حبيت اعمل التورتة البسيطة دى بطريقة سهلة للكيك الاسفنجى والحشو والتزيين عشان اى مبتدئة فى التورتات تقدر تعملها لو عندها مناسبة
مكونات الكيكة:
2 كوب دقيق
2 ملعقة صغيرة بيكنج بودر
5 بيضات كبار
فانيليا
كوب سكر
مكونات كريمة الزبدة للحشو:
250 زبدة طرية غير مملحة
150 جرام سكر بودرة
6 ملعقة كبيرة حليب
فانيليا
وللتغليف والتزيين هنحتاج:
2 كوب كريم شانتى مخفوق
شرائح اناناس (كمبوت)
شرائح خوخ (كمبوت)
شرائح كيوى
جيلى تلميع
كريز
بندق
جوز هند اصفر
جناش شوكولاته ومكوناته:
2 كوب شوكولاته مقطعة
كوب فريش كريم
ملعقة كبيرة عسل جلوكوز وممكن نستبدلها بعسل نحل
الطريقة:
اول حاجة هنعمل الكيك
فى اناء هنحط البيض والفانيليا
ونضربهم بمضرب البيض لمدة لاتقل عن دقيقتين
وفيه ناس هتقول كمية البيض دى قليلة بس انا شايفاها مناسبة والموضوع مش بالكمية اهم حاجة مدة الخفق ده اللى بيفرق فى النتيجة
وهيعملوا رغاوى
ونحط عليهم كل كمية السكر
ونضربهم على اقصى سرعة لمدة لاتقل عن 10 دقايق متواصل
لغاية مايتكاثف ويفتح لونه وقوامه يبقى كريمى ويعمل علامة زى الشريط او رقم 8 لما نشيل من عليه المضرب
وهننخل الدقيق والبيكنج بودر ونحطهم على الخليط
ونقلبهم من فوق لتحت وبالاسباتيولا برفق
لغاية ماتختفى كل كمية الدقيق ونحطها فى صينية مدهونة مقاس 24
وخبزتها فى فرن منخفض الحرارة وطبعا كل شخص فرنه يختلف عن التانى واختبرتها وطلعتها
ودى اسهل طريقة للكيكة الاسفنجية واحلاها طعما بتتعمل بسرعة ونتيجتها مضمونة ومكوناتها متوفرة وسهلة بالنسبة للكل
وهنعمل كيكة تانية بنفس المكونات والطريقة وهيبقى عندنا كيكتين عشان التورتة يبقى ارتفاعها عالى
ولما نطلعهم من الفرن نقلبهم على ورق خبز
ونسيبهم فى التلاجة لمدة يوم كامل عشان يتماسكوا
وتانى يوم نطلعهم ونجهز ادوات التقطيع والحشو
وهنقسم كل كيكة ل2 هيبقى عندنا 4 شرايح كيك
وهنجهز كريمة الزبدة للحشو
فى اناء هنحط الزبدة
تاااااااااااااااااابعونى
ونخفقهم بالمضرب على اعلى سرعة لغاية الخليط مايبقى لونه فاتح وهش وكريمى
ونضيفلهم الحليب والفانيليا
ونخفقهم مرة تانية لغاية مايمتزجوا
ونبدأ نحشى بيها الكيكة بس قبل مانحط كريمة الزبدة على الكيك هنسقى الكيك بمياه شرائح الخوخ والاناناس المعلب (الكمبوت) لأن طعمها حلو ومسكر وده حسب رغبتكم
وفيه ناس هتقول كريمة الزبدة تقيلة ودسمة هى بالنسبالى عادية بس لو شايفنها تقيلة ممكن تستبدلوها بكريم شانتى مثلا
وبعد مانخلص حشو الكيك بكريمة الزبدة هنغلفها من برة بالكريم شانتى
وهنعمل فاصل بودردات الكريم شانتى فى نص الكيكة عشان هنعمل نص فاكهة ونص شوكولاته
ونبدأ نحضر الجناش
فى كسرولة هنحط الفريش كريم
ونشغل عليه نار هادية لغاية مايغلى واول مايغلى نطفى ونضيفله الشوكولاته المقطعة
ونقلبها لغاية ماتدوب جوة الكريمة ونضيفلهم معلقة عسل الجلوكوز
ونقلبه لغاية مايدوب وفايدة عسل الجلوكوز انه بيدى للجناش لمعة وممكن نستبدله بعسل نحل
وكده الجناش بقى جاهز
هنسيبه يبرد شوية وهنحطه على نص التورتة والنص اللى عليه الجناش فى الجنب هنحط جوزه هند اصفر ومن فوق كريز وبندق
والنص التانى هنرص الفاكهة وفى الجنب هنحط شرايح اناناس ووردات كريم شانتى وهنلمع الفاكهة بجيلى التلميع بعد مانسخنه على النار وده شكله وهو طبعا بيتباع فى محلات خامات الحلويات ومتوفر جدا
وده شكل التورتة النهائى
والطعم مش هقولكم عليه انتوا هتجربوه بنفسكم وهتدعولى
بالهنا والشفا
