المقادير:
2 كوب لبن كامل الدسم او اى نوع انتى بتستخدميه
2 كيس فانيليا او ممكن 3 (انا عن نفسي بحط 3 عشان بعشق نكهه الفانيلا )
نص كوب سكر
1 كوب سكر للكراميل (الطبقه الغامقه )
4 بيضات
تكونى طبعا مجهزة الفرن على درجه حرارة عاليه
يلا نعمله سوا واحده واحده
اولا تجيبي حله وتحطى فيها كوبايه السكر وتسيبيه على النار لحد ما يحمر وبدون تقليب ..لدرجه الون المكرمل (الذهبي الغامق)
بعد ما تحطى الكراميل على النار تكونى مجهزة المقادير الى احنا اتفقنا عليها وتحطيهم كلهم فى الخلاط الكهربائي وتخلطيهم (البن مع البيض مع نص كوب السكر واخيرا الفانيلا)
نجيب القالب بتاع الكريم كراميل او لو معندكيش ممكن فى صينيه صغيرة وبعد ما الكراميل يوصل للون المطلوب تحطيه فى القالب او الصينيه وعلى طول تحطى عليه الخليط السائل وتكونى طبعا مجهزة الفرن من فبلها على نار عاليه واول ما تحطى القالب تخفي الحرارة شويه تخليها متوسطه وتحطيه فى حمام ميه سخنه وتسيبيه 45 دقيقه وعشان تعرفي انه استوي تجيبي سكينه رفيعه او شيش خشب و تدخليهه على جنب لحد النص وتطلعيه تانى وتشوفي اذا كان لسه فيه سائل يبقى تستنى شويه لو طلع ناشف يبقى كده تمام يا ست الكل
ولما يطلع من الفرن ضرورى جدا انك ما تقلبيهوش فى ساعتها لا لازم يستنى لما يبرد خالص
امانه عليكوا الى يجربه يقولى عمل ايه وايه تقيمكم ليا
يعطيك العافيه
