*******************
الحوم..
طبق أساسي على السفرة الرمضانية
على الرغم من ارتفاع الأسعار، فإن كل الأسر بتحاول على أد ما تقدر إن السفرة الرمضانية تكون عليها نوع من أنواع الحوم يومياً؛ سواء كان سمك أو فراخ أو حمام أو بط أو لحوم حمراء…
ودلوقتي هنتكلّم على كل نوع من أنواع الحوم، وهنعرف إزاي نحفظه بالطريقة المناسبة علشان يكون جاهز في ثلاجتك على الاستخدام على طول…
××××××××××
الأسماك تحتوي على مادة الأوميجا 3 الي بتحمي الجسم من تكوين الجلطاتالأسماك
من الأطباق الي بتكون خفيفة جداً على المعدة وخصوصاً في الصيف، وكمان فيها قيمة غذائية عالية جداً؛ لأنها بتحتوي على نسبة من البروتينات والأحماض الأمينية المفيدة جداً للجسم، وكمان بتحتوي على مادة الأوميجا 3 الي بتحمي الجسم من تكوين الجلطات، بالإضافة إلى إنها بتحتوي على اليود والفوسفور والكالسيوم، وكمان فيتامين أ، د.
وخدي بالك وإنتِ بتشتري السمك.. إنك تبصّي على عين السمكة والي لازم تكون بتلمع، وما فيش عليها أي سحابة بيضاء، وكمان الخياشيم لازم تكون حمراء وما فيش عليها أي مخاط أو سوائل لزجة، ويكون جلد السمكة وجسمها مشدود وبيلمع وما فيش عليه أي ترهلات، وممكن تختبري السمك إذا كان طازة ولا لأ بإنك تضغطي بإصبعك على جسم السمكة، لو لقيتي المكان الي ضغطتي عليه زي ما هو وما اتأثرش بالضغط تبقى السمكة دي طازة، أما لو لقيتي إن المكان الي ضغطتي عليه دخل لجوه وفضل زي ما هو يبقى السمك ده مش طازة.
ولما تيجي تنظّفي السمك.. بتجيبي السمكة وتمسكيها من الوسط، وتبدئي بعد كده تشيلي القشر من عليها باستخدام سكينة مش حادة أوي، وبتمشي بالسكينة في الاتجاه من الذيل وحتى الرأس، وبعد كده قصّي الزعانف بمقص حاد، وافتحي السمكة من الجنب بالسكينة، وابدئي نظّفي السمكة من جوه كويس جداً، وطلّعي منها كل الأمعاء وتكتلات الدم الي بتكون موجودة، وركّزي جداً على المنطقة الي بيكون فيها العمود الفقري؛ لأن بيكون فيها تجمعات دم كتير، وممكن إنك تستخدمي فرشة أسنان قديمة لتنظيف السمكة من جوه.
وبعد ما تنظّفي السمك اغسليه بمية من الحنفية، وبعد كده انقعيه في مية وخل وليمون لمدة 20 دقيقة، وبعد كده افركي السمك تاني من جوه كويس، واشطفيه بالمية مرة كمان، وسيبيه على مصفى لغاية ما ينزّل ميته.
بعد كده قسّميه في أطباق فِل؛ بحيث إن كل طبق تكون به كمية تكفي ليوم، وغطي الطبق ده بكيس بلاستيك، بس اتأكدي إنه يكون نظيف تماماً وغير مستعمل قبل كده، وتفرغي منه كل الهوا.
وخلّي بالك لما تيجي تستخدمي السمك المجمّد ده إنك تطلعيه من الفريزر قبل الاستخدام بحوالي ساعتين، وتحطيه في رف الثلاجة من تحت لغاية ما يدوب، وبعد كده تبليه وتقليه أو تعمليه صينية على حسب ما إنتِ عايزة وعلى حسب نوع السمك الي عندك.
وعلى فكرة إنتِ ممكن تتبلي السمك قبل ما تشيليه في الفريزر، بحيث إنه يبقى جاهز على الاستعمال على طول، وقت ما تحتاجيه، ودي مكونات تتبيل السمك وهي عبارة عن: "ملح + فلفل أبيض + كمون + كسبرة ناشفة مطحونة + ثوم مفروم + فلفل أخضر مفروم + ليمون" وبتخلطي كل المكونات دي مع بعض وبالكميات الي تكفيكي، وبعد كده تاخدي من الخليط ده وتحشي به قلب السمكة، وسيبي السمك بالتبيلة في الثلاجة لمدة ساعتين، وبعد كده قسّميه على أطباق فِل، وغطيه بكيس بلاستيك بنفس الطريقة الي قولناها، وبكده السمك يكون جاهز عندك على الاستخدام على طول.
××××××××××
يُفضّل إنك قبل ما تشيلي الحمة في الفريزر تقطّعيها لقطع صغيرةالحوم الحمراء
يُفضّل إنك قبل ما تشيليها في الفريزر إنك تقطّعيها لقطع صغيرة مناسبة مع الحجم الي إنتِ بتطبخي به، وبتشيليها في الفريزر من غير ما تغسليها؛ لأن الرطوبة العالية ممكن تتسبب في إن الحمة تفسد بسرعة، وكمان يُفضّل إنك تشيلي قطع الدهون الي تكون موجودة على الحمة من بره.
ولما بتيجي تطبخيها يُفضّل إنك تطلعيها وتحطيها في الثلاجة قبل الوقت الي هتطبخيه فيها ب10 ساعات؛ يعني ممكن تطلعي كيس الحمة أول ما تصحي من النوم الصبح، ولما ترجعي من الشغل تشطفي الحمة بالمية، وتسوّيها على النار بالطريقة الي إنتِ عايزاها سواء مع الخضار أو تعملي بها كباب حلة أو أي صنف إنتِ عايزاه.
بس خلي بالك وإنتِ بتقسّمي الحمة في أكياس الحفظ أو في الأطباق الفِل، إنك تحطي في كل كيس الكمية الي تكفي لوجبة على حسب عدد أفراد أسرتك، علشان ما تضطريش إنك تجمّدي الحمة الي هتبقى بعد ما تسيح؛ لأن تجميد الحمة بعد تسيحها ممكن يسبب إن الحمة تتلف أو يتغيّر طعمها.
وبعد ما تقسّميها تخلّصي من الهواء الزيادة الي موجود في الكيس، وحطيه في الفريزر، ويُفضّل إنك تحطي الحمة على سطح الفريزر مباشرة.
وعلى فكرة إنتِ ممكن تغسلي الحمة وتشوّحيها على النار لمدة 5 دقايق قبل ما تشيليها في الفريزر مع شوية ملح وفلفل، وبعد كده تسيبيها تبرد خالص، وبعدين تقسّميها في الأكياس وتشيليها في الفريزر بنفس الطريقة الي قولنا عليها، وبكده تبقى الحمة جاهزة عندك، ولما تحتاجيها في أي وقت هتطلعيها من الفريزر وتحطيها على النار مباشرة ومش هتستني لما تسيح، وتعمليها بعد كده بالطريقة الي إنتِ عايزاها.
أما الحمة المفرومة فإنتِ ممكن تعصّجيها وتسيبيها تبرد قبل ما تشيليها في الفريزر، وتقسّميها على أكياس وتفرّغي منها الهواء، وبكده تبقى جاهزة عندك علشان تعملي بها صواني المكرونة بالبشاميل والجلاش بالحمة المفرومة والمسقعة وكمان تقدري تحشي بها البطاطس.
ودي طريقة تتبيل الحمة المفرومة وهي إنك تجيبي بصلة وتقطّعيها لقطع صغيرة وتشوّحيها على النار في سمن أو زيت، وبعد ما البصل يتحمّر شوية حطي الحمة المفرومة والبهارات والملح وسيبيها على النار لغاية ما تتعصج.
××××××××××
ممكن تقسمي الفراخ قبل ما تحفظيهالطيور
لما بتيجي تحفظي الطيور الطازة غير المجمدة بتجيبيها وتغسليها كويس جداً من جوه ومن بره، وبعد كده تسيبيها لغاية لما تنشف، وبعد كده تحطيها في أكياس الحفظ الجافة، وتأكدي إنك تفرغي الهوا كله منها.
ولما تيجي تطبخيها بتطلعيها من الفريزر، وبتسلقيها على طول مش لازم تستني لما تسيح.
وفيه حركة جامدة جداً ممكن تعمليها وهي إنك تجيبي الفراخ، وتخلي الفرارجي يقسّمها لك، ويخلي لك الصدور علشان تعمليها بانيه.
وبعد كده تاخدي وراك الفراخ وتغسليها وتشيليها في الفريزر، أما صدور الفراخ فبتبليها وتشيليها متبلة في الفريزر، وبكده تبقى جاهزة عندك علشان تعملي بها طبق فراخ بانيه محمّر مع شيبسي ومكرونة أو تقطعيها لقطع ضغيرة وتعملي بها صينية نجرسكو أو طبق أرز بالفراخ والخضراوات.
ودي طريقة تتبيل الفراخ البانيه… وهي إنك تجيبي بصلة مفرومة وتحطي عليها ملح وفلفل أسود وبهارات وزبادي وعصير ليمون وخل، وبتقلبيهم كويس مع بعض مع عصر البصلة المفرومة علشان تنزل ميتها في التبيلة، وبتحطي كل التبيلة دي على الفراخ وتقلّبيها كويس، وتسيبي الفراخ بالتبيلة في الثلاجة شوية، وبعد كده تقسّمي الفراخ المتبلة على الأكياس البلاستيك وتحطيها في الفريزر بنفس الطريقة الي قولنا عليها قبل كده.
يتبع:grin:
الشوربة والصلصة..
عامل مشترك في كل الأكلات
الشوربة من الأطباق الأساسية على سفرة رمضانالشوربة
بتعتبر من الأطباق الأساسية على سفرة رمضان، وعلشان توفّري وقتك ممكن تعملي أنواع مختلفة من الشوربة وتقسّميهم على أكياس بلاستيك وتقفليهم كويس، بحيث إن الكيس ما يكونش فيه أي هوا، واحتفظي بهم في الفريزر، وكل يوم تطلعي كيس الشوربة الي هتستخدميه وتحطيه على النار وفي خمس دقايق تكوني جهزتيها.
ومن أنواع الشوربة الي ممكن تحفظيها الشوربة العادية أو المرق والي بتطلع من سلق الفراخ أو الحمة، بس قبل ما تحطيهم في الأكياس صفي الشوربة كويس من بواقي البصل والحبهان الي فيها.
كمان ممكن تحفظي شوربة البطاطس وشوربة العدس وشوربة الخضار، بس دي بقى بتضربيها في الخلاط، وبعد كده تحطيها في أكياس بلاستيك في الفريزر وعند الاستعمال بتطلعيها وتحطيها على النار ومعاها كمية من البن، وبكده تقدري تعملي نوع شوربة كل يوم في رمضان في أسرع وقت.
ولما تيجي تطلعيهم عند الاستخدام حطيهم على نار هادية وهما مجمدين، وبكده يبقى طبق الشوربة جاهز معاكِ في خمس دقايق وبس.
××××××××××
ممكن تعملي كمية من الصلصة المتسبكة وشيليها في أكياس في الفريزرصلصة الطماطم المسبكة
الصلصة عامل أساسي بيدخل مع معظم أصناف الخضار الي ممكن تعمليها زي البامية أو الفاصوليا أو البسلة، وعلشان تسهلي على نفسك ممكن إنك تعملي كمية من الصلصة المسبكة وتشيليها في أكياس في الفريزر.
ودي الطريقة الي بتسبّكي بها الطماطم.. وهي إنك تجيبي الطماطم وتضربيها في الخلاط، وبعد كده تصفيها وتحطيها على النار، وممكن تضيفي معاها كمية صغيرة جداً من السمنة، وتسيبيها على النار لغاية ما تتسبك أو كميتها تقل وتسبك على النار، وبعد كده سيبيها تبرد، وبعد كده وزّعيها في الأكياس، وفرّغيها من الهوا واقفليها كويس وحطيها في الفريزر.
ودي النهايه دمتم بحفظ الله ورمضان كريم
…
