بعض كلمات اللغه الانجليزيه في بيت شعر ليسهل فهمها

سيدي هذا احتفال أم ياتراها ملحمه
ودي أعبر وأصف كل المشاهد ملهمه

والصور تسمو على شعري وتأبى الترجمه
الجموع ألفت على شانك ولاهي مرغمه

وتبنى باسم ابومتعب وترقب مقدمه
يحتفي بك كل طفلٍ يرفع اسمك معصمه

يحتفي بك كل شبلٍ شد باسمك محزمه
يحتفي بك كل شيخٍ نال باسمك مكرمه

يحتفي بك كل قلبٍ فيه نبض وتمتمه
باسم عبدالله هتفنا والولاء فينا سمه

ان وقف ناقف معه صفٍ يرد المظلمه
وان مضى نمضي معه ونلم مجدٍ لملمه

وان خدم مكة وطيبة نخدم الي يخدمه
وان بنى صرحٍ بنينا مابنى ونتممه

وان هدم وكر الخيانة نهدم الي يهدمه
ثم نهتف باسم سلطان الكرم ونكرمه

ساعدك الأيمن متى ضاقت فرجها مبسمه
الوفاء من طبعنا وأنا أشهد انكم منجمه

يسأل الطالب يقول المجد أبرقى سلمه
ارسم الدرب السوي وأنا أتبع ماترسمه

قلت له هذا الوطن غالي وربي عظمه
يتجه له كل مسلم يابني ومسلمه

انتبه من كل شيطانٍ يخونه وارجمه
واشكر الله ع النعم ويزيدك الله أنعمه

ديننا دينٍ عظيم دين عدل ومرحمه
مايحارب دينا الا جاهلٍ مايفهمه

قلبك أبيض واحترس تتبع قلوبٍ مظلمه
ربما المنهج سوي والعيب فيمن علَّمه

من يبيع الشهد يمكن داس بينه علقمه
من يبيع السمسم احذر يافتى من سمسمه

ربما السمسم بري والي يبيعه سممه
قلت له هذا الوطن مثل الحكم والمحمكمه

ان خدمته فاشهد ان كل المواسم موسمه
وان شكيت الدهر يدمل جرح قلبك مرهمه

كن سعودي والسعودي منهجه مايقسمه
السعودي ماتغير في زمان العولمه

السعودي ناظره ويفز قبل ان تزهمه
السعودي لي نخيته فز مايسأل لمه

السعودي مايهمه الهيلما والهمهمه
السعودي مايهاب اليل ويعد أنجمه

السعودي تنطق أفعاله ولايكذب فمه
السعودي في الشدايد مايغطي الجمجمه

بل يقف مثل الجبل وان جاء عدوٍ دمدمه
السعودي الطفل محدٍ من بلاده يفطمه

والسعودي الشبل محدٍ في الشدايد يهزمه
والسعودي الشيخ كلٍ يستقي من معجمه

السعودي الحي ذخره حد سيفه وأسهمه
والسعودي لي رحل ندعو عسى الله يرحمه