كل عام وانتم بخير
ده اخر موضوع هنزله قبل رمضان ان شاء الله وهو البوظة العربية والبوظة العربية تاريخها بيعود لمدينة دمشق وهى اختراع سورى من سنة 1895 واللى اكتشفها وقتها شخص اسمه محمد حمدى بكداش واولاده واحفاده ورثوا منه المهنة والمحل بتاعهم اسمه بكداش وموجود لغاية دلوقتى فى دمشق فى منطقة سوق الحميدية وان شاء الله قريب ترجع سوريا زى الاول واحسن ونروح ناكل البوظة هناك على اصولها
مش هطول عليكم بس حبيت اقولكم نبذة مختصرة عن تاريخ البوظة (وطبعا النبذة دى لغير السوريين لأنهم اكيد عارفين اكتر منى)
المكونات:
لتر حليب
كوب وربع سكر
ملعقة صغيرة مستكة مطحونة
ربع كوب سحلب(خام مش مضاف ليه اى مكسرات)
2 ملعقة صغيرة ماء ورد
كوب فستق مجروش
الطريقة:
هنحط كوبايتين من الحليب والسكر فى كسرولة
ومعاهم المستكة المطحونة ونحركهم ونحطهم على نار هادية لغاية مايغلوا
وده شكل المستكة قبل مانطحنها
وبعد مايغلى الحليب والسكر هناخد منهم ربع كوب وندوب فيه السحلب وافضل نوع سحلب هو التركى بس بقية الانواع بردو تنفع انا عن نفسى استخدمت سحلب عادى
ونقلبهم لغاية مايدوب السحلب ونضيفهم على الحليب البارد والسحلب ده هو اساس البوظة العربية لأنه هو اللى بيخليها فيها مطاطية
ونحركهم لمدة دقيقة لغاية ماتتكون عندى رغوة ونضيفهم للحليب اللى غليناه فى الكسرولة
ونشغل عليهم النار ونفضل نقلبهم على نار هادية لغاية مايغلى ويغلظ قوامه ونضيفله ماء الورد(ممكن نستخدم ماء ورد وماء زهر حسب رغبتكم) ونعلى النار لغاية مايغلى مرة تانيه ولما نطفى النار عليه نصفيه عشان نضمن ان مفيش اى كلاكيع ونحطه فى علبة محكمة الغلق
ونضيفله الفستق المجروش وطبعا من اساسيات البوظة العربية الفستق الحلبى بس هو مش متوفر عندى فاستخدمت فستق امريكى
ونقلبهم
ونحطها فى الفريزر ونقلبها كل 5 ساعات عشان متكونش كتل تلجية وانا معنديش ماكينة الايس كريم لو عندكم هتحطوا البوظة فى التلاجة العادية وبعدين هتحطوها فى الماكينة لمدة ساعة ونص تقريبا والماكينة هتخلى البوظة تمط اكتر
قدمتها تانى يوم وطبعا مش محتاجة لأى تزيين
بصراحة طعمها اكثر من رائع وعجبتهم جدا فى البيت بس اكيد مش زى البوظة الاصلية بتاعة بكداش بس بنحاول لغاية ماناكلها فى دمشق ان شاء الله
يارب موضوعى البسيط ده يكون عجبكم
فعلا سهلة و رائعة
