** المقادير :
– نص لفة جلاش
– معلقتين سمنة سايحة
– قشطة للحشو (( ممكن تعملى القشطة المعتادة اللبن والسكر والنشا وماء الزهر ))
او القشطة العلب زى النستله
او قشطة السميد ودى بقى لبنانية جدا ودى اللى انا عملتها وقلتها قبل كده
(( كوبايتين ونص حليب مع حوالى 4 ملاعق سكر او زى ماتحبى يرفعوا على النار لحد ماللبن يبدأ يغلى وبعدين تنزلى ب 6 ملاعق سميد وتوطى النار وتقلبى بسرعة ونص معلقة صغيرة ماء زهر وتفضلى تقلبى لحد ماتتقل وتوصل للقوام المطلوب وممكن تظبطى القوام باضافة لبن او سميد ,, وبعد ماتطفى النار عليها ضيفى عليها نص علبة قشطة وقلبيهم كويس وكده الحشو بقى جاهز ))
المهم ان الحشو يكون بارد مش سخن
– شربات تقيل بارد ( 2 سكر + 1 ماء + عصير نصف ليمونة وبعد ماتطفى ضيفى عود قرفة خشب ونقط ماء زهر بيبقى تحفة
** الطريقة :
هنحط راقات الجلاش كلها على بعض بالضبط وبالسكينة نقطعها مستطيلات متوسطة ونغطيها بفوطة نضيفة عشان ماتنشفش
هنجيب مستطيل ونحطه بالطول ادامنا وندهنه خفيف بالسمنة ونحط فوقه مستطيل تانى وندهنه سمنة ونجيب مستطيل تالت ونحطه على المستطيلين اللى فاتوا بس بالعرض يعنى نعمل حرف t بس المستطيل اللى بالعرض ننزله شوية تحت يارب تكونوا فهمتوها بس هى سهلة اوى
هندهن المستطيل اللى بالعرض سمنة ونجيب معلقة كبيرة من الحشو ونحطها عليه ونقفله من الناحيتين على الحشو يعنى نطبق الجنبين بتوعه على بعض
وبعدين عند بداية المستطيل اللى بالطول هنبدأ نلف على المستطيل المقفول على الحشو ونبرمه جواه بحيث المستطيل اللى بالطول يتلف رول ويبقى جواه المستطيل اللى كان بالعرض وقفلناه على الحشو
تمام كده :))
هنكرر كده فى باقى المستطيلات لحد مانخلص الكمية وفى الاخر هنقفل اطراف الصوابع كلها بشوية دقيق على مية زى مابنعمل فى السمبوسك كده عشان مايفتحش فى القلى
هنجيب زيت غزير ونسخنه كويس ونحط فيه الرولات ونخلى بالنا منها عشان بتتحمر بسرعة اوى نقلبها كويس ونطلعها على ورق نشاف وبعدين ننزلها فى الشربات وبعدين نطلعها فى مصفاة لحد ماتنزل الشربات الزيادة وبعدين تجمل بالقشطة والمكسرات ..
وبالهنا والشفاااا 🙂
وصفة جميلة
شكرا لـ،ــ،ـك
تقبلي مروري
