الوسم: المماراسات

انا الان سوف اقول بعض الافكار البسيطه لتعليم الطفل اساسيات الحياه من تجربتى الشخصيه

اول شئ القدوه والتقلي

لازم انك تفعلى الشئ اللى تحبى تعلميه لطفلك اولا لان الطفل دايما يحب ان يقلد الاكبر منه وكونى حظره فى تصرفات امامه ( شوفتى هما اللى بيربونا ههههههههه )
لللللللازم توفى بوعدك له عشان يثق فيك ويتعلم هو الاخر انه يتحمل مسؤليه كلامه ومتقوليش انه هينسى لااااااا عمره ما هينسى
لا توعديه بشئ انت مش ناويه تعمليه
اذكر اذكار الصباح والمساء امامه بصوت عالى حتلاقيه حفظها لوحده بعض فتره
اقرائى القرآن امامه
اذكرى اسم الله بصوت عالى قبل الاكل
غسيل اليدين قبل الاكل وبعده سويا
وهكذاااااا

ثانيا التعلم من خلال المماراسات اليوميه

لو طفلك سنه من 6 او 9 شهور الى 18 شهر تقريبا وانت بتلبسيه ملابسه كلميه عن الالوان واعضاء جسمه مثلا ( ياللا عشان تلبس البنطلون الازرق هات رجلك اليمين "وتمسكى رجله اليمين" شاطر حبيبى فين ال تى شيرت الاصفر اهو كان مستخبى ههههه ياللا نلبسه قبل ما يهرب تانى فين راسه ولما تنزلى التى شيرت من على راسه تقوليله " بخ " ههههههه
ولما تسبحيه وتحمميه كلميه عن اعضاء جسمه )

لو طفلك عمره مابين سنه ونصف الى ثلاث سنوات
( اتركيه يختار اللون اللون المحبب له مع مساعدتك على سبيل المثال انت اخترت ال تى شيرت الاحمر لونه جميل جدا رااائع )
وهكذا وبعدين قوليله هات رجلك اليمين واتركيه هو يحاول يعرف فين رجله اليمين وهكذا )
وبالنسبه للاذكار تقولوها سوا فى الفتره دى طبعا مش مهم يقولها واضحه المهم يحاول

عند الذهاب للسوق تكلمى معه عن الخضروات والفاكهه

لو طفلك عمره ثلاث سنوات واكثر اتركيه يعتمد على نفسه فى اموره الشخصيه مع مراقبته بحب وفى الفتره دى نبتدى نجنى ثمار المرحله الماضيه
واجعليه يساعدك فى كل شئ ممكن
لتحمل المسؤليه فيما بعد
لشغل وقته بشئ مفيد
زياده الترابط بينكم
تعلم مهارات اكثر

وده موضوع انا كنت منزلاه من قبل ان شاء الله يفيدكم

الشيف الصغيييييييير

الطفل ممكن يتعلم ايه من اللى فات على المدى البعيد مع الممارسه يتعلم

1- ازاى يلبس بطريقه صحيحه
2- يعرف اعضاء جسمه
3- يعرف اليمين من الشمال
4- يعرف الالوان
5- يعرف الخضروات والفاكهه
6- الاعتماد على النفس

ثالثا التعلم من خلال الغناء والاناشيد ( الحفظ )

قبل ما ادخل فى موضوع الغناء احب اقولكم تجربتى فى تحفيظ القرآن مع اولادى احفظى معاه يعنى خذى دور فى القائها وتسميعها ولما الطفل يحفظ الآيه لا مانع انه يقوم بدور المعلم وانت التلميذه

طبعا الكل عارف ان الطفل يحفظ الاناشيد والاغانى بسهوله شديده جدا
فعليكى انك تختارى بعنايه الاغانى والاناشيد وأفلام الكارتون طبعا اللى يشاهدها طفلك وكل فترهحاولي انك تشاهدى مع اولادك ما يحبون وتتناقشى معاهم فيما شاهدتموه

والطريقه الاخرى انك تغنى انتى معه انا حكتبلكم بعض الاناشيد التعليميه اللى ممكن تساعدك فى تعليم الطفل بعضها جمعته من الانترنت والاخر من عندى

نشيد عن الأعداد

الواحد هو ربي أثنين ماما وبابا
ثلاثة هما أخواني أربعة هما أصحابي
خمسة أصابع يدي ستة أقوم من نومي
سبعة أروح مدرستي ثمانية أدخل فصلي
تسعة ابدأ درسي عشرة ألعب وأجري

نشيد عن الأشكال الهندسية

أنا الصديق المستطيل
اسمي على رسمي جميل
صديقتي مدورة
سميتها بالدائرة
لي صاحب مثلث
وآخر مربع
أشكالنا محببة
لطيفة مرتبة

انشودة عن الألوان

قلمي الأزرق
يرسم زورق ..
وسماء بها شمس تشرق
،،،،،،،،،،،،،،،،،،،،،،،،، ،،،
قلمي الأحمر
أخذ المنظر
لون كل الورد الأحمر
,,,,,,,,,,,,,,,,,,,,
قلمي الأصفر
نظر ..
وفكر
أين مكان اللونالأصفر؟؟؟؟؟؟؟؟؟؟؟؟؟؟ !

الحواس الخمسة

نحن الحواس الخمـــسة*** شـم وذوق ولمســة
هيـــا اسمعونــــا *** هيـــا انظـــروا
نحن الحواس الخمســـة *** نحن الحواس الخمــسة

الوضوء

بسم الله أنا أتوضأ
وبها يومي دوما يبدا
اغسل وجهي واليدين
امسح رأسي والرجلين
لا أسرف أبدا في الماء
فتقبل ربي دعاء

اغنيه محمد نبينا
الاغنيه دى بتعلم الطفل سيره مبسطه عن حياه الرسول صلى الله عليه وسلم

محمد نبينا
امه آمنه
ابوه عبدالله
مات ما رآه
جده اللى رباه
ابو طالب عمه
كان بيدافع عنه
ستنا حليمه
مرضعه نبينا
جانا السعد جانا
جانا السعد جانا

التعلم من خلال القراءة

طبعا كلنا عارفين ايه هى فوائد القراءه

انا عارفه ان الان زمن الانترنت مش الكتاب لكن ياريت كل واحده فينا تعمل نظام محدد مع اولادها يعنى الكمبيوتر ساعه او اثنين فقط لاضراره الكثيره
انا بعمل كده فى ايام الدراسه ممنوع الكمبيوتر وفى العطله الاسبوعيه بعد انهاء الواجب ولمده محدده يعنى تقريبا ساعتين
نرجع تانى للكتاب عودى طفلك يكون فى شيئين تعملوهم سويا قبل النوم وهما قراءه قصه وقراءه القرآن ليكون آخر شئ سمعه اوقرأه طفلك
وعليك محاوله اختيار الكتاب المناسب لسن طفلك
اقل من سنتين او ثلاثه يملوا سريعا فالافضل نوعيه الكتب القصيره

وطبعا فى المرحله دى انت تقرأى القصه

مابين سنتين او ثلاثه الى ست سنوات اكثرى من الكتب التعليميه بطريقه مبسطه بجانب القصص القصيره

والمرحله دى تقرأى القصه مع خلق جو مرح ومشاركه بينك وبين طفلك

فوق الست سنوات اجمعى ما بين القصص الطويله نوعا ما

والقصص القصيره جدا

القصص الطويله تقرأيها انت والقصيره دعى طفلك يحاول قراءتها لتدريبه على القراءه وتنميه قدراته اللغويه
ومره بعد مره حيتعود انه يقرأ لحاله

التعلم من خلال الرسم والتلوين

انت ممكن تفكرى ان الرسم ده مجرد لعب وخلاص لكن لأ فى بعض الأشياء اللى ممكن طفلك يتعلمها لو ركزتى معاه شويه

اولا يتعلم ان القلم للكتابه

وليس للأكل ههههههههه ( ده طبعا فى سن مبكر)

ثانيا يتعلم يمسك القلم بطريقه صحيه تمهيدا للكتابه

ثالثا يتعلم ويعرف الالوان

رابعا يتعلم انه يعبر عن نفسه بالرسم

خامسا لو طفلك فى سن المدرسه شجعيه انه يرسم شئ وفى نهايه الورقه يكتب اى جمله عن الرسمه اللى رسمها وبعد ما ينتهى من الكتابه ساعديه بمراجعه ما كتبه لغويا وباسلوب جيد وبحنان لأنه بيلعب مش بيعمل الواجب وصدقينى الطريقه دى حتساعده وتساعدك كتييييييير فى المزاكره لانه مره بعد مره حيعرف ازاى يكتب الكلمات من غير أخطاء
وبطريقه مرحه

مشكوووره على المجهود