعها ونرش دقيق على الرخامة ونبدأ ناخد منها كور زى اللى فى الصورة وبعدين كل كورة نفردها كويس اوى دايرة كبيرة مش سميكة ونحط عليها الحشو كمية كويسة ونقفل عليها بكورة تانية بعد مانفردها كويس اوى ونعملها زى الاشكال اما قرص كبير او ممكن افرد كورة واحدة واحط على نصها الحشو واقفل عليه بالنص التانى ويبقى نص دايرة
رصى الارغفة فى صاج مدهون خفيف زيت او مفروش ورق زبدة واقفلى الاطراف كويس اوى اما بالشوكة او بثنيها والضغط عليها زى مانا عاملة وادهنى الوش زى ماتحبى بيضة مع شوية لبن وفلفل اسود او لبن بس زى منا بعمل برضه او بياض بيض
ورشى عليها سمسم وحبة البركة انا بموت فيها ولو مش عايزة ترشى حاجة براحتك
ودخليها فرن مسخن على 200 لمدة ربع ساعة تقريبا او لحد مالجوانب والقاع السفلى للارغفة يحمر نزليها تحت على ارضية الفرن ولعى الشواية تتحمر بهدوء من فوق
——————
نيجى للحشو :
لحمة مفرومة + طماطماية مقطعة مكعبات ومتخافيش مش هتعجن ولا تنزل مية + بصلاية مفرومة + فصين ثوم مفرومين + خضرة بقدونس وكسبرة حسب الرغبة + ملعقة طحينة كبيرة ودى سر الطعم + ملعقة سمنة لو اللحمة مفيهاش دهون ولو فيها يبقى معلقة زيت + ملح وفلفل اسود وكسبرة ناشفة مطحونة وجنزبيل بودر وبهارات لحمة
وتعجنى الخلطة كلها يدويا وتحشى بيها الارغفة وهى نية ومتخافيش مش هتاخد وقت فى السواء خالص
——————-
وبس كده خلاص خلص الحواوشى ..
