ربعيات صلاح جاهين الجزء الاول

كتب ربعيات اشتهر بها وسوف اقوم بعرضها على اجزاء

خرج ابن ادم من العدم قلت ياه
رجع ابن ادم من العدم قلت ياه
تراب بيحيا……وحى بيصير تراب
الاصل هو الموت ولا الحياة؟

ضريح رخام فية السعيد اندفن
وحفرة فيها الشريد منغير كفن
مريت عليهم قلت يالعجب
الاتنين ريحتهم لها نفس العفن

ياما صادفت صحاب وما صاحبتهمش
وكاسات خمور وشراب وما شربتهمش
اندم على الفرص الى انا سبتهم
ولا على الفرص الى ماسبتهمش

والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فى سؤالات من غير ردود

انا شاب لكن عمرى الف عام
وحيد لكن بين ضلوعى زحام
خايف ولكن خوفى منى انا
اخرس ولكن قلبى مليان كلام

ياباب يا مقفول امتى الدخول
صبرت ياما والى يصبر ينول
دقيت سنين والرد يرجع ليه مين؟
لوكنت اعرف مين انا كنت اقول