تعلمى ازاى تقابلى ضيوفك
إزاي نقدر نحدد الوقت المناسب للزيارة؟!
يُفضّل إننا أثناء الاتفاق على ميعاد الزيارة نسأل الشخص اللي هنزوره عن الميعاد المناسب له؛ يعني اقتراح الميعاد يكون من عنده هو مش من عندنا إحنا، وأهم حاجة إننا نتفق مع صاحب العزومة على ميعاد الزيارة قبلها بفترة مهما كان الشخص ده قريّب مننا.
أما لو كنا قريبين بالصدفة من بيت أحد أقاربنا أو أصدقائنا، وفكّرنا نزوره من غير ما يكون في ميعاد سابق، فيُفضّل إننا نكلّمه في التليفون ونستأذنه في الزيارة، علشان يكون عنده فرصة يجهز نفسه لاستقبالنا.
طيب إيه الحدود المسموح بها للتأخير عن الميعاد المحدد للزيارة؟!
لا بد من احترام ميعاد الزيارة، وعدم التأخير أكثر من ربع ساعة عن الميعاد؛ لأن الشخص اللي إحنا هنزوره أكيد بيحضّر نفسه وقته لاستقبالنا، وعلشان كده لازم نحترمه، ومش من المفضّل إننا نوصل قبل ميعادنا علشان نسيب لأهل البيت فرصة إنهم يجهزوا البيت ويستعدوا للزيارة.
في حالة وجود ظرف طارئ إيه هو الأسلوب المناسب للاعتذار؟
الاعتذار عن الزيارة لازم يكون قبلها بيوم على الأقل، وفي حالة حدوث ظرف طارئ فجأة هيمنعنا عن الميعاد المتفق عليه، ممكن إننا نتصل ونعتذر أو نأخر الميعاد شوية، لكن لازم يكون فيه سبب قوي جدًّا.
إيه هي الملابس المناسبة لكل زيارة؟!
أكيد طبعاً مهم جدًّا إننا نهتم بشكلنا ومظهرنا وملابسنا أثناء الذهاب لزيارة حد، لكن في نفس الوقت لازم نحافظ على بساطتنا قدر الإمكان.
ومن الحاجات المرفوضة إننا نزور حد بملابس الرياضة أو حتى الاستايلات الغريبة غير المقبولة اللي بنشوفها اليومين دول، وكمان اللبس المبهرج مش مستحب وإنتِ بتزوري حد؛ يعني كل ما كانت الملابس بسيطة كان أفضل.
أما في المناسبات الخاصة زي أعياد الميلاد أو حفلات الخطوبة اللي بتكون في البيت، ممكن الملابس تكون سواريه هادئ وبسيط وبدون بهرجة كثيرة؛ لأن الاحتفال بالمناسبات في البيت يختلف عن الخارج.
طيب هل فيه قواعد معينة لاختيار الهدية المناسبة؟!
بوجه عام عند زيارة أحد الهدية بتكون بسيطة مجرد تعبير عن الشكر؛ يعني ممكن نجيب علبة شيكولاتة أو زرع أو بوكيه ورد.
أما في المناسبات الخاصة فالهدية بتختلف.. وبنحددها حسب نوع وسبب الزيارة، وتختلف أيضاً حسب عقلية واهتمامات الشخص اللي بنزوره؛ فمثلاً لو شخص بيحب القراءة ممكن الهدية تكون كتاب بسيط، ولو بيحب التحف نجيب له فازة أو أي تحفة بسيطة، أما بالنسبة لزيارة المريض فأفضل هدية هي الورد، أما لو كانت المناسبة عيد ميلاد أو نجاح أو خطوبة، فممكن إن الهدية تكون ذهب أو فضة.
ودلوقتي هنتكلّم عن الطريقة المناسبة لتحضير عزومة في البيت…
وأوّل حاجة نحب نسألِك عنها هي إتيكيت دعوة الضيوف؟!
أهم حاجة هي إننا نعزم الضيوف قبل ميعاد العزومة بوقت كافي، ويُفضّل لو كانت الدعوة قبل ميعاد العزومة بأسبوع، وأثناء الاتفاق على الميعاد لازم تعرّفي الضيوف نوع العزومة بالظبط؛ يعني إذا كانت عزومة غداء أو عشاء أو مناسبة خاصة.
حاجة مهمة كمان لازم ناخد بالنا منها أثناء دعوة الآخرين، وهي إنك تهتمي بإبداء رغبتك واهتمامك بحضور الضيف؛ يعني مش مجرد (عزومة مراكبية) زي ما بيقولوا.
وفي حالة إنك هتعزمي أكثر من شخص يجب مراعاة إن يكون فيه بينهم انسجام؛ فمثلاً ما تعزميش اثنين فيه بينهم خلافات في يوم واحد.
طيب بالنسبة للتحضير للعزومة. هل فيه إتيكيت معين لازم نهتم به؟!
أكيد فيه حاجات معينة لازم ناخد بالنا منها علشان العزومة تكون لطيفة والناس تكون مبسوطة، وأول حاجة لازم ناخد بالنا منها إن لو عدد الضيوف اللي هنستقبلهم في البيت كبير ممكن تستعيني بحد علشان يساعدك، ومهم جدًّا إنك تحضّري للعزومة قبلها بوقت كافي؛ لأن مش من المقبول إنك تسيبي الضيوف لوحدهم لانشغالك بالتجهيز والتحضير.
إذا كان ضمن الضيوف حد مدخن جهزي طفاية في مكان قريّب من مكان استقبال الضيوف، ولو بتضايقي من رائحة الدخان في البيت ممكن تطلبي من المدخن بطريقة لطيفة إنه يدخن في المكان مفتوح (البلكونة مثلاً).
لو العزومة هيكون فيها أطفال.. نعمل إيه؟!
لو في أطفال هيكونوا موجودين يُفضّل إنك تجهزي غرفة ما يكونش فيها تحف أو حاجات قابلة للكسر بسهولة، وممكن تجهزي فيها لعب، وبكده تكوني بتقلي من الفوضى اللي ممكن تحصل بسبب الأطفال.
هل فيه ملابس معيّنة تكون مناسبة لاستقبال الضيوف في البيت؟!
أكيد عند استقبالك للضيوف في بيتك لازم تهتمي بملابسك؛ لأنها من الأشياء المهمة جدًّا، وما ينفعش تقابلي أي ضيف مهما كانت درجة قرابته منك بملابس النوم.
ولازم نحرص إن الملابس اللي هنستقبل بها الضيوف تكون ملابس كاملة حتى الحذاء، وما ينفعش تقابلي الضيوف ب(شبشب البيت)، وممكن تلبسي حذاء بدون كعب لسهولة الحركة.
بعد ما حضرنا للعزومة إزاي بقى نستقبل الضيوف؟!
استقبلي الضيوف بالترحاب، وبوجه بشوش ومبتسم، واحرصي إنك تظهري اهتمامك وسعادتك باستقبالهم، ولو عازمة أكتر من شخص ما يعرفوش بعض لازم تكوني حريصة إنك تعرّفيهم بعض، وتحاولي تقترحي موضوع مشترك للنقاش. ولازم توزّعي اهتمامك بين كل الضيوف الموجودين عندك حتى الأطفال.
نعمل إيه لو جالنا تليفون أثناء وجود الضيوف؟!
حاولي على أد ما تقدري إن المكالمة تكون مختصرة وقصيّرة، والأفضل إنك تأجلي الرد علي التليفونات وقت تواجد الضيوف.
