فرق المعاملة بين البابا و الزوج

مع بابا .. فى العيد بيديلك العيديّه وفوقيها بوسه ..
لكن مع جوزك .. بيقول إنت خلاص كبرتى على الحاجات دى

مع باباكى.. بتنامى وتصحى وقت ما انتى عايزه ..
مع جوزك .. وقت ماهو عايز .. أو مع مواعيد شغلُه.

مع بابا.. بتشترى هدومك ومكياجك وكل اللى انتى عايزاه .. ويقولك حلو قوى عليكى

مع جوزك .. بيشترى لك برضه .. لكن ما قل ودل .. ويقولك .. فلوسى والمرتب

مع بابا لو حصل حاجه مثلا و كنتى زعلانه .. بيزعل عشانك ..
مع جوزك .. بيزعل منك .. ويلومك ازاى تزعلى أصلا

باباكى .. كلمة حلوه ترضيه ..
وجوزك .. طول الليل تِحَايلى فيه

بابا .. لما تدلعى عليه .. بيفرح بيكى
إنما جوزك .. بيقولك ..أكيد عايزه حاجه

باباكى.. لما تقولى له .. ده حصل كذا وكذا .. بيهتم ويصَدّقك
إنما جوزك .. بيقولك .. الموضوع دا وراه إنّ .. ويشك فى كلامك

بابا .. لو شافك بتعيّطى ها يمسح دِمعتك
إنما جوزك .. ها يقولك يادى النكد

مع بابا .. لو حاطه ماكياج فاقع شويه.. ها يقول لك الهادى عليكى أحلى .. وانت أحلى من غيره خالص
لكن جوزك .. ها يقولك شكلك زى عروسة المولد

مع بابا .. لو طلبتى دوا من الصيدليه . جَرى ها ينزل يجيبه
لكن جوزك ها يسالك بكام الأول؟

بابا .. لو طلب منك كُوبّاية مَيّه .. بيقولك لو سمحتى عايز مَيّه
إنما الباشا يقولك قومى هاتى مَيّه

لو بتفرجى مع بابا على التليفزيون … ها يسيب لك الحريه تتفرجى على اللى انتى عايزاه
لكن المحروس .. مافيش قدامك غير يا الاخبار يا الكوره .. يا ميلودى

بابا لو نازل مشوار .. بيعمل ليكى اعتبار ويديكى خبر
لكن جوزك .. بيختلس عدم وجودك قدامه عشان ينزل من وراكى ولو قفشتيه يقولك انا نازل ويقفل البابا بسرعه

لو جالك مكالمه غلط على موبايلك.. بابا ها يقولك حصل خير
لكن جوزك .. ها يعملها خناقه…

لو ما فيش فى التلاجه غير إزازة بيبسى واحده ..بابا ها يسيبها لك بنفس راضيه
لكن جوزك ها يقول معلش انا لازم ابلّع أو ها يقسمها معاكى

لو اتزحلقتى على الأرض ..باباكى ها يجرى يشيلك
جوزك ها يقعد يضحك ويقولك ما انتى اللى مش منشفه الارض كويس

لو نفسك تغيرى مكان السجاده ..باباكى ها يقولك عنك دى تقيله عليكى
لكن جوزك ها يقولك مش ضرورى وجع القلب دَه

لو العربيه عطلت بيكى .. بابا.. ها يقولك إقفليها وتعالى وانا ها اتصرف
جوزك .. ها يقولك متركبيش العربيه تانى

لو حكيتى ل بابا على واحد عاكسك .. ها يقولك معلش ..
إنما جوزك .. ها يقولك انتى اللى ماشيه مش مُحترمه

لو مقدمه على شغل ..باباكى.. ها يوصى عليكى طوب الارض
لكن جوزك .. مش ها يتعب نفسه ولا يهمه أصلا وها يقولك يعنى انتى ها تشتغلى وزيره

باباكى لو لاحظ
إنك متخانقه مع أختك .. ها يصالحكوا على بعض
لكن جوزك هيقولك خليهم يولَعوا دول عيله عجب اصلا

مهما باباكى كان متضايق .. لا يمكن تكلّميه وتلاقيه مكشر
لكن جوزك.. لو متضايق .. البلد كُلّها هتنكد عليكي.. إستحملى بقى