الوسم: الزواج

بيه "اختي بتقولي يا ابيه نظرا لشخصيتي الجباره المهيبه " … عاوزاك في حاجه
– مش فاضي
– ممكن بس تفضالي شويه
– طيب روحي اعملي كوباية شاي الاول و سندوتشين جبنه و تسعه هامبرجر
– محمد لو سمحت اسمعني ….. "لاحظو حذف كلمة ابيه"
– اتفضلي … انا سامعك
– عاوزاك بس تسمعني للاخر بدون تسرع او زعيق او اي انفعال
– حاضر …..
– في واحد عأ…
– مين ؟؟؟؟؟؟؟؟
– اهدي يا ابيه … ما انا هحكيلك اهه
– كملي
– فيه واحد عاوز يخطبني
– اسمه ايه و بيشتغل ايه و طوله كام و عرضه كام و مقاس جزمته و مقاس جزمة امه ايه ..
– معرفش ..
– ازاي يعني ما تعرفيش …. و ازاي اتقدم لخطبتك اصلا
– ما هو معانا في المنتدي
– هو انت قابلتيه و لا ايه
– لا و الله …. بس هو معجب بكتاباتي و بيعتلي ايميل بيقول عاوز يتجوزني علي سنة الله و رسوله
– علي طول كده
– و الله يا ابيه اسلوبه رقيق و هو طيب و حنين و مثققف …
– اسكتي يا بت "تك كسر حقك" …. (عفوا هذا تعبير بليغ باللهجه المصريه بمعني "شتيمه" )
– ليه يا ابيه … بس
– هسالك سؤالك : هل انت حكمتي عليه حكم نهائي من مجرد كتابات
– ما هو يا اخويا يا حبيبي الكتابه بتدل علي الشخصيه للشخص
– انا معاكي يا اختي "العبيطه الطيبه " بس الكتابه بتدل علي جانب واحد او جوانب محدده جدا من الشخصيه … و علاقة الجواز علاقه "ضخمه مركبه " لازم تتحسم بتوافق مجموعه ضخمه اخري من الجوانب …. اهمها القبول النفسي …. و تفاعل مركبات كيميا الحياه
– بس يا ابيه … في ناس هايفه كتير بتكتب اي كلام و باين عليها فاضيه …
– انا معاكي يا ست الكل … بس انا مُصر ان مجرد اقتناعك بكتابة شخص ليس مبررا انك تحكمي عليه حكم نهائي
– انا حكمت علي عقله ..
– هل انتي "بقه" حكمتي علي شكله … طباعه … وظيفته .. بيئته … وضعه الاجتماعي … و دمه التقيل غالبا …و
– لا طبعا يا ابيه … ما انا ما شفتوش لسا
– هو سياتك ناويه تشوفيه و لا ايه يا بت …
– يا ريت …
– نعم ؟؟ … ده انت عاوز قطم رقبتك
– يا ابيه … انا باعرض الامر عليك و بقولك ان في شخص محترم تعامل معايا بطريقه محترمه و اتكلم في الحلال علي طول …. و انا ما رحتش قابلته من ورا حد و لا ناويه …. هه
– خلاص ما تزعليش …
– مش زعلانه بس معترضه علي اسلوب حضرتك "الرجعي"
– رجعي !!!!
– ايوه … مش ممكن يعني يكون الشخص ده زميلي في الشغل و يحصل بينا تآالف و اقوله تعالي اخطبني
– بقول ايه … انا شايف انك تدخلي تعمليلي كوباية شاي و الـ سبعه و عشرين سندوتش اللي قلتلك عليهم …
– و انا شايفه انك تساعدني مساعده ايجابيه متحضره تتوافق مع التحضر اللي سياتك بتدعيه
– انا مدعي ؟ !!! … حاضر … ايه المطلوب مني ؟
– هو انا بردو اللي هقولك ايه المطلوب ؟
– طيب خلاص … و لو اني مش مرتاح للناس اللي بتعرف تكتب و تدحك علي عقول البنات بالكتابـــ—-
– و ليه انت حكمت انه بيدحك عليا علي طول كده … مش جايز لا
– و جايز انه نصاب و بيدحك علي عقلك
– يا ابيه شوفه و احكم …
– حاضر … اديني الاكونت بتاع "……."
– حاضر يا اخويا يا حبيبي … خد الايميل و الفيس البوك و الهوت ميل و السكاي بي و الجي ميل و عضويته ,,,
– بس خلاص …. ما تجيبيلي رقم تليفونه احسن …
– كده بردو يا ابيه … انا بردو اسمح لنفسي اكلم شاب غريب في التليفون … انا بجد زعلانه منك
– انا لو عرفت انك بتكلمي شاب غريب في التليفون و الله لأقطم وسطك و ادبحك … اتعلمي الادب يا بنت ..
– طيب يا ابيه ممكن سؤال
– نعمين
– و الشات علي الماسنجر مسموح
– لا طبعا يا هانم …. غير مسموح
– و علي المنتدي مسموح ؟
– ردرود عاديه و لا رسايل حاصه ؟
– ردود عاديه طبعا …. انا ما بستعملش الرسايل الخاصه خالص يا ابيه ؟
– اسمعي يا اختي العزيزه … ثقتي كبيره في اخلاقك و تدينك و تربيتك المحترمه و خوفك من الله … بس خدي بالك ان الدنيا اصبحت معقده و متداخله فلازم يكون عندك معيار حساس جدا لكل خطوه بتخطيها … فهمتيني
– فهمت يا ابيه ..
– طيب انا هقابل الولد ده و ابقي ابلغك بالنتيجه …
– ممكن تسمحلي احضر المقابله معاك
– لا طبعا
– ليه ؟
– انا هقابله مقابله مبدئيه و عاوز اتكلم معاه في امور مبدئيه و بعدين ارد عليكي اتفقنا
…. اتفقنا ..

و بعد عدة مراسلات بيني و بين الفيلسوف و الشاعر الرومانسي الجبار الذي اوقع اختي في فخ كلماته التي اجيد كتابتها مثله تماما… تحدد ميعاد للمقابله في كازينو الفك المفترس .. و دار بيننا هذا الحوار ..

– اهلا يا بشمهندس محمد … انا اتشرفت بمعرفتك جدا جدا جدا جدا جدا
– و انا كمان … خلص و ادخل في الموضوع
– و الله يا بشمهندس انا معجب جدا باخت حضرتك و عاوز اتقدم لخطبتها
– ممتاز ….. ممتاز …. و ايه حيثيات القرار العظيم ده
– حضرتك يا بشمهندس بتتهكم علي و علي مشاعري النبيله الفياضـــ—-
– اسمع … بدون شعارات …. جاوب علي سؤالي : اخذت القرار ده بناءا علي ايه ؟!!
– علي شخصية اخت حضرتك المتميزه
– و عرفت منين ان شخصية اختي المتميزه ؟
– من كتاباتها الرائعه في المنتدي
– لا و الله
– آه و الله (بابتسامه عريضه مزريه)
– طيب خلينا نتكلم بوضوح اكتر و خليني اسألك سؤال: هل ممكن شاب يقرر يقترن بفتاه بمجرد اعجاب بكتابتها علي منتدي …
– يا بشمهندس الجواز جواز العقل و الروح وسمو الفكر و التفكير و …
قاطعته فجأه ….
– اختي عوره و حوله
– افندم !!!!
– زي ما سمعت … اختي عندها حول مفاجئ في الخلفيه لحدقه العين و انعوار في الطبله الداخليه للبقبق الشمالي من الجفن الجنوبي للعصب البصري التاسع عشر ….
– ياه …. لا حول و لا قوة الا بالله
– انا بردو قلت اصارحك عشان لما تتجوزو يبقي كل شئ علي نور
– و يا تري يا بشمهندس هل في شيئ تاني تحب تصارحني بيه ؟
– لا خلاص غير بس اننا ناس محترمين مش هنرهقك ماديا ابدا في الجواز مفيش غير انك بس توفر كرسي متحرك لأختي
– كرسي متحرك !!! … ليه
– اصل عندها حاله تشنج مفاجئ بتخليها ما بتعرفش تمشي 14 شهر في السنه … بس بقيت السنه علي ضمانتي … قطر توربيني ما شاء الله .. الله لا حسد … و علي فكره هات كرسي كبير حبتين عشان وزن اختي 140 كيلو جرام … اصلها بتنافسني في الاكل
– يا بشمهندس … ممكن تسمحلي بالانصراف ؟
– مستعجل ليه ….انتظر لما نحسم امور الجوازه
– وقت تاني ان شاء الله … (و هم بالوقوف)
– لا يا استاذ ….. اجلس و انتظر …. مش لازم تشوف العروسه الاول
– يا بشمهندس مفيش داعي … انا مقتنع ان الجواز قسمه و نصيب
– و انا زيك مقتنع …. و لكن لازم نكمل الشكل الاجتماعي للمقابله للنهايه …. و لن اسمحلك باي تصرف مهين (قلتها بحده و عنف)
اضطرب العريس بشده …
– لا يا فندم … معاذ الله … خلاص نشوف العروسه و امرنا الي الله …

و اقوم انا من مجلسي و ابتعد خطوات و اتصل باختي فتأتي مسرعه و مرتديه لباس طويل و محترم مع حجاب راق مع ابتسامه خجل ……

– اي خدمه يا ابيه ؟
– اتفضلي اجلسي
– حاضر "و عينيها في الارض"
و في هذه الاثناء بدأ العريس يحدق في ذهول و علامات التعجب تتقافز من وجه ثم قال
– مين دي يا بشمهندس
– اختي
– هي دي اختك اللي عندها انحوال و انعوار و بتمشي علي كورسي متحرك و وزنها 2 طن؟؟؟
– ايوه
انفجر ضاحكا … ثم تمالك نفسه بسرعه قائلا
– عفوا يا بشمهندس … بس حضرتك دمك خفيف موت و …
– انتهينا …. خليني اتكلم
– اتفضل يا بشمهندس
– انا طبعا محترم جدا رغبة اي شخص بيطلب الحلال …. و محترم اسلوبك يا استاذ في طلب الحلال و الدخول من الباب … و طبعا اختي بنت عارفه الاصول فقالتلي علي كل شئ …. و انا عامل الجلسه دي عشان يكون الحكم موضوعي …. و كتعارف تحت مظلة الرقابه الاسريه … بعد اذنكم هروح لاقرب محل سندوتشات احاول اكل تصبيره … و ارجعلكم

ثم اتركهم و اذهب فعلا الي محل السندوتشات المحبب الي قلبي و بعد تصبيره خفيفه مكونه من 22 سندوتش و سبعة اكواب عصير اصب منزوع الزعزوعه .. اقرر العوده الي مكان جلوسهما فاذا بالصمت يخيم علي المكان و اختي واجمه صامته …

– السلام عليكم … آسف للتأخير
يرد العريس
– لا ابدا …
فتقاطعه اختي موجهه حديثها لي
– ابيه يلا نروح
احسست ان هناك شئ ما … فنهيت الجلسه و سلمت علي عريس الغفله و اصطحبت اختي الي البيت و دار هذا الحوار

– ايه النظام ؟
– نظام ايه يا ابيه ؟
– العريس ؟
– انسي الموضوع يا ابيه
– انسي بعد كل الجهد اللي انا بذلته معاكي .. هو لعب عيال و لا ايه
– بصراحه يا ابيه انا مرتحتلوش خالص
– ليه ؟ … ده عريس لقطه !!!
– شكله ما عجبنيش
– و هل الراجل بشكله يا اختي العزيزه
– مش شكله بس يا اخويا … مرتحتش لاسلوبه في الكلام و طريقته و تفكيره
– تفكيره !!!! …. انت مش سبب اعجابك بيه اصلا كتاباته اللي بتدل علي تفكيره ؟!!
– يا ابيه … انا اكتشفت فعلا زي ما حضرتك قلت ان الكتابات في المنتديات مش كافيه للحكم علي الشخص و ان فيه عوامل كتير بتحكم علي الموضوع
– مش انا قلتلك من الاول اعمليلي اربعين سندوتش و كوباية عصير منجه و ارحميني من الفيلم الهابط ده
– لا يا اخي … انا كده ارتحت … لاني لو مكنش حضرتك عملت المقابله دي كان زماني بفكر في الموضوع بزوايا تانيه و لا قدر الله ممكن يتطور …. انا بشكرك يا احلي اخ في الدنيا …. لو كنت عرضت الموضوع علي ابويا كان زمانه حطني تحت "كاوتش" العربيه …. و عمل شاشاة الكمبيوتر صندوق زباله
– عموما حصل خير يا اختي الجميله … و نتعلم دايما اننا نحكم علي الموضوع من كل جوانبه … و طبعا بالاصول … و علي فكره كان ممكن يطلع الشخص ده شخص كويس و يعجبك و تعجبيه و الامور تمشي …
– صح يا ابيه
– يلا ادخلي اعملي اربعه و تسعين سندوتش و خمسين حتة بسبوسه … يلا
– حاضر يا اخويا …. هوا