** المقادير :
— نصف كيلو لحمة مفرومة يقسم قسمين (( تلت للعصاج وتلتين للكبية ))
— حوالى ربع كيلو او 300 جم برغل ناعم (( للناس اللى فى مصر مامتى بتعمل نص كيس برغل الضحى )) يغسل كويس وينقع فى ماء لمدة 10 دقايق بالضبط ,, ويتصفى من ميته كويس جدا جدا جدا يعنى تحطيه فى مصفاة ضيقة وتقعدى تعصرى فيه بايديكى الاتنين لحد ماينزلش ولا نقطة مية واحدة وتسيبيه كمان فى المصفاة لحد مايجى وقت استعماله وده مهم جدا عشان الكبيبة ماتفكش منك فى القلى وهى مشكلة بتواجه ناس كتير
— بصلة صغيرة وبركز على صغيرة عشان البصل الكتير برضه بيفك الكبيبة
— بهارات الكبيبة الاساسية اللى لا غنى عنها (( ملعقة كبيرة كسبرة ناشفة مطحونة + ملعقة كبيرة قرفة + ملعقة كبيرة ملح )) وممكن تزودى بهارات تانية زى الفلفل الاسود والزنجبيل البودر وبهارات اللحمة بكميات صغيرة
** الطريقة :
يحضر العصاج بتشويح البصلة المفرومة فى الكبة فى شوية سمنة على زيت صغنتين ثم اللحمة وعليها فلفل اسود وقرفة وجنزبيل بودر وبهارات لحمة وكسبرة ناشفة وملح لحد ماتدخل فى السواء ثم تضيف كسبرة خضراء مفرومة ناعم اوى ودى بقى بتدى طعم تحفة وممكن تضيفى جزر مبشور بيخلى العصاج حلو اوى ,, واساسى انك تضيفى صنوبر محمص زى ماما مابتعمل بس انا زوجى العزيز لايحب المكسرات فى الكبيبة فانا بعملها من غيرها
نيجى اللكبيبة:
تضربى البصلة الصغنتة فى الكبة ثم تضيفيلها البرغل المتصفى من ميته كويس اوى وتضربيهم كويس فى الكبة لحد مايختلطوا كويس وبعدين تطلعيهم فى طبق عميق وتضيفيلهم اللحمة والبهارات وتعجنى كويس اوى بايدك
وبعدين ترجعى الخليط كله للكبة ولو كبتك حلوة وقوية فى فرم اللحمة تفضلى تضربيهم لحد ماعجينة الكبيبة تعمل كورة واحدة وهى بتلف كده يبقى خلاص وصلت للمرحلة التمام
ولو كبتك بعافية فى فرم اللحمة شوية زى حالاتى تقسمى العجينة على اجزاء وتفرمى كل جزء لوحده كويس لحد مايلف زى الكورة ولما تخلصى الكمية كلها ترجعيها كلها للكبة وتاخد لفة لحد ماتعمل كورة
هتلاقى العجينة نعمت خالص معاكى وهتلاقيها كمان متماسكة تقدرى تشكليها بسهولة
نيجى لاهم مرحلة تشكيل الكبيبة بشكلها المعروف
تاخدى كورة كبيرة من العجينة تملا كف ايدك وتكوريها كويس وبعدين بصبعك الابهام اكيد عارفاه :)) تخرميها وتعملى فيها حفرة عميقة لاخرها وتخلى بالك قبل ماتحطى الحشو ان جناب الحفرة دى تكون متماسكة وسليمة والا الحشو هيطلع براها
وحطى معلقة صغيرة من العصاج ماتمليهاش اوى
وبعدين تقفلى الجوانب على العصاج من الناحيتين قصاد بعض زى الساندوتش كده وبعدين تاخدى القفلة العريضة دى تلميها بايدك وتعملى شكل البوز المعروف بتاع الكبيبة لفوق كده وتلفى الكبيبة بين ايديكى عشان تتفرد وتبوزيها من الطرف التانى بنفس الطريقة وتتاكدى ان مفيهاش حتة مشققة ولا مفتوحة والا هتفضحك فى القلى :))
وبس كده لو عندك وقت تحطيها فى التلاجة شوية تمسك اكتر يبقى كويس معندكيش زى حالاتى يبقى على القلى على طول فى زيت غزير وسخن جدا وتفضلى معلية النار لحد ماتاخد لون محمر شوية وبعدين توطى النار عشان تستوى من جوا كويس
وتطلعيها على ورق مطبخ هتلاقيها مش شاربة زيت خالص وده انا معرفش سببه لحد دلوقتى لكن اللى اعرفه ان هى دايما بتطلع كده وبتكون خفيفة اوى مع انها مقلية
وبس خلاص بالهنا والشفا كان غداء روعة مع مكرونة وسلطة زبادى بالخيار
واللى تعملها تدعى لسنسن ربنا يخليهالنا ويديها الصحة والعافية وتبدع اكتر لان هى اللى ادتنى الطريقة بحذافيرها وانا نفذتها بالضبط ومكنتش مصدقة انها حلوة كده ..
